Xixón presentó la Axenda Escolar y la carpeta didáutica “N’asturiano queda guapo”

Esti miércoles 24 de setiembre, la Oficina Municipal de la Llingua del Conceyu de Xixón presentó l’axenda escolar 2008/2009, dedicada esti añu a la lliteratura, y la carpeta didáutica “N’asturiano queda guapo”, un primer vocabulariu básicu pa los más pequeños. Nel actu, que tuvo llugar a les 13 hores nel Salón de Receiciones de la Casa Conceyu, tuvieron presentes el Conceyal de Política Llingüística, D. Jesús Montes Estrada, la Responsable de la Oficina Municipal de la Llingua, Mª Xosé Rodríguez López y direutores d’escueles de 0 a 3 años y d’Institutos de Secundaria de Xixón.

Esta ye la quinta axenda escolar que s’edita col enfotu de promover l’usu y conocimientu de la llingua asturiana ente l’alumnáu de secundaria y bachilleratu al tiempu que se-yos faciliten a los estudiantes recursos pa una meyor organización y distribución del tiempu escolar; Si les primeres axendes falaben de los díes internacionales, de les llingües del mundu, de la ecoloxía y de Xixón, esti añu toca falar de lliteratura.

Al traviés de les ilustraciones de Lupe Sabugo y los testos de Mª Ángeles García Rodríguez, l’axenda recueye los típicos espacios pal horariu escolar, les feches d’exámenes, el profesoráu, los deberes diarios, los trabayos de cada asignatura, un xustificante pa les faltes d’asistencia, pero tamién dexa sitiu pa les feches importantes, pa les señes de los collacios y collacies y sobre manerapa falar de lliteratura y conocer los distintos xéneros, téuniques d’escritura, d’organización de biblioteques o cómo facer un marcapáxines.

L’axenda va repartise ente los maestros y maestres d’asturianu del conceyu de Xixón y los casi 700 alumnos y alumnes matriculaos en llingua asturiana en Secundaria y Bachilleratu nos centros escolares del Conceyu.

D’otra manera la carpeta didaútica “N’asturiano queda guapo” ye una coleición de 7 cartelos ilustraos con un vocabulariu básicu sobre’l bañu, la clas, el cuerpu humanu, la ciudá, les formes xeométriques y los colores, el recréu y el comedor que va valir p’averar a los más pequeños a la llingua asturiana.

La campaña, que va repartise ente les escueles de 0 a 3 años y los d’Educación Infantil y Primaria de Xixón, faise en collaboración colos Servicios de Normalización de Llangréu, Siero, Cangas de Narcea, L.lena y Samartín del Rei Aurelio y ta subvencionada pola Conseyería de Cultura y Turismo.