Suatea denuncia la imposible ellaboración d’Horarios

Falten pocos díes pal empiezu de les clases nes escueles de Primaria y yá entamen los problemes de los centros pa poder cubrir toles sos necesidaes que’l sindicatu SUATEA nun comunicáu asoleyáu esti xueves denuncia que siguen ensin iguase: “nestos momentos vívense situaciones caótiques nes que la ellaboración d’horarios conviértese nun llaberintu ensin salida digna dende la perspectiva de la calidá educativa”.

Col amenorgamientu de personal y l’implantación de la nueva Llei d’Educación la organización de les sesiones de les distintes asignatures sobrecarga al profesoráu como nunca lo tuvo enantes. En dellos casos queden periodos llectivos de 30 minutos que tán siendo autorizaos dende l’alministración entá a sabiendes que nesi periodu de tiempu nun puen impartise conteníos con criterios pedagóxicos: “too val pa esta Conseyería con tal de caltener amenorgada la plantiya al máximu posible. Falar de desdobles o apoyos ye falar d’utopíes imposibles de poner en práctica quedando reducíes a papel moyao nos documentos oficiales”.

Como venía asocediendo dende fai dellos cursos, los alcuerdos de plantiyes siguen ensin cumplise pal sindicatu: “les tutoríes de Primaria cúbrense colos especialistes d’otres asignatures, los apoyos d’Infantil rellumen pola so ausencia y les ratios máximes -que tendríen de ser escepcionales- conviértense na norma xeneral”.

Con esti compendiu de problemes ye –otra vuelta- el profesoráu interín, “especialmente’l que ta a media xornada, quien sal más perxudicáu viendo cómo los sos horarios ellabórense rellenando los furacos que queden y acaben teniendo xornaes llaborales que riquen la presencia nel centru como si tuvieren a tiempu completu”.

Dende SUATEA quieren facer público “que, pesie a la insistencia de l’Alministración en negar los conflictos, nos centros educativos súfrense los retayos, les direcciones nun ven cubiertos los sos pidimientos, faise evidente la falta de personal y too ello va tener por fuerza consecuencies educatives. Nun puen resalvase les responsabilidaes de la Conseyería d’Educación. La educación nun pue ser oxetu de retayos”.