Soto acueye esti sábadu la XI Nueche Celta Conceyu d’Ayer

Soto d’Ayer va celebrar esti sábadu 2 de setiembre la so XI Nueche Celta coles actuaciones de Corquiéu, La Bandina xunto a Anabel Santiago, The Finlay Mcdonald Band y la Col.lá Propinde. Alredol del festival tamién se van organizar una serie d’actividaes complementaries, ente les que destaca’l mercáu tradicional y la escenificación de ‘Gorsedd’ de parte de la compañía Nun Tris.

A les cinco la tarde del sábadu, va abrise’l mercáu tradicional que va contar con talleres de cerámica, cestería, tornu y talla de madera, cuero, un ferreru, xoyes asina como con puestos de productos asturianos.

Como actividaes complementaries, a lo llargo de la xornada van organizase xuegos tradicionales, una esposición d’instrumentos musicales y un taller de bailles tradicionales. El teatru va correr a cargu de la compañía Nun Tris, que va poner n’escena “Gorsedd”, de les 24.30 a la 1.30 hores.

Pero ensin duda lo más atractivo del programa ye la parte musical, qu’esti añu llega a partir de les diez de la nueche de la mano de Corquiéu, La Bandina que va actuar xunto a Anabel Santiago, The Finlay Macdonald Band y La Col.lá Propinde.