Un lince boreal percorría Asturies hai doce mil años

Un estudiu publicáu esta selmana nel caberu númberu de la prestixosa revista ‘Journal of Zoology’ y nel que participa la Universidá d’Uviéu confirma la presencia del lince boreal nel cordal cantábricu hai 12.000 años.

L’estudiu, que vieno acabante d’asoleyar esta pernomada revista científica y pue descargase de baldre na web, demuestra que esti lince boreal yera realmente un lince cerval euroasiáticu o boreal y qu’habitó en tol Cordal Cantábricu, incluyendo Asturies, hai alrodiu de 12.000 años.

Los investigadores analizaron restos d’ocho animales atopaos por espeleólogos nel norte d’España, dos d’ellos n’Asturies, o calteníos en museos como l’Arqueolóxicu de Cantabria. Estudiaron tamién otros ocho exemplares procedentes de Dinamarca y oldearon toos ellos con linces actuales y antiguos recoyíos en trabayos previos.

Les amueses d’ADN algamaes na investigación revelaron que los exemplares atopaos nel norte d’España corresponden al lince cerval euroasiáticu, una especie que vive inda en bona parte d’Europa y Asia y que s’escastó nel nuesu país hai alrodiu d’un sieglu.

Dos investigadores de la Universidá d’Uviéu formaron parte del equipu: Carlos Nores y Diego Álvarez Lao, el primeru profesor del departamentu de Bioloxía d’Organismos y Sistemes ya investigador del Indurot y el segundu profesor  del departamentu de Xeoloxía.

Carlos Nores destacaba esti día nuna nota de prensa asoleyada pola Universidá que lo importante d’esti trabayu ye que, per primer vegada, confírmase tantu morfolóxica como molecularmente que l’animal del que falaben los cazadores va sieglos, conocíu na Cornisa Cantábrica como llobu cerval, yera realmente’l llobu cerval euroasiáticu o boreal. “Unu de los aspeutos d’interés d’esti trabayu ye qu’enllaza temporalmente los datos paleontolóxicos del llobu cerval boreal na península ibérica, que van dende hai 12.000 años hasta daqué más de 400, colos datos históricos, qu’empiecen nel sieglu XV y estiéndense hasta mediaos del XX”, comenta l’investigador del Indurot.

La investigación apurre amás otru aspeutu importante: “confírmase que nos montes del norte namái esistía lince cerval boreal, ente que l’ibéricu, dende l’apaición del so conxénere nórdicu, quedó confináu a la parte d’ambiente mediterráneu de la península”, añede Carlos Nores.

Asturies contribuyó al estudiu con restos de dos exemplares topaos en Quirós y na Sierra del Sueve. La investigación dexó datar l’antigüedá de dambos animales. El de Quirós morrió fai 1.751 años y el d’El Sueve, fai 4.707 años. “Son muncho más antiguos de lo que había pensase primeramente pol aspeutu de los sos güesos”, sorraya l’investigador asturianu Carlos Notres.