Vil.lar de Vildas recibe’l Premiu al Pueblu Exemplar 2004 de manes del Príncipe d’Asturies

El centenar de vecinos qu’inda viven en Vil.lar de Vildas reciben esti sábadu el Premiu Pueblu Exemplar d’Asturies 2004 entregáu directamente pol príncipe Felipe, un día después de la solemne ceremonia del Teatru Campoamor d’Uviéu na que s’ufiertaron a tolos otros galardonaos los respectivos premios que concede la Fundación Príncipe d’Asturies. El xuráu del premiu decididió distinguir a esti pueblu del conceyu de Somiedu por saber conxugar l’adaptación a los nuevos tiempos de la globalización tecnolóxica col caltenimientu y conservación del so patrimoniu etnográficu y l’entornu tradicional del llugar.

A empiezos de los años 90 del pasáu sieglu Vil.lar de Vildas yera un llugar isláu pola so situación xeográfica y col principal mediu de vida sofitáu n’agricultura y ganadería de sosistencia. La llegada progresiva de visitantes en busca de les escelencies paisaxístiques y naturales de la zona nos últimos tiempos tien consiguío desenvolver diversos proyectos de turismu rural que cambiaron dafechu la vida d’esti pueblu.Conscientes del valor cultural qu’atesoraba’l patrimoniu etnográficu del pueblu los vecinos de Vil.lar de Vildas entamaron el llabor de rehabilitación de les sos viviendes y cabañes de ‘teitu’. Anguaño el llugar ufierta la posibilidá de visitar alrodiu de 65 construcciones col tradicional cubiertu de ‘teitu’ d’escoba.

En paralelo al desenvolvimientu turísticu de la zona la xente de Vil.lar de Vildas tienen puesto a funcionar apocayá un sistema de conexón a Internet de banda ancha vía satélite. El xuráu del Premiu Pueblu Exemplar d’Asturies valoró bien positivamente esta apuesta de modernidá d’una pequeña comunidá humana que quier siguir viviendo nel so llugar ensin renunciar a les posibilidaes qu’ufierta’l mundu de les nueves comunicaciones tecnolóxiques.