Tolivia organiza’l so I Mercáu Trandicional

Tolivia organiza esti fin de selmana’l I Mercáu tradicional. La iniciativa, sofitada pol Ayuntamientu de Llaviana y l’asociación cultural El Cascayu, inclúi un ampliu programa d’actividaes qu’entamen el sábadu 4, a les cuatro la tarde, y na que destaquen representaciones teatrales, actuaciones musicales y presentaciones de llibros. Asinamesmo va poder vese en directu’l trabayu de cesteros, filanderes, artesanos de la maera, del azabache, tiñiores y madreñeros; amás de cuntar colos tradicionales puestos de gastronomía típica asturiana.

Col envís de fomentar la vida social y cultural de la localidá llavianesa de Tolivia, les entidaes organizadores quieren tamién con esti mercáu favorecer el diálogu y la convivencia interxeneracional, recuperando y espardiendo ente los más mozos la cultura asturiana. Pa ello organicen un fin de selmana festivu con un programa enllenu d’actividaes pa toles edaes, anque especialmente pensáu nes nueves xeneraciones.

Asina, el sábadu día 4, entamará’l mercáu con un percorríu oficial acompañáu pola gaita y el tambor. A les seis y media’l Grupu Teatru “La Salle” representará les obres “La bruxa Lolina lléete la manina” y “Cuentinos políticamente correctos” na plaza La Peruyera. Mentestanto, en Campu La Iglesia va haber una esposición d’asturcones, con paseos pa los nenos. Una muestra de baille tradicional y la obra “Danza del solsticio de verano”, precederán l’actuación d’una bandina tradicional asturiana y la muestra d’ellaboración de cerámica cola que terminará’l primer día del mercáu.

El domingu 5 de xunu entamará a les doce la mañana col tradicional pasacais de gaita y tambor. A les doce y media’l Grupu Teatru “La Salle” será l’encargáu de representar “Aventures colos tirititeros”, mentes que nel llagar de La Pipa, a la una la tarde, va poder sentise tonada asturiana. A la una y media, Juan Fernández y Tante Blanco, presentarán y charrarán sobre’l proyectu de dibuxos animaos basaos na novela “Hestories piquiñines” del cantante Los Berrones. De tarde va repitise la muestra de baille tradicional, la esposición y paséu colos asturcones, y el Grupu Teatru “La Salle” representará varies obres pel recintu la feria.

Nos puestos va poder saborguiase y mercar productos típicos del país como panes, tortos, quesos, fayuelos o miel. Ellí mesmo va facese demostración de les llabores de cesteru, madreñeru, tiñior, talla de maera, filanderes, etc. asina como l’actuación d’un monologuista qu’animará un fin de selmana con claru sabor asturianu.