Valledor sofita les crítiques d’IX-Bloque a Pérez Ornia

El conseyeru de Xusticia y Esteriores del Principáu Francisco Javier García Valledor sumóse ayer a les crítiques feches por Izquierda Xunida-Bloque por Asturies a la xestión desenvuelta pol presidente del Conseyu d’Administración del Ente Públicu de Comunicación, José Ramón Pérez Ornia y concretamente a la manera de poner en marcha la empresa y a les bases de la convocatoria de selección de personal pa la radiotelevisión autonómica.

Les crítiques del conseyeru lleguen después que’l pasáu viernes la so compañera de coalición, la diputada Noemí Martín y el portavoz nacional del Bloque por Asturies y director de l’Axencia de Cooperación, Rafael Palacios, dieran una rueda de prensa pa espresar el refugue d’IX-BA a la convocatoria de selección de personal, sobremanera pola precipitación de les prebes y la nula valoración del conocimientu de la llingua asturiana nel temariu.

Con un escuetu “sí, claro, como nun podía ser d’otra manera”, García Valledor contestó a los informadores cuando-y preguntaron si compartía les crítiques a Ornia y darréu afirmó que “l’enfotu puestu por IX-BA nel presidente del Conseyu d’Adminsitración del Ente ta quebráu”. El conseyeru declaró que pela so parte Pérez Ornia “ya nun tien el mio aval”.

Darréu de Rafael Palacios, García Valledor ye’l segundu miembru del Gobiernu y el primeru del so rangu, en desmarcase de la xestión desenvuelta por Ornia y en manifestar que nun cuenta col enfotu del so grupu políticu. Recientemente la FSA retrucó les crítiques d’IX-BA calificando a la coalición de “contradictoria” y dio-y un toque d’atención a Valledor pa que se reservare d’espresar públicamente crítiques a la xestión del gobiernu del que forma parte.