Una editorial d’Alemaña asoleya una gramática asturiana en castellán

El profesor de la UNED, Xavier Frías Conde ta acabante asoleyar un compendiu de gramática asturiana cola editorial alemana EAE, especializada en llibros de llingüística y filoloxía. Frías Conde esplica como dempués de pidi-y trabayos pal asoleyamientu, esta editorial vio con mui bonos güeyos espublizar esti “Compendio de Gramática Asturiana, fundamentos de gramática asturiana para castellanohablantes”, dempués del ésitu que tuviera la so versión dixital, xubida a la rede va dellos meses.

Na obra, Frías Conde apuesta por “una gramática del asturianu en castellán, cenciella y prática”, pensanda pa les persones que s’averen a deprender esta llingua.

Xavier Frías-Conde (1965) ye Doctor en Filoloxía Románica, autor de lliteratura infantil, poesía y ensayu. Amás, ye traductor lliterariu, autor de delles antoloxíes (de poesía galesa, gallega y sarda contemporanees), miembru del Grupu Bilbao d’escritores en llingua gallega en Madrid. Ye falante de diez llingües, ente elles l’asturianu y la llingua del Eo-Navia, sobre la que teorizó abondo nos años noventa.

Mercar el llibru en llínia