Siguidores de les emisiones n’asturianu de la RTPA entamen una páxina web

Redacción.

Siguidores de la programación n’asturianu de la radio y la televisión autonómica d’Asturies tán acabante d’estrenar una páxina web na que faen un siguimientu completu de tolos programes de les emisores de radio y televisión del ente públicu asturianu.

La web, que ta tovía en construcción, inclúi un repás completu a tolos programes emitíos pola televisión asturiana: ‘Al Aldu’, ‘Camín de Cantares’, ‘Nós’, ‘Pieces’, ‘El Chigre’ (emitíu dientro de Terapia de Grupo) y dalgunes emsiones especiales como la misa n’asturianu que la TPA emitió esta fin de selmana pasada utilizando los gráficos en llingua asturiana.

Amás, la páxina recueye los programes de la radio autonómica que s’emiten y que fueron emitíos nel pasáu na canal pública, asina como un llistáu completu de los presentadores de los programes n’asturianu que van completase col tiempu con biografíes completes, según comentaron los responsables a Asturnews.com

Iniciatives como esta remarquen el siguimientu y la gran aceptación que tán teniendo los programes n’asturianu de la RTPA, a los que l’audiencia acompañó dende l’entamu de les sos emisiones.

Páxina web ‘RTPA N’ASTURIANU’