Tarañu, Skanda, Chus Pedro y Vicente Díaz opten al galardón al meyor cantar nos Premios de la Música

Tarañu, Skanda, Chus Pedro Suárez, Vicente Díaz, Deua Dubra y La Tarrancha. Esos son los seis candidatos preliminares de los que saldrán los finalistes del galardón al meyor cantar en llingua asturiana nos IX Premios de la Música, qu’entama l’Academia de la Música y que van entregase en Madrid na primavera prósima. La llista definitiva d’aspirantes ellaboraráse a partir del miércoles.

Trátase del segundu añu nel que l’asturianu entra a concursu con categoría propia, y nesta ocasión los designaos en primer instancia como candidatos al meyor cantar n’asturianu publicáu a lo llargo de 2004 son seis temes de mui estremaes calterístiques y estilos: Chus Pedro Suárez concurre con ‘Agora sal a bailar’, un tema d’orixe tradicional con igües del propiu Chus Pedro y de Gabino Antuña. El folk ta presente con ‘Lin’, cantar escritu por Lilian Fernández ya interpretáu por Deua Dubra, mientres que los soníos más contundentes tán representaos por tres bandes moces: Tarañu, Skanda y La Tarrancha.

Los primeros concursen col tema ‘Nun nos dexen’, de José Luis Díaz; Skanda presenta ‘Sangre d’ochobre’, d’autoría collectiva; y la banda La Tarrancha entra nel llistáu preliminar d’aspirantes al meyor cantar n’asturianu con ‘Presente indicativu del verbu nun trabayar’.

Completa la llista el polémicu vencedor del premiu na so edición del añu pasáu, el compositor Pepín Robles, qu’entra a concursu col tema ‘La Pola de Siero’, interpretáu por Vicente Díaz. En 2003, Robles fízose col galardón a la meyor canción en llingua asturiana por ‘Nunca Máis’, un tema cantáu por Manolo Morán y dafechu cuestionáu como representativu de la música fecha n’asturianu a lo llargo del añu pasáu.

El propiu Víctor Manuel San José afirmó n’Asturnews, en xunetu pasáu, que barruntaba que quienes votaron esi tema como meyor cantar nin siquiera lu conocíen. Pol so llau, el vocalista’l grupu Dixebra, Xune Elipe, aseguró hai agora diez díes que “nun nos puen volver a meter el gol del añu pasáu”, n’alusión al controvertíu galardón.

Archivu. Pepín Robles y Manolo Morán ganen el premiu al meyor cantar n’asturianu por ‘Nunca máis’