Sociedá

El BOPA del 12 d’agostu del 2010, espubliza la resolución de la Conseyería de Cultura y Turismu pola que se conceden y denieguen subvenciones a entidaes locales pa la normalización social del asturianu y del gallego-asturianu.El testu pue consultase yá na web del Gobiernu d’Asturies.

Llistáu completu de los proyectos aprobaos y denegaos

El Tendayu del Muséu del Pueblu d’Asturies acoyó los díis 15 y 16 d’agostu una serie d’actos promocionales del ‘Vinu de la Tierra de Cangas. Vinu d’Asturies’ que resultaron un éxitu de participación. Munchos de los visitantes que s’averaron a la Feria Internacional de Muestres d’Asturies (FIDMA) nun dexaron pasar la oportunidá de conocer de primer mano esti productu tan propiu d’Asturies como la sidre y el quesu que pronto va algamar la Denominación d’Orixe Protexida, y tomaron parte nes actividaes entamaes pola Fundación Asturies XXI, ente les que destacaron les tasties guiaes.

D’esta forma, los presentes pudieron prebar les escelencies d’esta bébora tradicional del suroccidente asturianu y beber el vinu en ‘cachu’, cuencu maera que se llena de vinu y se comparte, apurriéndolu de mano en mano. Pa ello, la organización contó cola collaboración de les Bodegues de Pesgos y Monasterio de Courias, qu’ofrecieron el so productu escelente a los presentes, y d’un cunqueiro (Busgosu), qu’ellaboró los tradicionales ‘cachos’ en direutu.

El Vinu de la Tierra de Cangas nun foi’l protagonista únicu de les dos xornaes, puesto que nel recinto tamién hubo sitiu pa otros productos de la zona como los Licores- Paladín, de Cangas, y la Miel de Asturias, de La Puela (Ayande). Toles actividaes contaron cola amenización de la música de la Banda Gaites de Noreña.

El I Certame del Vinu de Calidá de Cangas, nome que recibieron los eventos celebraos n’El Tendayu del Muséu del Pueblu d’Asturies, foi, polo tanto, un éxitu y la intención de la Fundación Asturies XXI ye la de repetir esperiencia l’añu qu’entra. Igualmente, esta entidá quier agradecer la collaboración de la Conceyalía de Cultura Tradicional y Llingua Asturiana y del Muséu del Pueblu d’Asturies, asina como de l’alcaldesa de la ciudá, Paz Fernández Felgueroso, que tuvo presente na presentación d’esti certame de promoción del ‘Vinu de la Tierra de Cangas. Vinu d’Asturies’.

La Plaza Toros d’El Bibio, en Xixón, vivía ayeri la xornada cabera de la Fiesta de Begoña 2010. Cientos de persones concentráronse a la puerta del cosu pa reclamar la fin d’esta actividá n’Asturies. Anque nun se vivieron incidentes graves, la tarde foi tensa. Aficionaos a los toros y antitaurinos tuvieron provocándose, viviéndose momentos de tensión ente dambes partes. Ente les organizaciones convocantes taben l’Asociación Nacional Animales con Derechos y Libertad (ANADEL) y el Bloque por Asturies, cuntando con presencia de militantes d’otres formaciones nacionalistes.

La mayor parte de los aficionaos pasaben ensin contestar a los glayíos de los antitaurinos. Sicasí, dellos aficionaos respondieron con xestos y glayíos, llegando a producise dalguna engarradiella ente dambos grupos, que respondíen a les provocaciones de forma recíproca.

La Policia fizo por controlar la situación, teniendo qu’apartar a taurinos, qu’esaltaos, enfrentábense y tirábense escontra’l grupu de manifestantes. La estratexa posterior foi la de pesllar la parte delantera de la concentración, faciendo pasar a los taurinos per detrás de la mesma, qu’acabó arrodiando’l pasu de los aficionaos a los toros, provocando más problemes de los qu’esistíen nun entamu, yá que los defensores de “la fiesta” habíen pasar al traviés d’un pasiellu creáu polos antitaurinos, onde atopaben xiblíos, glayíos y dellos insultos de parte del grupu concentráu.

Asturnews ufre un reportaxe fotográficu de la manifestación.

El conceyu de Saberu, asitiáu al surestes d’Asturies, yá en territoriu de Lleón, va acoyer la celebración de la quinta edición de les Xornaes en Defensa del Patrimoniu Hestóricu y Cultural de la cuenca de Saberu, entamaes polos Amigos del Muséu Mineru-Ferrería de San Blas. L’alcuentru va dedicase nesta ocasión al estudiu de la filoloxía asturiana, con especial atención pa la fala llocal.

Güei, martes 17, a les siete y media la tarde, va celebrase la conferencia «Un patrimoniu común de asturianos, lleoneses, zamoranos y tresmontanos: la llingua asturlleonesa güei», a cargu de Fernando Álvarez-Balbuena García, Llicenciáu en Filoloxía Hispánica y profesor del Departamentu de Filoloxía Clásica y Románica de la Universidá d’Uviéu.

