Portada Música UNA cree que la SGAE pon en peligru los eventos musicales en munchos conceyos

UNA cree que la SGAE pon en peligru los eventos musicales en munchos conceyos

by asturnet

Tras el nuevu casu de Cabranes Faustino Zapico, d’Unidá Nacionalista Asturiana, denuncia que la SGAE va impedir que munchos Conceyos asturianos y otres entidaes “puedan organizar eventos musicales pa los sos ciudadanos”.

La formación nacionalista llamó l’atención sobre los casos últimos de deldes imputaes a corporaciones llocales o comisiones de fiestes polos derechos d’autor. UNA “yá s’allugó’l pasáu mes de febreru en contra de les tases de la SGAE por actos culturales populares a traviés del so conceyal de Carreño”, daquella Santiago Artime, polos pagamientos a esta entidá que fixo’l conceyu, “qu’amás d’escesivos ya inxustificaos, impedíen la celebración de fiestes populares pol costu que suponen estes tases”.

Pela so parte, el portavoz nacional d’UNA Faustino Zapico, en referencia a la delda de 7.500 € del Conceyu de Cabranes a la SGAE declaró que “la SGAE ta convirtiéndose nun peligru pa la cultura popular n’Asturies” y cuida que ye “increíble qu’una sociedá que diz representar la cultura tea tentando de lucrase ensin criterios claros de la so difusión per parte de los Conceyos y otres entidaes”. Dende’l puntu de vista d’UNA “ye intolerable que la SGAE recaude dineru de la música popular asturiano y esto nun reinvierta nada nos propios músicos asturianos”.

Asina mesmo UNA, criticó la presión que la SGAE fae sobre iniciatives socioculturales n’Asturies como el “Pueyes rock qu’ante la demanda de la SGAE al entamador del evento tuvo que suspendese, acabando con uno de los festivales d’iviernu onde los grupos asturianos teníen la posibilidá de dase a conocer”.

UNA propón que s’establezan unes tarifes especiales pa los actos de difusión cultural de traza pública. D’igual manera, la organización asturianista quier que s’identifique perfectamente en conceptu de qué derechos cobra, tanto igües como pieces orixinales, pa qu’en nengún casu la música tradicional se vea fiscalizao pola aición de la SGAE.

Tamién te podria gustar