Suspendíes de forma provisional les visites a la cueva de Altamira

Les visites esperimentales a la cueva de Altamira fueron suspendíes nel entamu d’esti mes de forma “escepcional” y “provisional” en detectándose una “perturbación na concentración de anhídrico carbónicu” nel interior del cuévanu.

Esti aumentu de la concentración d’anhídrico carbónico “ye natural y estacional” y vien “determinada pola situación climática nel esterior”, según espliquen dende’l Muséu Nacional y Centru d’Investigación Altamira na so web y al traviés de la so cuenta en Twitter.

Tal qu’avanzó esti vienres El Diario Montañés, por cuenta de la detección d’esa perturbación y en cumplimientu de los protocolos establecíos nel Plan de Caltenimientu Preventivu aprobáu pol Patronatu del Muséu, la visita pública por sortéu prevista pa esti vienres, 4 de xineru, quedó suspendida.

“Tratase d’una acción preventiva de calter provisional, que se va caltener hasta que se recuperen los valores de referencia establecíos”, indicaron dende’l Muséu de Altamira na web y nes redes sociales, nes que, anque nun tescendiera públicamente, tamién se comunicó la suspensión de la visita de va dos selmanes, la del día 14 d’avientu.

Sicasí, nun hubo una comunicación oficial sobro esta suspensión temporal de les visites esperimentales, al traviés de les que, dende febreru de 2014, los vienres apuerten a la cueva cinco persones escoyíes por sortéu ente los visitantes.

Mentanto sigue tamién ensin haber fecha pa la xunta del Patronatu de Altamira, órganu que nun s’axunta dende xunu de 2017. Naquel últimu alcuentru, yá s’indicó que s’estudiaría la estacionalización de les visites esperimentales. El coordinador del Plan Preventivu y de Caltenimientu de la Cueva de Altamira, José María Ballester, esplicó que s’analizaría la posibilidá de concentrar les visites fora del periodu ente febreru y xunu, que ye cuando s’acentúen los problemes de filtración y condensación de l’agua nel cuévanu.

Y aseguró que, d’enllantase esa estacionalización de visites, nun supondría l’amenorgamientu del númberu de visitantes a la cueva, que siguiríen siendo unes 240 persones al añu, sinón que, si se decidiera esa estacionalización p’ameyorar caltenimientu, el restu de los meses podríen realizase, por casu, dos sorteos selmanales pa la entrada de cinco persones acaldía.