Sociedá

L’ausencia d’una versión en llingua asturiana de la Constitución Europea, firmada el pasáu 29 d’ochobre en Roma, prende la protesta del asturianismu políticu. L’agrupación Izquierda Asturiana (IAS) acusa al Gobiernu autonómicu, nun comunicáu asoleyáu güei, d’inhibise na defensa de los intereses culturales d’Asturies y sostién que nun hai impedimentu llegal pa la entrega en Bruseles d’una versión del tratáu constitucional n’asturianu.

Con esi argumentu, IAS llamenta la “oportunidá perdida” y recuerda que la llingua asturiana ta presente na Carta Europea de les Llingües Minoritaries, un documente d’ámbitu comunitariu que-yos otorga especial protección a ciertos idiomes de la Unión Europea.

Asinamesmo, Izquierda Asturiana refuga les recientes declaraciones del presidente autonómicu de Cataluña, Pascual Maragall, quien obvió l’asturianu al citar les llingües qu’esisten nel Estáu, y amuesa la so disconformidá col recordatoriu que’l secretariu d’Estáu pa la Unión Europea, Alberto Navarro, fizo na entrega de les tornes de la Constitución a les llingües cooficiales, precisando qu’Asturies otórga-y al asturianu una atención especial, ensin da-y un estatus oficial.

A finales de setiembre, el propiu Navarro afitaba, nuna carta empobinada al conseyeru de Xusticia, Seguridá Pública y Relaciones Esteriores del Principáu, Francisco García Valledor, el deséu del ministeriu d’Esteriores de que l’asturianu seya oxetu d’una atención “especial” na UE pero negaba la posibilidá de consideralu como llingua oficial n’Europa.

Nes ellecciones xenerales del pasáu 14 de marzu, primeros comicios d’esti tipu a los qu’Izquierda Asturiana se presentó en solitariu, esta formación algamó 831 votos pa la so llista al Congresu, un 0,12 por cientu de tolos sufraxos emitíos n’Asturies. IAS concurrió a les ellecciones col envís declaráu d’echar a andar la so estructura de partíu, difundir les sos siegles y articulase como espaciu políticu de futuru.

Archivu. La falta d’oficialidá piéslla-y una nueva puerta al asturianu na Unión Europea

L’Ayuntamientu de Siero abre’l procesu pa seleccionar la persona que dirixirá el nuevu serviciu de normalización llingüística del conceyu. Un decretu asoleyáu güei pola Alcaldía fixa en doce el númberu d’aspirantes almitíos pa la plaza, dotada con un contratu a tiempu parcial y un salariu brutu mensual de 591 euros, y convoca les primeres prebes pal 17 de payares.

Un tribunal calificador nel que figuren representantes de la Oficina de Política Llingüística, l’Academia de la Llingua, políticos llocales y personal del propiu Ayuntamientu designará agora a la persona qu’ocupará el cargu, dientro d’un procesu xeneral de revitalización de la promoción del asturianu dende los conceyos nel que Xixón tamién ye protagonista.

Amás de tar a puntu d’incorporar un técnicu adicional a la Oficina Municipal de la Llingua depués de completar un concursu asemeyáu al qu’agora arranca en Siero, el conceyu gobernáu pola socialista Paz Fernández Felgueroso col sofitu d’Izquierda Xunida-Bloque por Asturies cellebrará ente’l 15 y el 17 de payares unes xornaes sobro normalización llingüística nos conceyos con participación d’espertos catalanes, gallegos, vascos, aragoneses y asturianos.

La contratación d’un responsable del serviciu de normalización llingüística en Siero realizaráse a la fin acordies con una subvención nominal concedida pola Conseyería de Cultura. En xunetu pasáu, la decisión d’esi departamentu de paralizar los convenios previstos con ayuntamientos pa crear nuevos servicios de promoción del asturianu y sustituilos por subvenciones concretes provocó reacciones alcontraes nos collectivos de defensa llingüística y nel propiu Gobiernu.

Amás del conceyu de Siero y les mancomunidaes de la Sidra y del Cabu Peñes, los municipios de Llanes, Mieres, Avilés, Cangas del Narcea, Samartín del Rei Aurelio y la mancomunidá de les Cinco Villes -integrada por Cuideiru, Muros, Pravia, Salas y Sotu’l Barcu- amosaron yá el so interés por crear les sos respectives oficines llocales de normalización de la llingua asturiana.

Resolución íntegra na web de l’Ayuntamientu de Siero

Carmen Ruiz-Tilve, Paloma Uría Ríos y Francisco Llera Ramo. Esos tres nomes propios marquen güei la cellebración en Villaviciosa de la II Xornada de la Fundación Caveda y Nava, que rinde homenaxe al escritor que-y da nome énte la so casa natal y analiza nuna conferencia la esistencia d’un fechu diferencial asturianu.

