Sociedá

La parroquia de Llastres, en conceyu Colunga, algamó esti vienres el nome de Pueblu Exemplar 2010, al apautase nello’l xuráu de los Premios Príncipe d’Asturies d’esta edición.

El xuráu destacó l’espíritu de superación, respetu a les tradiciones y capacidá d’asociación al traviés de les cofradíes d’esta parroquia y villa marinera del conceyu de Colunga, con una población que ronda’l millar d’habitantes, repartíos ente los pueblos de Llastres y Lluces, que conformen la parroquia.

Los orixes de Llastres alcuéntrense en dómines de la invasión romana y el primer testimoniu escritu sobre esti asentamientu data del añu 943.

Nun duru comunicáu, nel que se critica la postura de la Dirección Xeneral de Política Llingüística y del Conceyu de Mieres, l’Asociación de Trabayadores de la Normalización Llingüística, asoleya la so esmolición pola falta dafechu de procuru pa cola continuidá del trabayu que se desendolca en delles Oficines de Normalización nos conceyos, de la que Mieres, qu’acaba pesllar temporalmente otra vuelta, ye un exemplu nidiu.

Nesi comunicau, qu’asoleyaren esti martes pela mañana, dizse que “va casi pa ocho años desque s’abrieron los primeros servicios de normalización nos conceyos d’Asturies. Años nos que dende l’Asociación de Trabayadores de la Normalización Llingüística trabayamos por buscar soluciones a la inestabilidá llaboral y a la temporalidá de dellos SNL, presentando propuestes a la Dirección Xeneral de Política Llingüística pa iguar esta situación. La respuesta nestos últimos años foi la d’ignorales y nun dar soluciones a los problemes que venimos denunciando”.

El motivu del comunicáu ye que “esti mes, el Conceyu Mieres volvió pesllar el Serviciu de Normalización esperando la llegada de la financiación del 2011 que la Conseyería supuestamente va dar. Nun entendemos cómo unos Conceyos, contando cola mesma financiación, caltienen el SNL abiertu tol añu mientres que’l de Mieres sufre añu tres añu la desconsideración, dexadez y falta de compromisu de los/les responsables municipales y, al empar, del Principáu d’Asturies.

Según asoleya nesta Nota de Prensa l’Asociación, “la Dirección Xeneral de Política Llingüística tien de garantizar que los SNL puedan desenvolver el so trabayu nunes condiciones estables y dignes. El métodu pol que se financien estos servicios ye claramente insuficiente y nengún añu garantizó la continuidá de tolos SNL y eso ye demostrable, basta con mirar pa lo que vien pasando munches veces nel Conceyu Mieres y n’otros”.

Por mor d’esto, nesta Asociación nun sons a entender “cómo ye posible que la Dirección Xeneral de Política Llingüística conceda subvenciones pa los SNL y nun garantice’l so funcionamientu l’añu enteru y nin siquiera lleve un control de cuála ye la política lllingüística que se desenvuelve nesi Conceyu. El pieslle del SNL de Mieres tien un problema añadíu y ye que nestos meses los SNL desenvuelven y diseñen toles campañes empobinaes a la normalización del asturianu. ¿Quién va desenvolver esi trabayu?, ¿hasta cuándo va tar peslláu?, ¿qué va pasar coles perres que yá públicamente nel BOPA se sabe tán destinaes a cubrir estes campañes?, ¿cómo va xustificales un conceyu que tien zarráu’l serviciu encargáu de facelo?”.

Pa los trabayadores de les oficines de normalización, “los conceyos tienen una responsabilidá evidente nel pieslle del SNL, pero la Conseyería, que ye la que financia’l SNL, tien una responsabilidá mayor, por ser l’organismu que xestiona esti dineru públicu y que tien el deber de controlar el so gastu y evitar la so malversión. Ye vergonzoso que nel mes de setiembre pieslle un SNL, porque se ta interrumpiendo’l trabayu pola normalización y dignificación de la llingua asturiana, pero más vergonzoso ye que la Dirección Xeneral de Política Llingüística nun dea soluciones, cuando de continuo pretenden vendenos el so apueste pola normalización.

