Teberga “Viaxa a la Prehistoria” esta fin de selmana

Teberga va convertise esta fin de selmana nun auténticu pobláu prehistóricu na cuarta edición de “Viaxa a la Prehistoria”, que se va celebrar esta fin de selmana, 12 y 13 d’ochobre. El programa, con actividaes pa tolos públicos, va dar empiezu’l sábadu 12 a les 12.00 hores, na Casa de Cultura de San Martín de Teberga, col Gran Pregón “Viaxa a la Prehistoria” a cargo de Cristian González, presentador del programa “La Guía Michigrín” de TPA. Tres del pregón, tamién en San Martín, va abrise’l Mercáu tradicional prehistóricu que va poder visitase mientres tou la fin de selmana.

El sábadu tamién se va celebrar el taller de moda y manualidades prehistóriques “Un camín distintu pa la moda” nel Llar del Xubiláu de San Martín de Teberga, de 12.30 a 14.00 y de 16.00 a 17.30 hores, una ocasión perfecta pa crear un disfraz de prehistóricu y participar nel concursu d’amarutes. Amás, de 12.30 a 14.00 hores, la señorita Rockola va ufiertar clases p’aprender a baillar al ritmu de les piedres en “¡Mira quién bailla na Prehistoria!”.

Yá pela tarde va haber pasacalles con animación de los participantes nel concursu d’amarutes, que va partir a les 17.30 h. dende la Oficina de Turismu en dirección a La Plaza. De siguío va celebrase el concursu d’amarutes en La Plaza y va faese entrega de los premios tantu del concursu d’amarutes como de troncomóviles y caracterización de los establecimientos de la zona.

El domingu 13, “Viaxa a la Prehistoria” va siguir a partir de les 12.00 h. col mercáu tradicional y col amagüestu prehistóricu, que se va celebrar nun monte tebergán hasta les 14.30 h. Hasta ellí podrá llegase en taxi prehistóricu con salíes dende’l mercáu en San Martín de Teberga.

Pela mañana, de 12.00 a 13.30 hores, los visitantes tamién van poder participar nel taller de moda y manualidades prehistóriques nel Llar del Xubiláu de San Martín de Teberga. Amás, demientres tola fin de selmana’l Parque de la Prehistoria de Teberga ufierta una visita-taller gratuita, “Tres los pasos del artista”, una ocasión pa conocer numberosos intereses sobre la vida cotidiana nel Paleolíticu. Esta actividá realizará’l sábadu a les 17.00 hores y el domingu a les 13.00 hores. Coles mesmes, podrá esfrutase d’una tarifa amenorgada na visita a la Cueva de Cueves.

Pela so parte, en Cueva Güerta realizarán percorríos tematizados con llámpares de cañamina a les 11.00, 12.00, 13.00, 16.00, 17.00 y 18.00 hores, siendo necesariu la so reserva previa con un día d’antelación nel teléfonu 666 557 630.