Uviéu celebra’l primer Poetry Slam feminista

La conceyala d’Atención a les Persones ya Igualdá, Marisa Ponga, y el presidente del Conseyu de la Mocedá d’Uviéu, Alberto Fernández Martino, presentaron esta selmana’l primer Poetry Slam de calter feminista que se celebra n’Uviéu y que va tener llugar esti vienres día 31, a les 19 hores, na biblioteca municipal de La Granxa.

Ponga señaló na presentación que con esti eventu ponse’l “broche d’oru” a la programación diseñada por cuenta de la celebración del 8M, Día Internacional de la Muyer y que se desenvolvió demientres tol mes de marzu.

Ponga esplicó qu’el slam ye un formatu de tornéu de poesía inspiráu nel boxéu, que nació en Chicago nos años 80. Faise por rondes onde cada poeta tien tres minutos pa lleer el so poema y el públicu ye’l xuráu.

El presidente del Conseyu de la Mocedá fizo anuncia de que’l Conceyu cuntara con ellos pa esta actividá y señaló que l’oxetivu ye “xenerar espacios d’alcuentru y confluencia de muyeres poetes pa da-yos visibilidá”. Fernández Martino indicó que nesti Slam participen les siguientes cinco poetes: Aurora Abelairas, Noelia Morgana, Ana Vega, Alba Puntu G y Nuria Llaín. Amás, les participantes van tar acompañaes pola moza uvieina Cristina Montoya al caxón flamencu.