Na segunda xornada, que se celebra mañana miércoles, representantes de La Caleya, Facendera y Furmientu van falar de «Las asociaciones para la defensa de la llingua llionesa: su razón de ser», falando darréu Nicolás Bartolomé Pérez de «La lliteratura popular oral llionesa». Les xornaes van rematar darréu cola presentación del documental “Asina Falamos”.

Esti xueves 12 d’agostu, a les 18:00 hores, nel I.E.S. Cangas del Narcea, ta prevista una conferencia a cargu de José Ramón Morala Rodríguez profesor de la Universidá de Lleón sobre «cuestiones dialeutolóxiques al sur del dominiu», dientro de les Actividaes Abiertes programaes na Universidá Asturiana de Branu (UABRA).

En Xixón, y según informen dende l’Arribada, va entamar esti añu la Vagamar. Sedrá’l viniente 18 de setiembre y acabará’l 25 del mesmu mes, cola escepción dientro de les sos actividaes d’una esposición, dedicada a la cerámica negro de Miranda, que tará abierta del 20 de setiembre al 15 d’ochobre. Per otra parte, la Rolda, nueva estaya del certame, entamó la so programación el pasáu 30 d’abril, tuvo una actividá’l 2 de xunu, y programará más actividaes nel últimu trimestre del añu.

En Corvera L’Arribada cuntará con dos xornaes, los díes 5 y 6 d’ochobre, en Colunga fadráse’l 5 de payares, mientres qu’en Villaviciosa, que tuvo yá una xornada esti añu, entamaráse un segundu programa pal 27 de payares.

La presentación del programa de conciertos del Día oficial del país, que va celebrase esti añu en Ribeseya, xeneró protestes de colectivos venceyaos al mundu de la música asturiana, partíos políticos asturianistes y xente de la cultura. L’apaición nel mesmu de músicos de fuera d’Asturies, como Isabel Pantoja, Rosa, Chenoa o Daniel Diges, nun presta a munchos asturianos, que ven más conveniente qu’un día como esi, dedicáu a celebrar l’arguyu de ser asturianos, tea amenizáu por músicos del país.

Bloque por Asturies camienta les actuaciones “escandaloses”, anque nel programa tamién pueden atopase voces asturianes, como ye’l casu del Coru La Fuentina, Lilián de Celis, Xideces, Llacín, Spanta la Xente, Corquiéu, Pablo Moro, Apoderó, Manolo Penayos, l’Orfeón de Mieres y Xera.

El Vicerrectoráu d’Estensión Universitaria, Cultura y Deportes de la Universidá d’Uviéu organiza nel Edificiu Hestóricu de la Universidá una conferencia titulada “La innovación nes Enerxíes Anovables”, que va impartir Andrés Capo de Benito, Xefe d’I+D+i/R & D Manager d’Inxeniería y Diseñu. La conferencia va celebrase’l llunes 9 d’agostu, de magar les 12:30 hores.

La Sociedá Uviedina de Festexos organiza esta fin de selmana, 7 y 8 d’agostu, delles actuaciones folclóriques nel Cascu Antiguu. El sábadu dende les 11,30 y hasta les 14,30 hores, van producise les actuaciones de la banda de gaites “Naranco” d’Uviéu y el grupu de baille rexonal del Centru Asturianu”.

El domingu, nes mesmes cais, y a la mesma hora, van actuar la banda de gaites “La llaguna del Torollu” de San Cloyo y l’asociación folclórica “El Castiellu” d’Olloniegu.

El Bloque por Asturies va falar esti miércoles en La Escuela Municipal de les Artes de la problemática cultural y llingüística que carez Asturies. La conferencia forma parte del viaxe institucional del miembru de la dirección nacional y responsable de movimientos sociales y formación, Nacho González, per Chile y Bolivia.

El convite ye de les instituciones bolivianes na ciudá de L’Alto. Esta ye una ciudá apegada a la capital La Paz y que tien una población de más d’un millón de persones, de les que más del 80% son falantes de quechua y aimara. L’interés de les instituciones bolivianes ye conocer de primer mano la realidá cultural y llingüística d’Asturies y intercambiar esperiencies.

Esta ciudá ye conocida a nivel mundial pola fuerza de los sos movimientos sociales na reivindicación de los sos derechos políticos, económicos, sociales y culturales. D’ellí surdieron les protestes más grandes que ficieron que dimitiera’l presidente de la república de Bolivia Sánchez de Lozada, nel añu 2003.

Amás d’esta conferencia, el Bloque da anuncia de que González sigue cola axenda de reuniones y contactos con responsables políticos, institucionales, sindicales, universitarios y movimientos sociales de Bolivia depués de facelo estes selmanes atrás colos de Chile.