Uviéu prepárase pa la ceremonia d’entrega de los Premios Príncipe d’Asturies

Los responsables de la Fundación Príncipe d’Asturies rematen los últimos detalles pa que too salga según los planes previstos cuando mañana a les 18,30 hores entame la ceremonia d’entrega de los premios que concede la institución un añu más. Más de setenta televisiones europees van cubrir l’eventu que tamién se va poder siguir en tol mundu en castellano o en inglés al través de la canal puesta en marcha dende la páxina web www.fpa.es dende’l día 14 d’ochobre.

Como ye vezu la ceremonia va tar presidida pol Príncipe Felipe, al que por primera vez acompaña nel actu la so muyer Letizia Ortiz. Pel escenariu del Teatru Campoamor dirán desfilando los galardonaos d’esta vixésimo cuarta edición de los Premios a recoyer la distinción de manes del heriede de la corona española.

Los premiaos esti añu nes estremaes categoríes son Claudio Magris, nel apartáu de les Lletres; Paul Krugnman, premiu de Ciencies Sociales; Jean Daniel, premiu de Comunicación y Humanidaes; Francisco Sánchez Gómez ‘Paco de Lucía’, premiu de les Artes; Hicham El Guerrouj, premiu de los Deportes. Nel apartáu de la Investigación Científica y Técnica, comparten el galardón: Judah Folkman, Tony Hunter, Joan Massagué, Bert Vogelstein y Robert A. Weinberg. Los premios de la Concordia y de Cooperación Internacional foron respectivamente pal Camín de Santiago y pal Programa Erasmus de la Unión Europea.

La ceremonia rematará cola interpretación de los himnos d’Asturies y d’España. El sábadu 23 los Príncipes d’Asturies van treslladase hasta Vil.lar de Vildas, en Somiedu, pa facer entrega del Premiu al Pueblu Exemplar a los vecinos del llugar.