SUATEA y CCOO convoquen una concentración pol tratamientu dignu del asturianu na educación

Los sindicatos SUATEA y Comisiones Obreres orgnicen una concentración col lema “Nun queremos ser invisibles. La llingua asturiana como les demás”. L’actu reinvindicativu va celebrase esti miércoles 13 de mayu a les 18:30 hores frente al Palaciu de la Presidencia de Gobiernu d’Asturies n’Uviéu y nél va pidise la “creación de la especialidá de llingua asturiana nos cuerpos docentes”, amás d’otres midíes qu’albidren imprescindibles pa cumplir la sentencia del Tribunal Supremu que declaraba “contraria a derechu” la existencia de les “plantiyes funcionales”, categoría na que la Conseyería d’Educación englobaba a los docentes d’asturianu y gallego-asturianu.

La Plataforma de Docentes d’Asturianu conseñó yá los pasos a siguir énte esti problema: la “creación y inclusión de les especialidaes de Llingua Asturiana y de Gallegu-asturianu nel Catálogu de puestos de trabayu”; la “dotación de places de llingua asturiana nes plantiyes orgániques de tolos centros”; “convocatoria d’oposiciones”, y como últimu pasu nel procesu un “concursu de tresllaos”.

Los sindicatos esperen que docentes y otres persones interesaes acompañen a los sindicatos nesta reinvidicación d’igualdá de tratu pa la llingua asturiana.