UNA pide al Gobiernu d’Asturies que los ordenadores de les escueles usen software llibre

Unidá Nacionalista Asturiana fae un llamamientu pa que’l Gobiernu asturianu nun imponga sistemes operativos propietarios y faiga un apueste claru pol software llibre dientro del desenvolvimientu del Programa Escuela 2.0.

Unidá Nacionalista Asturiana (UNA), al traviés del so voceru Faustino Zapico, amosó l’alcuerdu con l’usu de sistemes operativos llibres ya que “garantiza una meyor optimización de los recursos financieros, permitiendo que col mesmu coste económicu estes polítiques d’introducción de les nueves tecnoloxíes na escuela asturiana puedan algamar meyores resultaos. Dientro del Estáu español hai exemplos d’estes polítiques venceyaes al software llibre como ye’l casu de la Comunidá Autónoma d’Extremadura, na que gobierna’l PSOE”.

Según UNA el Gobiernu d’Extremadura lleva años mandándose de soluciones tecnolóxiques llibres, cola implantación na escuela d’una distribución propia, LinEX, basada en GNU/Linux, con unos “resultaos granibles nel planu económicu, tecnolóxicu, y educativu, siendo un referente internacional nesti campu. Representantes d’esta alministración tienen reconocío la imposibilidá de desenvolver plenamente estes polítiques ensin soluciones llibres”.

Los nacionalistes consideren que mandase de software llibre permite un aforru económicu significativu, amás de garantizar la independencia tecnolóxico a la que tán obligaes les alministraciones públiques. Otru de los beneficios ye la xeneración d’un texíu tecnolóxicu propiu venceyáu al desenvolvimientu y al mantenimientu d’aplicaciones de códigu fonte abiertu.

Zapico afirmó que nel casu d’Asturies “nun se puede escaecer que l’usu d’estes tecnoloxíes permitiría l’usu d’un sistema operativu 100% n’asturianu gracies al trabayu desinteresáu de la comunidá Softastur. Una xera reconocidá y pervalorada pola comunidá internacional d’Ubuntu que destacó va poco lo muncho que-yos prestaba que fuere una llingua minorizada como l’asturiana una de les 25 del mundiu totalmente implementada, al mesmu nivel que castellano, inglés, francés, portugués o catalán”. UNA considera que’l “Gobiernu asturianu nun puede marafundiar dinero de los contribuyentes en sistemes operativos propietarios que nun xeneren riqueza n’Asturies, cola implantación de software llibre nes escueles taríemos invirtiendo na creación d’emplegu, tecnoloxía y conocimientu n’Asturies” concluyó Zapico.