Uviéu ye una de les universidaes meyor valoraes polos Erasmus

La Universidá d’Uviéu allúgase ente les 4 d’España meyor valoraes polos estudiantes internacionales. L’últimu informe de la plataforma StudyPortals vieno acabante premiar a la universidá asturiana.

Los estudiantes internacionales puntuaron a Uviéu con un 9 sobre 10, un sobresaliente y solo otres 3 instituciones españoles algamen la mesma nota: la Universidá Carlos III de Madrid y les universidaes de Barcelona y Salamanca.

El ránking del “International Student Satisfaction Awards” realizóse en recoyendo 17.018 opiniones estudiantiles de tol mundu publicaes nel portal STexx.eu y les sos resultancies fueron presentaos na conferencia añal de la EAIE en Glasgow.

España cunta col mayor númberu de premios nesta edición del “International Student Satisfaction Award”. Veinte #universidaes llograron un “mii bonu” y cuatro, ente elles Uviéu, un “escelente”. Irlanda, Finlandia, Suecia, Dinamarca y Noruega logren les calificaciones más altes nesti ránking internacional.

Los alumnos estranxeros que cursen estudios nel nuesu país emponderen les oportunidaes culturales, la dedicación de los profesores, la comunidá internacional, el clima y a ‘hospitalidá, amás de l’amabilidá de los españoles. Los estudiantes inclúin, ente los aspeutos ameyorables de les instituciones académiques, el nivel d’inglés de dellos profesores.