L’actu qu’abrirá el programa sedrá l’acoyimientu como nueves patrones d’honor de la Fundación, nel monesteriu de San Salvador de Valdediós, de Ruiz-Tilve, escritora y cronista oficial d’Uviéu, y de la profesora Uría Ríos. La primera d’ella tará presentada pola lliterata Berta Piñán, mientres que la figura de la segunda glosarála la narradora Carmen Gómez Ojea.

Darréu d’esi actu formal, cuyu empiezu ta previstu pa les 17 hores, los miembros de la Fundación tributarán-y un homenaxe al escritor Xosé Caveda y Nava -autor de la primer antoloxía de poesía n’asturianu, editada en 1839- na so casa de nacencia, en Villaviciosa.

Una conferencia’l caderalgu de Ciencia Política na Universidá’l País Vascu Francisco Llera Ramo completará los actos previstos na xornada, baxo’l títulu ‘Señes d’identidá: ¿Hai un fechu diferencial asturianu?’. Les cellebraciones cuenten col sofitu del Gobiernu’l Principáu y del Ayuntamientu de Villaviciosa.

Trabayadores del Ayuntamientu de L.lena recorrerán a partir de xineru los pueblos del conceyu pa recoyer los nomes tradicionales de llugar y les causes poles que se pierde la toponimia tradicional. Asina lo anunciaron representantes del conceyu depués d’asitiar esta mañana en Piñera Baxo el primeru de 35 cartelos indicadores n’asturianu, con bona acoyida por parte de los vecinos.

Tal como adelantó ayeri Asturnews, l’Ayuntamientu de L.lena destinará un total de 4.000 euros p’asitiar los cartelos d’entrada y salida de población en 35 ñúcleos, ente ellos la capital del municipiu, que quedará señalizada únicamente como ‘La Pola’. Al indicador afitáu esta mañana en Piñera Baxo siguirán otros nes llocalidaes de Piñera Riba, Corneyana, El Questru, Columbiel.lo y Fresneo, ente otres.

L’actu simbólicu de güei contó cola asistencia del edil d’Izquierda Xunida-Bloque por Asturies David Suárez, y tuvo presidíu pola conceyala l.leniega de Cultura, Paz García, quien precisó que l’Ayuntamientu buscará nel prósimu añu una ayuda económica del Principáu pa volver a retular en llingua asturiana la señalización del cascu urbanu de La Pola, que llegó a tar n’asturianu y agora figura otra vuelta dafechu en castellán.

La recuperación de la toponimia tradicional del conceyu, que l’Ayuntamientu considera un oxetivu prioritariu -editaráse un trípticu colos topónimos de L.lena tres del llabor de campu qu’entamará en xineru-, ta sufragada pola Alministración autonómica y foi supervisada pola Xunta Asesora de Toponimia del Principáu.

La comisión del Cultura de L.lena revisará esti mesmu mes la propuesta de la Xunta pa recuperar los nomes de llugar tradicionales del conceyu y empobinarála darréu al Plenu, pa qu’esti organismu eleve l’espediente al Conseyu de Gobiernu y los topónimos l.leniegos n’asturianu tengan plena validez llegal, amás de la validez ‘de fechu’ que propicien los cartelos qu’agora s’instalen.

Archivu. L.lena empieza en Piñera Baxo la recuperación de los nomes tradicionales de llugar del conceyu

L’usu de la llingua asturiana na vida cotidiana algama un valedor cualificáu nos tribunales. L’asociación Oficialidá tien yá en marcha el primer serviciu xurídicu abiertu y de baldre pa defender énte’l xuez los drechos llingüísticos de los asturfalantes, una prestación que s’estrena con casos vinculaos al drechu mercantil y a la Educación pública.

Col sofitu técnicu de varios despachos d’abogaos, los responsables d’Oficialidá trabayen en dos frentes: algamar la reconocencia del asturianu na inscripción de sociedaes nel rexistru mercantil y garantiza-yos a los estudiantes de Secundaria el drechu efectivu a cursar l’asignatura de Llingua Asturiana, asuntu pol que la Xunta pola Defensa de la Llingua mantién convocada una fuelga nos institutos pal prósimu miércoles.

Cola puesta d’asistencia d’abogáu de baldre a disposición de cualquier ciudadanu qu’entienda que nun se respeten los sos drechos llingüísticos como falante d’asturianu, el collectivu Oficialidá quier cumplir l’oxetivu central col que l’asociación se presentó en xunu pasáu -defender l’usu cotidianu de la llingua asturiana- y facilita-yos a los ciudadanos un instrumentu que, nestos términos, nun esistía.

