L’Asociación de Trabayadores de la Normalización Llingüística critica’l procesu de selección de la plaza del serviciu en Mieres

Dende l’Asociación de Trabayadores de la Normalización Llingüística d’Asturies vienen acabante d’asoleyar esti xueves un duru comunicáu nel que quieren “declarar públicamente la disconformidá pa cola convocatoria y provisión de la plaza de responsable del Serviciu de Normalización Llingüística de Mieres pola opacidá na propuesta y selección de la mesma, y falta rigor y solidez na valoración de méritos”.

Nel comunicáu, l’Asociación diz que “lo primero qu’observamos ye que l’anunciu de la convocatoria faise a traviés de Trabajastur, que si bien nun dexa de ser un sistema más de publicidá d’ufiertes de trabayu, evita los medios habituales nel desarrollu d’un procesu selectivu na alministración local, que son el Boletín Oficial del Principáu d’Asturies y el tablón d’anuncios y web municipales”. La consecuencia directa del usu d’esta vía alternativa ye la escasa visibilización de la convocatoria, polo que pa l’Asociación “ta claro qu’a menor información tamién son menores les posibilidaes d’accesu a la plaza de les persones interesaes. L’anunciu y les bases de la convocatoria nun fueron los únicos documentos que nun tuvieron disponibles públicamente, yá que los llistaos de persones almitíes y escluíes y la notificación de la fecha del esame recibieron el mesmu tratamientu. L’únicu documentu que’l Conceyu Mieres fizo públicu daba a conocer los resultaos del procesu de selección y ponía fin al mesmu”.

En cuantes a lo qu’albidren ye una “falta rigor y solidez na valoración de méritos”, el comunicáu diz que “llama bien l’atención que na fase de concursu se conceda la mesma puntuación a los cursos de llingua asturiana qu’a los d’informática, y lo más chocante ye que considera d’igual manera los cursos de marketing, nun otorgando mayor puntuación a los conocimientos rellacionaos col asturianu, que ye la materia vinculada directamente col puestu a desempeñar y que nun garantiza la oxetividá nel accesu al puestu nin asegura la efectividá nel trabayu a desarrollar pol SNL”.

Nel comunicáu añaden tamién que nel 2014, el serviciu permaneció cerráu ocho meses, “lo que rescampla d’esti tipu actitúes ye la postura y disposición d’un gobiernu local que nun apuesta daveres pola estabilidá del SNL nun procesu de normalización llingüística efectivu, comprometíu y real, dificultando’l desarrollu de proyectos y la consecución d’oxetivos a mediu y llargu plazu”.

Por too ello, l’Asociación de Trabayadores de la Normalización Llingüística d’Asturies subraya “la necesidá de que los procedimientos d’accesu a les places de los SNL sigan los mesmos parámetros y s’axusten a la llegalidá vixente solicitando, nesti casu, del Conceyu Mieres, un compromisu real pa col asturianu y responsabilidá pa col SNL, asegurando la so continuidá en beneficiu d’un llabor eficaz, activu y duraderu”.