Aurora García Rivas y Daniel G. de la Cuesta protagonicen la segunda xornada de la Selmana Cultural de La Salle de Xixón

El Colexu San Eutiquio de Xixón, de los Hermanos de La Salle, celebra güei la segunda xornada de la so Selmana Cultural dempués de la presentación d’ayeri, que cunto cola presencia del conceyal de cultura y educación Justo Vilabrille, del escritor Humberto Gonzali y de los responsables del centru. Güei los conteníos entamen cola reflexón titulada “El Cementeriu de los Llibros Escaecíos” . A les nueve y diez de la mañana va ser Aurora García Rivas, escritora en castellanu y gallego-asturianu, la qu’entame les charres con “Averándose a la poesía”. A les 11.00 hores pieslla’l día un “Conciertu didácticu de Música Tradicional”, con Daniel García de la Cuesta , miembru del grupu folk Lliberdón, investigador, concertista y conferenciante de temática tradicional.

Mañana, miércoles 23, la reflexón va xirar alredor de “Pa entender matemátiques ha lleese”. Y a les 11.00 hores entama la xornada de conferencíes con “L’humor gráficu y el Cómic n’Asturies” con Ernesto García del Castillo “Neto”, dibuxante y humorista gráficu de La Voz de Asturias, pa zarrase dempués, a les 12.30 hores, cola conferencia “Cómo llegar a ser empresariu cultural “, con Inaciu Iglesias, empresariu, editor y escritor.

El xueves 24 entama cola reflexón “Carta a un neña que nun quier lleer”. A les once la mañana l’escritor y presentador de la TPA y la Cadena SER, Inaciu Galan y Gonzalez, va entamar una charra titulada “Facer televisión n’asturies”, na que va poder vese un documental preparáu por alumnos del centru y pol propiu autor a costafecha pa la ocasión y nel que se pue ver el procesu de realización del so programa de la TPA, “Al Aldu: Xente de Casa”. Esi mesmu día, a les doce y media la mañana escritor, etnógrafu, dibuxante ya ilustrador Alberto Álvarez Peña va falar de los “Mitos del Conceyu de Xixón”.

L’últimu día de la selmana cultural va abrise con una reflexón sobre “Los llibros…”, a la que va siguir, a les 11 hores una segunda sesión de la charra d’Inaciu Galán “Facer televisión n’asturies”, que va repetir la charra del xueves pa dellos alumnos más del centru.