SUATEA pide la reforma del Decretu o la dimisión de Riopedre

SUATEA, el sindicatu mayoritariu de la escuela pública n’Asturies, ta acabante d’espublizar un comunicáu col que quier manifestar la so indignación y sorpresa ante l’agresiva y malintencionada propuesta del proyectu del decretu por que se regula’l currículu de la Educación Primaria n’Asturies no tocante al tratamientu que tien pa cola asignatura de llingua asturiana. Nesi comunicáu afirma que “de nun s’eliminar esta propuesta con respecto a l’asignatura d’asturianu, pide la dimisión del conseyeru d’educación por ser el responsable últimu d’esta situación”.

Pela importancia de la tema, reproducimos darréu íntegramente’l comunicáu: “Ayeri pela tarde’l señor Riopedre y la cúpula de la Conseyería d’Educación presentaben a los sindicatos esti proyectu. Na disposición adicional segunda, nel apartáu 3 pon, testualmente, el siguiente párrafu: Quienes no deseen cursar Lengua asturiana realizarán actividades que contribuyan al desarrollo de competencias básicas fundamentalmente con la competencia en comunicación llingüística, la competencia en el conocimiento y la interacción con el mundo físico, la competencia en el tratamiento de la información y competencia digital, y la competencia cultural y artística.
Na redacción de la propuesta manifiéstase la intención de xenerar una asignatura alternativa a la de llingua asturiana na que se lexitima’l refuerzu en competencies básiques en comunicación llingüística y n’otres. La interpretación que damos con esto ye que los responsables de la redacción de la propuesta interpreten que nel estudiu de la llingua asturiana nun se desenrollen compentencies básiques llingüístiques, dalgo que nos paez sangrante y grave por demás.
Esto, de facese, supondría la lenta y paulatina desapaición de l’asignatura dientro del sistema educativu asturianu. Intenten, d’esta manera, que l’asturianu tenga que competir con una alternativa que, tal y como se manifiesta en borrador, va ser, inclusive, más potente que les que tien que sufrir la materia en secundaria. Con esti ataque a la débil situación del idioma muestren, una vez más, la falta de sensibilidá, de responsabilidá y de defensa del patrimoniu cultural y idiomáticu común de los asturianos. El despreciu col que traten el problema llingüísticu y la falta de conexón cola realidá ye indignante dende’l puntu de vista del nuestru sindicatu. Ye necesaria una rápida y axustada rectificación por parte d’esta conseyería, d’esti planteamientu enantes de que’l proyectu tea definitivamente configuráu. Pidimos y desiximos, per otra banda, que se garantice la dignificación de la situación de l’asignatura y que se dean pasos firmes pa buscar la so normalidá. De nun lo facer asina SUATEA va llamar a la movilización del profesoráu asturianu pola defensa d’un tratu dignu de l’asignatura, de la situación de los trabayadores y del idioma asturianu. Y hasta qu’eso nun se produza SUATEA pide la dimisión del conseyeru d’educación por nun tar a l’altura de les circunstancies, por nun saber defender y apoyar col rixu necesariu’l patrimoniu cultural asturianu, por provocar con esta situación la progresiva desapaición de l’asignatura. Pa ello SUATEA va ponese en contactu col restu de organizaciones sindicales, colectivos y instituciones asturianes p’abrir un frente común de defensa.
Llevamos 22 años d’escolarización precaria de l’asignatura. Y hasta agora nun se dio nengún pasu nin se buscó solucionar la situación. Yá valió d’abusos y de sectarismos propios d’otres dómines.
SUATEA, xunto con otros colectivos asturianos, cree que la única solución viable ye la declaración d’oficialidá de la llingua asturiana pa prevenir y desarmar estos ataques malintencionaos y amparar a los usuarios del idioma asturianu.”