Uviéu, Xixón y Avilés van entamar una folixa pa promocionar la capitalidá europea de la cultura pa 2016

La Conseyería de Cultura y Turismu del Principáu y los Conceyos d’Uviéu, Xixón y Avilés programen una “Nueche Blanca” enllena de conciertos musicales pal 3 d’ochobre venceyada a la candidatura a la Capitalidá Europea de la Cultura de 2016.

La Conseyera de Cultura y Turismu del Principáu, Mercedes Álvarez González, y los conceyales de Cultura de los Conceyos d’Uviéu, Xixón y Avilés, José Suárez Arias-Cachero, Justo Vilabrille y Román Antonio Álvarez, presentaron apcoyá la “Nueche Blanca” d’Uviéu, Xixón y Avilés, que se va desendolcar el sábadu 3 d’ochobre nel marcu de los actos previstos pa la Capitalidá Europea de la Cultura de 2016, a la qu’opten les trés ciudaes asturianes nuna candidatura conxunta. España y Polonia comparten capitalidá tala esi añu.

Les trés ciudaes van axuntar, nun total d’once escenarios, 24 actuaciones. El cartelu inclúi rock (McCoyson, Black Horde, Walls of Troya, One For Apocalypse, Doctor Explosión), música d’autor (Fran Gayo, Igor Paskual, Pablo Moro, Pablo Valdés, Xuliu Antidio), pop tradicional y de nueva espresión (Los Mancos, Elle Belga, La Jr, Burbujas y Seres Despreciables, The Paperbacks), hip hop (Arma X, Dj Pimp), metal (Avalanch, Sauze) y música de raíces clásiques y retorcíes (Lucas 15, Michael Lee Wolfe, Felpeyu, Xera, Montañas).

Los conciertos, a partir de les diez de la nueche, van repartise pel Muséu del Ferrocarril, la Ciudadela, l’Antiguu Institutu y les Termes nel casu de Xixón, la plaza de Trescorrales, el Palaciu de Toreno y el teatru de Pumarín, n’Uviéu, y la casa de la Cultura, la plaza de los Hermanos Orbón, la ilesia vieya de Sabugo y el Palaciu de Camposagrado, n’Avilés. La Nueche Blanca d’Uviéu, Xixón y Avilés sigue la tendencia qu’entamara n’otres ciudaes españoles d’abrir espacios culturales toa una nueche y agospiar nellos toa mena d’actividaes culturales.

Uviéu, Xixón y Avilés son les úniques ciudaes españoles que presenten una candidatura común na competición por ser Capital Europea de la Cultura. Pal Gobiernu del Principáu, promotor de la candidatura asturiana en collaboración colos conceyos d’Uviéu, Xixón y Avilés, la Capitalidá Europea de la Cultura ye una oportunidá única de facer visible l’esfuerciu que les trés ciudaes asturianes vienen faciendo en materia d’equipamientos y programes culturales de calter internacional, con importantes elementos de tradición ya innovación combinaos y con exes d’actuación cooperatives qu’inscriben los valores y la creación local nos nuevos marcos dinámicos de la creatividá contemporánea.

La Conseyera de Cultura y Turismu solliñó la importancia de la candidatura conxunta de les trés ciudaes: “Somos una candidatura única. Única pola so voluntá d’amosar cómo, en materia cultural, les trés grandes ciudaes (y les demás de la so contorna inmediata) funcionen pa toles persones interesaes na cultura de manera tan complementaria ya intelixente que nos permiten falar d’una gran metrópoli cultural, con una ufierta variada que recueye bayura de sensibilidaes ya intereses. Única porque va abordar conxuntamente los compromisos estratéxicos de la cultura asturiana pa les próximes décaes. Y porque esta cooperación demuestra la capacidá de les alministraciones públiques d’alcontrar grandes espacios acordies y collaboración nel marcu de l’acción cultural”.

Les amueses de la fuercia de la que surde la candidatura puen percibise de forma meridiana na fuerte presencia de la ufierta cultural nel triángulu asturianu. Son exemplu evidente dende la temporada d’ópera o de zarzuela uvieines a les programaciones internacionales de teatros ya instituciones con sede nes trés ciudaes, y les previsiones d’acciones futures que van multiplicar esa axenda: esposiciones, conciertos, encargos de producción artística, dos orquestes sinfóniques d’alta calidá, un centru d’arte y creación industrial o un conxuntu de museos escelente, amás d’actividaes nel terrén de la escena contemporánea o del espardimientu del patrimoniu.

La candidatura asturiana yá recibió más de 300.000 votos (ye la segunda con más apoyos) nel procesu de votaciones populares promovíu pola Asociación de Ciudaes Candidates na so páxina web (www.candidatecities.org).