Dende l’ATNL tiense “un conceptu diferente de normalización al de la DXPL: la normalización ye’l mediu pel que consiguir un fin, la dignificación del idioma d’Asturies; pa la Dirección Xeneral de Política Llingüística paez ser que, en cambiu, la normalización consiste en xestionar perres públiques ensin control nengún sobre la so inversión efectiva nesta mesma xera”.

Na entrega de diplomes de los cursos de la Universidá Asturiana de Branu, celebrada esti vienres na capital asturiana, Vicente Gotor, rector de la Universidá d’Uviéu, recordó la “perbona collaboración ente Universidá y Academia de la Llingua Asturiana”. El Rector qu’entamó’l so discursu n’asturianu, disculpóse darréu “el mio asturianu ye tovía incipiente” ya improvisó un discursu nel qu’esplicó les acciones llevaes a cabu pola so alministración al frente de la institución y pidió la unidá de los asturianistes. “Esti equipu de gobiernu, nos dos años llargos que lleva fizo más pol asturianu que cualesquier otru na Universidᔠrecordó Gotor.

Sobre’l llabor académicu dixo “collaboramos col profesoráu correspondiente pa que per primer vegada la Universidá d’Uviéu tenga estudios reglaos d’asturianu en Filoloxía, en Maxisteriu y nel Master de Secundaria”, lo que calificó como “un pasu mui importante”, reconociendo “que munchos pensaran que se podríen dar más creitos”. Pa Gotor “que l’asturianu tenga’l protagonismu que se merez nos nuevos graos ye bien importante”. Dende’l Rectoráu “vamos siguir apoyando la llingua asturiana, como taba nel nuesu programa electoral, anque paez qu’a dalgunos tamos defraudándolos porque la Universidá nun pue oficializar l’asturianu, pero lo que tamos faciendo y vamos siguir faciendo pol asturianu espero que seya entendío”.

Sobre les estremaes estayes de la normalzación, recordó la presencia nel gobiernu de so, de dos vicerrectores “asturianistes de pro”, que taben presentes nel actu d’esti vienres. El vicerrector d’Investigación, que dixo, “apoya la investigación a tolos grupos que faen investigación n’asturianu, con namás una condición, que seyan escelentes”. Sobre’l vicerrector d’Informática y el Director d’Area d’Investigación, “influyeron muncho en que tengamos una páxina web multillingüe, n’asturianu, inglés y castellán, como foi una promesa electoral”. El rector recordó “a munchos detractores del asturianu nun-yos gustará, pero nós tenemos la idea clara”.

Sobre los plazos nos que se tán tomando les midíes de normalización del asturianu “creo que llegamos a tiempu, anque se podríen facer les coses enantes”, escusándose na “situación actual de crisis”.

“Tamién nos comprometimos a la visibilidá del asturianu” dixo Gotor. “Vamos dir a poco y a poco. Agora, col reordenamientu de centros, espero que podamos tener duplicidá de nomes castellán y asturianu”. Recordó’l Rector tamién que “na tienda de la Universidá hai munchos oxetos rotulaos n’asturianu y vamos siguir apoyándolo indudablemente”.

Vicente Gotor pidió na so intervención “unión”: “La xente que trabaya nel asturianu nun ye muncha y tenemos que dir pel mesmu camín, tenemos que trabayar xuntos, pa qu’esta llingua tenga cada vegada más visibilidá na sociedá asturiana”. “La cultura asturiana ye importantísima como seña d’identidá pa tolos asturianos”, a lo que’l cabezaleru universitariu añadió “y dizlo una persona que nun ye asturiana de ñacencia pero que si lo ye de devoción”.

El sindicatu SUATEA asoleyó esti día un comunicáu nel que atalanta que’l Día d’Asturies 2010 nun ye sinon el camudamientu de l’Asturies de gaita y tambor a la de charanga y pandereta.