De forma paralela, Oficialidá mantién abierta una negociación con responsables del grupu bancariu Sabadell, propietariu’l Bancu Herrero, pa qu’esa entidá introduza l’asturianu ente les llingües que se puen emplegar na so rede de caxeros automáticos. Según confirmaron representantes de l’asociación, la prósima xuntanza cellebraráse n’Uviéu la selmana qu’entra.

La Mesa pola Normalización Lingüística do Galego entamó hai una selmana una campaña asemeyada a la que plantega Oficialidá p’alitar a los ciudadanos a domiciliar la so nómina nes entidaes bancaries qu’utilicen con normalidá el gallegu nes sos operaciones, recibos, publicidá ya imaxe corporativa.

Web de l’asociación Oficialidá

L.lena recupera los sos nomes de llugar. Los conceyales de Cultura y Obres d’esi municipiu, Paz García y Celso Lombraña, respectivamente, asitien na llocalidá de Piñera Baxo, nel valle’l Güerna, el primeru de 25 cartelos indicadores de población en llingua asturiana qu’oficialicen de fechu los topónimos tradicionales del conceyu y culminen el llabor de la Xunta de Toponimia.

Al allugamientu del primer cartelu, previstu pal mediudía del sábadu, va sigui-y la colocación d’otros indicadores d’entrada y salida en población únicamente en llingua asturiana, incluyida la capital del conceyu, que figurará únicamente como ‘La Pola’.

Según precisó una vocera del Ayuntamientu de L.lena, ente los pueblos que tendrán de forma inminente los sos cartelos figuren Piñera Riba, Columbiel.lo, El Quempu y Vil.layana, y dellos de los ñúcleos que van ser señalizaos son poblaciones qu’hasta agora nun teníen indicada la so entrada y salida, nin siquiera en llingua castellana.

La midida del Ayuntamientu de L.lena, que cuenta con un serviciu propiu de normalización llingüística, afítase nun presupuestu de 4.000 euros sufragáu pola Alministración autonómica y executaráse de forma completa nes prósimes selmanes, col envís de caltener la toponimia tradicional del conceyu.

La Xunta Asesora de Toponimia del Principáu cellebró el pasáu 14 d’ochobre una xuntanza monográfica en La Pola na que remató l’espediente toponímicu de L.lena. Al acabar esa reunión, el director de la Oficina de Política Llingüística, Ramón D’Andrés, sorrayó la exemplaridá y bona disposición de les autoridaes del conceyu pa entainar la corrección de la toponimia llocal.

Archivu. L.lena entama la normalización de los nomes tradicionales de llugar del conceyu

Pallabres de teyeru, d’artesanu o d’albarderu ambulante. Espertos en llingüística recuperen a partir de mañana n’Avilés les xírigues gremiales de la cornisa Cantábrica col Camín de Santiago como filu conductor, dientro de les III Xornaes sobre Llingües Gremiales que se cellebren na Casa de Cultura de la villa. Ente los ponentes figuren Fernando Gomarín, Álvaro Valdés y Xuan Xosé Sánchez Vicente.

Esti últimu presentará mañana al públicu, a les 17 hores, un llibru del que ye autor y nel qu’analiza les xírigues documentaes nel ámbitu xeográficu d’Asturies, de la que ye másimu esponente, ente otres, la variedá idiomática singular falada polos teyeros del oriente asturianu.

Amás de dar a conocer esta obra, les xornaes avilesines valdrán tamién d’escenariu de presentación, a les 13 hores, d’un trabayu qu’estudia la xíriga de los vendedores y albarderos ambulantes de la comarca lleonesa de Fornela, el burón, y disertarán previamente sobro el bron, la xíriga propia de los caldereros.

La fala de los canteros tará asinamesmo presente na xuntanza, con una intervención de Fernando Gomarín y Fátima Carrera al rodiu d’esa variedá llingüística en Cantabria. Celina Pérez Melero y Xosé Antón Fidaldo pesllarán el sábadu les intervenciones con sendes conferencies, respectivamente, sobro les xírigues de los artesanos madereros de Peñamellera y de los collectivos ambulantes gallegos.

Les III Xornaes de Llingües Gremiales, alitaes pol párrocu de Miranda y estudiosu de la tradición oral, José Manuel Feito, cuenten col sofitu del Ayuntamientu d’Avilés y permiten l’accesu llibre y de baldre a toles sesiones.

La Conseyería de Cultura tendrá más recursos económicos p’afrontar 2005. El departamentu que dirixe la socialista Ana Rosa Migoya beneficiaráse del mayor aumentu porcentual contempláu nos Presupuestos autonómicos pal añu qu’entra, cuyu proyectu aportará el llunes a la Xunta Xeneral pa la so tramitación. Cultura manexará un 17,3 por cientu más de fondos que nel exerciciu d’esti añu.

