Un llibru recueye los trabayos de les Xornaes d’Estudiu de la Gaita Asturiana

El salón d’actos del Edificiu Administrativu de Servicios Múltiples (EASMU) del Principáu n’Uviéu acoyó esti llunes 27 la presentación del llibru: “La gaita asturiana. Xornaes d’estudiu”, un volume que recueye les actes del congresu celebráu en Xixón en mayu del añu pasáu alrodiu de diversos aspectos tocantes a la realidá del instrumentu tradicional.

Fernando Ornosa, del Muséu de la Gaita de Xixón, entidá organizadora de les xornaes del añu pasáu; los gaiteros Pedro Pangua y Flavio de Benito, y el responsable d’estudios artísticos de la Conseyería d’Educación Roberto del Campo participaron nel actu de presentación de los trabayos espuestos nes Xornaes d’Estudiu de la Gaita Asturiana. Nel cursu de la so intervención, el representante de l’administración autonómica, recalcó’l compromisu de la Conseyería n’elevar a rangu oficial los estudios musicales de gaita asturiana.