SUATEA denuncia que l’Alministración “xuega al despiste con Orientación”

Dende SUATEA vieno acabante denunciase que la Conseyería d’Educación cada vegada fai más recortes que perxudiquen gravemente los derechos de los escolinos y de los trabayadores de la enseñanza. Pa entamar, el sindicatu pon na conocencia de tola sociedá qu’anque’l Conseyeru “se llene la boca diciendo que l’atención a la diversidá ye prioritaria, atopámosnos cola realidá que vien darréu: * Nos Equipos Específicos, sobre too Auditivos y Motóricos, falten abondos orientadores, pues los que taben marcharon pa los programes esperimentales. Teniendo en cuenta qu’estos Equipos son los que más tienen que saber de toa Asturies, ye inconcebible que vayan tar formaos por xente nuevo y nun van tener nin un cursu pa poder formase. * Los Equipos d’Orientación, cada vegada ven medrar más el so trabayu, ya que les places de los que van pa los programes esperimentales d’orientación nun se vuelven a cubrir. Colo que los equipos d’orientación tienen, en principiu, qu’atender al mesmu númberu de centros con menos xente. Por si esto fuera poco, anguaño tienen qu’atender centros concertaos un día a la selmana. * Amás ye qu’agora castiguen a los neños/es que tan nel hospital, cómo si nun tuvieren abondo con tar malos. Resulta qu’hasta agora cuando llevaben un mes hospitalizaos teníen derechu a l’atención nel aula hospitalaria, pero nesti intre tienen que tar hospitalizaos un mes y mediu, como poco. * Suprimieron tolos centros (40) d’integración preferente d’atención a la diversidá. * Amás, tenemos conocimientu de que dos neños inmigrantes de 15 años, acoyíos en centros de proteición social a la infancia, tan ensin escolarizar. Nós entrugámosnos: ¿Qué ye, que la enseñanza obligatoria, nun ye obligatoria y de baldre pa toos?

Con esta situación SUATEA diz ver como los recortes a los qu’afeuten de verdá ye a los más débiles y necesitaos. Poro, dende SUATEA, desixen a la Conseyería qu’igue toes estes irregularidaes d’una mena rápida y eficiente.