Esi porcentaxe supón el mayor incrementu de toles conseyeríes que conformen el Gobiernu autonómicu, inmediatamente per delantre de la xuba de la que van beneficiase los departamentos de Xusticia, Seguridá Pública y Relaciones Esteriores (13,3 por cientu) y de Vivienda y Bienestar Social (12,6 por cientu), dambos gobernaos por Izquierda Xunida-Bloque por Asturies.

Según informó esti mediudía n’Uviéu el conseyeru d’Economía, Jaime Rabanal, depués de la cellebración del Conseyu de Gobiernu’l Principáu, el presupuestu autonómicu pa 2005 ye un 7 por cientu superior al d’esti añu y supón un 18 por cientu del Productu Interior Brutu (PIB) de la comunidá autónoma.

Na mesma xuntanza na que l’Executivu alcordó empobinar el proyectu de presupuestos a la Xunta Xeneral, pa que’l documentu cobre valor llegal cola aprobación del Parlamentu autonómicu, el Gobiernu asturianu dio-yos lluz verde a dos nueves empreses públiques: una sociedá pa la promoción del Principáu nel esterior y una segunda entidá denominada Xestión d’Infraestructures Públiques de Telecomunicaciones del Principáu.

Esti organismu xestionará les redes de banda ancha y de fibra óptica de titularidá autonómica, con un capital social de 150.000 euros y l’envís de crear y esplotar redes de telecomunicaciones.

Cuideiru, Muros, Pravia, Salas, Sotu’l Barcu y Samartín del Rei Aurelio. El director de la Oficina de Política Llingüística del Principáu, Ramón D’Andrés, mantién contactos con representantes d’esos seis ayuntamientos -los cinco primeros axuntaos na Mancomunidá de les Cinco Villes- pa estudiar la creación de nuevos departamentos llocales de promoción del asturianu.

Según confirmó D’Andrés, tanto los conceyos del llitoral occidental como’l municipiu de la cuenca’l Nalón amosaron el so interés pola posibilidá d’echar a andar sendos servicios de normalización, una iniciativa na que yá trabayen -nos sos respectivos ámbitos- los ayuntamientos de Llanes, Mieres, Avilés y Cangas de Narcea.

Talu interés cuadra col plantegamientu del director de la Oficina de Política Llingüística pal presente cursu políticu, nel qu’esi departamentu contará con un aumentu presupuestariu d’un 20 por cientu que D’Andrés quier empobinar básicamente a sufragar la normalización del asturianu nos conceyos: Esa ye la “prioridá absoluta”, en pallabres del titular de la Oficina Política Llinguística.

Ramón D’Andrés asistió esta mañana n’Uviéu a la presentación de los cursos d’asturianu que’l Gobiernu autonómicu imparte a partir de güei, en comuña cola Academia de la Llingua, en centros d’emigrantes allugaos en Madrid y Chile.

L’Axencia Asturiana de Cooperación al Desarrollu, dependiente de la Conseyería de Xusticia y Esteriores, acaba d’imprentar el so Plan Cuatriañal col envís de remitilu a les organizaciones y colectivos que collaboren coles actuaciones d’esti departamentu autonómicu. Les acciones encarrilaes pola Axencia tienen el doble fin d’ufiertar ayuda humanitaria a les poblaciones víctimes de catástrofes naturales o provocaes por gobiernos y al empar a favorecer el desenvolvimientu económicu y social de países con crisis estructurales.

El Plan Cuatriañal qu’agora se publica aprobóse nel Conseyu Gobiernu del Principáu el 15 d’abril de 2004 y supón el marcu de referencia global enriba de cuyos principios oriéntase la política de cooperación de l’Administración Asturiana colos pueblos más desfavorecíos del mundu. Les modalidaes d’actuaciones nes que s’articula el Plan son tres: un programa de proyectos de desarrollu, otru empobináu a l’ayuda humanitaria y un tercer plan destináu a llabores d’educación y sensibilización. Ente les prioridaes qu’establez l’Axencia de Cooperación pa orientar los proyectos patrocinaos tán les de considera preferente l’atención a les poblaciones con menos nivel de desenvolvimientu y a aquelles que caltienen cola nuestra comunidá vínculos hestóricos, culturales o d’amistá. En cuantes a los conteníos de los proyectos valoraránse aquellos que contribuyan non namás a les atenciones primaries de les poblaciones afectaes sinón los qu’amás incidan na igua de les situaciones de desigualdá social o econónica, asina como les actuaciones encarrilaes a educar y atender a la población en materia de salú y midíes sanitaries preventives.

Los dos exes pelos que se desenvuelven les actuaciones propuestes pola Axencia son la cooperación institucional con entidaes públiques territoriales y organismos internacionales, y per otru llau la cooperación de convocatories públiques. El Plan Cuatriañal contempla actuaciones temporalizaes dica 2007.