SensorSat Campus 2018 lleva les telecomunicaciones a la mocedá esti branu

El campus tecnolóxicu SensorSat que llanza l’Área de Teoría de la Señal y Comunicaciones de la Universidá d’Uviéu y que cunta col patrociniu d’Impulsa, tien l’oxetivu d’averar l’espaciu, los satélites y les telecomunicaciones a estudiantes nel mes de xunetu.

SensorSat Campus ye un campus tecnolóxicu empobináu a estudiantes de 4º de la ESO, 1º y 2º de Bachilleratu que tengan interés na ciencia y la tecnoloxía. P’averalos a esti fascinante mundu, proponse que construyan el so propiu prototipu de Cubesat para esploración espacial, bien cercanu a unu real. A lo llargo d’una selmana, los participantes van desenvolver un modelu de nano-satélite (CubeSat) con capacidá de midida de parámetros atmosféricos, allugamientu y fotografía, ente otros. Les actividaes que se van desenvolver tán basaes nos retos de l’Axencia Espacial Europea (ESA).

Non solo pretende ameyorase les conocencies técniques de los participantes, sinón tamién:

• Trabayar con hardware y software profesional
• Completar un proyectu trabayando n’equipu
• Aumentar  habilidaes como l’espíritu críticu y l’iniciativa
• Ampliar la visión del so futuru
• Faer  nuevos amigos.

En cada sesión van dase curties charres de 10-15 minutos, dexando la mayor parte del tiempu pal trabayu prácticu. En cada llaboratoriu va haber un máximu de 16 participantes (4 equipos) que van ser supervisaos y ayudaos por dos profesores. La páxina web el Campus ye: sensorsatcampus.wordpress.com

Va impartise nos llaboratorios de la Área de Teoría de la Señal y Comunicaciones mientres el branu en dos grupos: unu del 2 al 6 de xunetu y otru del 9 al 13 de xunetu.