Sigún el sindicatu, “en toos estos años teníenmos avezaos a un folixeru día d’Asturies onde se tiraba la casa pela ventana a lo grandono: música perdayuri, pinchos de tortiella a fartar, conciertos de vieyos rockeros y cantautores amigos de la tortiella, mercaos astures, restallos y fueos artificiales. Si a esta mestura lo tresnabes con unes pingarates de sabor aborixen a base se sidra, xuegos de bolos y, escepcionalmente, por ser fiesta, un migayín de la llingua nativa nos programes, salía too de tambor y gaita. Pero aportó la crisis y esti añu hebo qu’optimizar recursos y buscar nueves fórmules: quitaron el tastu oriundu (el bable, sidra, bolos…) y la folixona tresfórmóse nuna gala. La gala ye más universal, televisiva y un productu audiovisual esportable a provincies si ye menester. Cuenta col aval del ésitu d’una estrella del pop español y universal ( La Pantoh.a) promovida por un gran xestor cultural responsable de los programes casposos del tardofranquismu televisivu de los años 70 y 80 y de la empresa d’espectáculos contratada pol gobiernu d’Asturies que rexirá la programación cultural de la Llaboral. L’antigua y nueva fórmula compleméntase col furmientu nacional-católicu de la misa televisada dende Cuadonga con participación institucional asturiana, y yá tenemos el ranciu paradigma cultural y políticu del prensente y futuru d’Asturies que promueve’l gobiernu Asturianu: Charanga y Pandereta”.

En SUATEA dicen camentar “qu’hai qu’acabar con esta situación de decadencia cultural que tien la so correspondencia nel terrén econónmicu, social, políticu y llaboral con ERES qu’afecten a más de 3000 persones, cierres d’empreses, recortes graves en tolos sectores y especialmente nel públicu onde per primer vegada nes últmes dómines se merma’l sueldu de los trabayadores, aumentu la edá de xubilación, previsión del copagu sanitariu, privatización del sector públicu, marxinación de tolo que suene a identidá asturiana … Y pa ello dende’l nuestru ámbitu sindical: * Pidimos el caltienimientu y potenciación del sector y los servicios públicos. * Desiximos salarios y pensiones dignes pa tolos trabayadores * Desiximos la declaración de la OFICIALIDÁ de la Llingua Asturiana y el Gallego-asturianu, como única ferramienta llegal que garantiza’l respetu efectivu de los derechos llingüísticos de tolos asturianos y asturianes, y favorez la sobrevivencia de la nuesa llingua y cultura. * Desiximos que les places de Llingua Asturiana y Gallego-Asturiano pasen a formar parte de les plantiyes orgániques de los centros, la creación de la especialidá y la convocatoria d’oposiciones. * Desiximos que’l currículu d’Educación Infantil recueya la nuestra llingua y que demientres nun lo faga s’atiendan toles demandes d’escolarización nesta etapa fundamental pal deprendimientu en xeneral y el llingüísticu en particular. * Pidimos que nos centros s’axeiten Planes Llingüísticos que dean un tratamientu integráu y coordináu de toles llingües que s’enseñen y onde la nuestra llingua seya vehicular en delles aries. * Facemos un llamáu a la sociedá asturiana y a la Comunidá Educativa en particular pa que participe na concentración convocada pola Plataforma Unitaria 8 de setiembre que se celebrará’l día 8 de setiembre de 2010 a les 12:30 nos xardinos d’El Nautico de Xixón.

Según informaciones del diariu El Comercio, l’Academia de la Llingua Asturiana podría treslladase esti mesmu mes a la so sede nueva, asitiada nel Monesteriu de Les Pelayes. La Conseyería de Cultura anunció’l treslláu dende la cai Marqués de Santa Cruz pa los meses del branu, pero a la fin retrasóse hasta esti mes.

L’Academia va compartir espaciu col almacén del Muséu Arqueolóxicu, nun espaciu total d’850 metros.

