Portada Tecnoloxía Xorrez enforma l’usu de les redes sociales n’Asturies

Xorrez enforma l’usu de les redes sociales n’Asturies

by asturnet

Cuatro de cada cinco asturianos y asturianes (un 87% de los usuarios d’Internet, concretamente) empleguen davezu les redes sociales frente al 73% que lo facía en 2009.

La rede de blog Ocio Networks, que cunta con más de siete millones d’usuarios únicos mensuales, vien d’ellaborar per segundu añu consecutivu un Estudiu de vezos n’Internet, nel que s’entrevistó a 1.875 internautes y nunu de los apartaos d’esta encuesta onde se fai un analís del consumu d’información, medios y redes sociales per parte de los usuarios, destaca que n’Asturies aumentó l’usu de les redes sociales pa comunicase. Asina lo manifestó’l 87% de los encuestaos asturianos nel últimu añu, frente al 73% de 2009.

A nivel nacional los datos tamién marquen una medría, cuidando que’l 83% de los internautes afirmó emplegar les redes sociales nel añu 2010, al contrariu qu’el 76% que lo fixo l’añu pasáu.

Según esti estudiu, les principales redes sociales esperimentaron un xorrecimientu pergrande respeutu al añu anterior. Facebook ye la más popular ente los entrevistaos con un 75% de penetración y un aumentu del 14% d’usuarios frente a 2009. Tuenti ye la segunda rede más emplegada, con un 33% d’internautes que lu utilicen frente al 22% del añu 2009. El porcentaxe d’usuarios que nun usa redes sociales baxa significativamente en 2010 hasta’l 17% frente al 24% del añu anterior.

Polo que cinca a Asturies, alredor d’un 67% de los encuestaos manifestó qu’utiliza Facebook, un 35% ye usuariu de Tuenti y otru 22% tien una cuenta de Twitter.

Tamién te podria gustar