Suburbia reedita “Les ruines” de Xandru Fernández

La colección “mecánica popular” de Suburbia Ediciones llega al so númberu 11 con “Les ruines”, de Xandru Fernández, un títulu que la editorial califica de “clave na lliteratura asturiana de los últimos tiempos”.

“Les ruines” ye la hestoria d’una familia y al mesmu tiempu ye la hestoria d’una época y un llugar que yá formen parte del pasáu. Una historia qu’empieza nos años de la guerra civil y acaba nos díes del fundimientu del Prestige, pero resumida nos socesos d’un solu día de febreru de 1980.

Espublizada per primer vezgada en 2004 por Ediciones Trabe, esta novela mereció’l Premiu de la Crítica de l’Asociación d’Escritores Asturianos y foi recientemente seleccionada polos llectores deBiblioastur como una de les diez grandes obres de la lliteratura asturiana del últimu mediu sieglu. Esta nueva edición, revisada y prologada pol autor, permítenos acceder de nuevu a un llibru que yera imposible d’atopar nes llibreríes dende hai años y que l’escritor Pablo Antón Marín Estrada calificó como “Un retratu despiadáu del paisaxe humanu y material que s’esborria al empar qu’un modu de vida pa dexar namás escombriu” .

Xandru Fernández (Turón, 1970), profesor de filosofía y traductor, ye autor de más d’una docena de títulos publicaos en llingua asturiana a lo llargo de venti años, entre ellos les noveles El suañu de los páxaros de sable (Premiu Xosefa Xovellanos, 1999), Les ruines (Premiu de la Crítica d’Asturies, 2004), La banda sonora del paraísu (Premiu Trabe, 2006), y los poemarios Servidume (2001) y Les vides incompletes (Premiu Xuan María Acebal, 2009). La so última obra narrativa hasta la fecha ye’l volume de cuentos Entierros de xente famoso (Suburbia Ediciones, 2008). Ta acabante apaecer una antoloxía billingüe de la so poesía, titulada Restauración (2010).