Vuelve la Fiesta del Cine en payares con entraes a 2,90

La novena edición de la Fiesta del Cine va desenvolvese los díes martes 3, miércoles 4 y xueves 5 de payares, dies nos que’l preciu va ser de 2,90 euros.

Los interesaos na promoción necesiten unes acreditaciones que puen llograse a partir del primer día d’ochobre nesta páxina web pa esfrutar d’un preciu amenorgáu por entrada demientres los trés díes del eventu. Los menores de 14 y los mayores de 60 años nun van tener qu’acreditase pa participar.

En multiplicando’l so ésitu demientres delles ediciones, hasta l’aportar del récord de 2,2 millones n’ochobre de 2014, la VIII Fiesta del Cine quedó’l pasáu mayu en 1.598.720 entraes vendíes, con un descensu de 600.000 al respective de l’anterior. Esti añu la cita va sirvir tamién pa estenar duldes de si tocó techu o inda tien marxe de meyora.

 Como ye habitual podrán siguise mercando les entraes pa la Fiesta del Cine por trés canales de vienta distintes: taquilla, caxeros de vienta d’entraes asitiaos nos halls de los cines y plataformes habituales de vienta por Internet. Quien adquiera les sos entraes en taquilla, tendrá d’amosar l’acreditación nel momentu de la compra, ente que aquellos qu’adquieran les sos entraes nos caxeros o n’Internet tendrán d’amosar l’acreditación nel puntu de control d’accesu a la sala.

Los espectadores van poder esfrutar d’una amplia variedá de películes. Mientres esos trés díes, la cartelera va cuntar cola última película de directores españoles de reconocíu prestíu como Alejandro Amenábar o Alex de la Ilesia, los nuevos trabayos d’actores y directores internacionales como Woody Allen, Matt Damon, Guillermo del Toro, Johnny Depp. Amama, Black Mass, El Becariu, El Cadaver d’Anna Fritz, Irrational Man son dalgunes de les películes que van tar disponibles.

Con esti eventu, entamáu pola Confederación de productores audiovisuales españoles (FAPAE), la Federación de Distribuidores de Cine (FEDICINE), la Federación de Cines d’España (FECE) y l’Institutu de la Cinematografía y de les Artes del Audiovisual (ICAA), búscase fomentar l’asistencia a sales de cine como un vezu social y cultural. N’ochobre del añu pasáu, la Fiesta del Cine superó los dos millones d’espectadores y les sales recaldaron 6.3 millones d’euros.