Bien poco llucíu foi l’estrenu del Sporting na lliga de les estrelles. El primer partíu na so hestoria nel que l’equipu playu llevaba impresu, anque de forma discreta nel pantalón, el topónimu Xixón, agora oficial, xunto a la deformación castellanizada del mesmu.

L’equipu, que s’enfrentaba al Atléticu de Madrid, perdió por cuatro goles a cero, cola so tercera equipación, de color prieto.

La publicidá fecha pol Conceyu de Xixón nes camisetes del Sporting tien un costu de 2.050.000 d’euros. El club ha usar el nome de la ciudá na so equipación hasta 2013, comprometíendose amás a organizar un partíu añal del qu’han donase los fondos consiguíos a los clús base de la ciudá, amás de 200 entraes por partíu.

UNA-Uviéu quier amosar el so refugu a la xuba del bonobús porque ye una midida qu’afecta de forma directa a les persones con más necesidaes y tamién a munchos estudiantes, que lo precisen diariamente pa movese pela ciudá.

Unidá Nacionalista Asturiana pide al Conceyu d’Uviéu que nun aproveche la marcación actual de crisis y el contestu de recorte de derechos sociales per parte de los gobiernos central y autonómicu, “pa ingresar dineru nes arques municipales. UNA esixe al Conceyu d’Uviéu y al so Alcalde una forma d’actuar acordies a lo que tendríen de representar, un organismu públicu al serviciu de los ciudadanos y nun actuar como un ente priváu que namás piensa nos beneficios”.

D’igual miente UNA recuerda que nos autobuses d’Uviéu nun ye válida la tarxeta prepagu del Consorciu de Tresportes d’Asturies, “obligando a los usuarios a pagar dos bonos pa usar el bus y el tren respectivamente”. Pa cabu UNA califica de “sida barata” les declaraciones del conceyal Alberto Mortera, “nes qu’afirma que’l déficit del Conceyu y la crisis son les causes pa xubir el preciu del billete, cuando les contrataciones pola Zarzuela xuben a más 800.000 euros. De poco nos val a les uvieínes y los uvieinos la Zarzuela si nun podemos pagar el billete pa dir vela”.

Darréu d’esto, UNA-Uviéu pide-y al Conceyu que nun estruma a los ciudadanos pa pagar los gastos de la so mala xestión y de una crisis xenerada pola especulación y l’avaricia del sistema capitalista.

Consumir bebíes con alcohol ente una y dos veces al día reduz cuasi a la metá’l riesgu de morrer en persones mayores de 55 años, en comparanza colos astemios, según los resultaos d’un estudiu realizáu pola Universidá de Texas (Estaos Xuníos) y espublizada na revista “Alcoholism: Clinical & Experimental Research”.

La investigación cuntó cola participación de 1.824 voluntarios (1.142 homes y 682 muyeres) ente 55 y 65 años que, por 20 años, fueron estudiaos sigún la cantidá d’alcohol inxerío, dellos factores sociodemográficos y la so salú xeneral.

La pensión media de xubilación algamó n’agostu los 932,97 euros mensuales nel Principáu d’Asturies, lo que supón un xorrecimientu del 3,1 por cientu frente a 2009, según datos espublizaos del Ministeriu de Trabayu ya Inmigración, que se ficieren públicos esti día.

El númberu de pensionistes na comunidá allúgase en 294.859 nesti mes d’agostu lo que supón medrar un 0,4 por cientu en comparanza con hai un añu.

N’España, la pensión media de xubilación yera nesti agostu de 886,40 euros mensuales.

El Partíu Carlista d’Asturies informó de la celebración d’un funeral na alcordanza de Carlos Hugo de Borbón Parma, pretendiente carlista de la corona española fináu apocayá. La ceremonia ye’l vienres 27 d’agostu a les 18 hores nel Santuariu del Santu Cristu de les Cadenes (Avenida del Cristu, 99, Uviéu.