Sociedá

El Gremiu d’Editores escoyía estos díes a la so directiva nueva, dempués de la demisión, va meses, de la presidenta, Marta Magadán. La nueva cabezalera de la organización llibrera ye Ángela Sánchez Vallina, llicenciada en Drechu y cofundadora la editorial Pintar-Pintar. Inaciu Iglesias, d’Ediciones Trabe y Publicaciones Ámbitu, foi escoyíu vicepresidente.

Como vocales del Gremiu apaecen agora Marta Magadán, de Septem Ediciones, César García Santiago, d’Ediciones La Cruz de Grau.

L’Institutu de Cangas del Narcea sirvió d’espaciu esti llunes pa la inauguración de la nueva plataforma d’enseñu de l’Academia de la Llingua Asturiana, la Universidá Asturiana de Branu (UABRA), na que s’inxerten los sos tradiciones Cursos de Branu, y delles actividaes más. Abrió l’actu, Xosé Antón González Riaño, director de los cursos, que saludó a los alumnos y profesores, y comentó dalgunos de los puntos esenciales del funcionamientu de la UABRA. Darréu garró la pallabra Ana Cano, presidenta de l’ALLA, que declaró que la intención de la institución a la hora de crear la UABRA, ye la d’ufiertar un espaciu pa la “tresmisión de la realidá social y la cultura asturiana, con un compromisu cola llingua asturiana”.

Cano anunció que Cangas va ser la sede permanente de la UABRA, “anque nun se descarta llevar dalgunos cursos o actividaes a otros llugares, como Ibias”. La Presidenta esplicó los conteníos curriculares de los cursos y recordó que van dir “anovándose y poniéndose más cursos según les posibilidaes de l’Academia”. Les nueves actividaes, como conferencies y esposiciones, busquen, según espresó Ana Cano, “abrise a la sociedᔠamás de “demostrar que la oficialidá, -la nuesa primer meta- ye posible”.

La cabezalera de l’ALLA, quixo agradecer la posibilidá d’entamar esti proyectu “ilusionante”, a la Universidá d’Uviéu y al Conceyu de Cangas, amás d’a otres persones venceyaes a la organización de la Universidá Asturiana de Branu.

El Vicerrector d’Informática y Comunicaciones de la Universidá d’Uviéu, Víctor Guillermo García, internvino darréu pa recordar “los llogros algamaos” pola Universidá no que cinca a la llingua asturiana, nomando, ente otros “el Reglamentu d’usu del asturianu nel Rexistru, la páxina web n’asturianu, y los estudios oficiales d’asturianu”. Acabó les sos pallabres el Vicerrector recordando un vieyu poema n’asturianu, que reconoció “lleía de pequeñu” y nel que se nomaba a la llingua asturiana como la más vieya. “Nun sé si ye la más vieya, pero pa min ye la más prestosa del mundu”, remató.

L’Alcalde del Conceyu de Cangas del Narcea, José Manuel Martínez, agradeció a l’ALLA “que traigan la Universidá al conceyu, pese al tamañu d’esti” y recordó “l’apuestu de Cangas pola cultura y la educación”, amás de pola llingua asturiana “gracies a la que tenemos una identidá como pueblu”.

Peslló les intervenciones, el Conseyeru d’Educación, José Luis Iglesias Riopedre, recordó los “llogros” nel enseñu del asturianu “que dende’l Gobiernu vamos normalización pasín a pasu”.

Les clases entamaron esa mesma tarde, con al rodiu de 150 persones participando.

La revista de cultura, ociu y tendencies de Publicaciones Ámbitu, saca estos díes a la cai un númberu nuevu, el 37, que pue consultase na rede,y onde sigue poniendo atención nes propuestes lliteraries y artístiques más actuales, “afondando na llinia que vien calteniendo dende’l so nacimientu, nos primeros años d’esta década”, comenten dende la editorial.

Nesti númberu la publicación cuenta con collaboraciones lliteraries de Sergio Benito, Pablo X. Suárez, Victor Rodríguez o Ismael Piñera Tarque. Amás, nes sos páxines pueden atopase entrevistes col escritor catalán Milo J. Krmpotic, qu’acaba de publicar la novelaLas tres balas de Boris Bardin (editorial Caballo de Troya) y col responsable de la editorial Impedimenta, Enrique Redel.

Nel campu de la fotografía, cuenta coles aportaciones de Tarek Halabi, que presenta una esbilla de semeyes sobre la Selmana Negra de Xixón; de Sergio López, qu’ofrez, en collaboración cola Escuela d’Arte d’Uviéu, un trabayu tituláu La Rula d’Avilés y del fotógrafu Javier Bejarano, que muestra una serie sobre Nueva York.

Nesta páxina pue lleese en llinia la revista

El diariu vascu Deia espublizó esti domingu una entrevista col Presidente de Cantabria, el rexonalista Miguel Ángel Revilla, na que declaró, una vegada más el so amor por Asturies. El Presidente cántabru recordó que’l so pueblu “ta na frontera ente Cantabria y Asturies” reconociendo que por ello, “falo’l bable”.

Revilla, que yá apaeciere en televisiones estatales cantando n’asturianu o usando la toponimia tradicional de Xixón, confiésase na entrevista d’esti domingu cantantante de tonada “participé en munchos concursos de cantu en bable”, comentó.

Entrevista completa con Revilla (Diariu Deia)

L’Aconceyamientu de Xuristes pol Asturianu ta acabante presentar un testu na Mista Congresu-Senáu de Control Parllamentariu de la Corporación RTVE nel que s’esixe a la canal estatal que camude la política d’emisiones dende’l Centru Territorial d’Asturies, yá que les emisiones “fáense en castellán y non en bable/asturianu, la llingua propia de la Comunidá Autónoma, custión ésta que fraya la llexislación vixente”.

Y ye que según espliquen nel documentu remitíu al Congresu, “el bable/asturianu ye la llingua tradicional d’Asturies” pol artículu 1 de la Llei 1/1998, de 23 de marzu, y una llingua “dafechamente normalizada (cunta con diccionariu, gramática y nomenclátor de toponimia, iguaos per una institución oficial, l’Academia de la Llingua Asturiana) talu que reconoz mesmamente’l Conseyu d’Europa nel so Segundu Informe sobro l’Aplicación n’España de la Carta Europea de les Llingües Rexonales o Minoritaries”.

Pa Xuristes estes razones asitien al asturianu “dientro del grupu de les cuatro llingües rexonales españoles por más qu’a diferencia de les otres tres (catalana, gallega y vasca), a la nuesa venga negándose-y el derechu a la cooficialidá establecíu nel artículu 3.2 de la Constitución Española”. Pese a la falta d’oficialidá, “nun debiere tener nel casu que se denuncia –la desconexón en castellán de les emisiones territoriales de la Televisión Española- nenguna trescendencia porque l’orixe de la normativa reguladora atópase, afortunadamente, estramuries del Estáu español”.

Xuristes argumenta que na Declaración Universal sobre Diversidá Cultural que dio llugar, cuatro años dempués, a la Convención sobro la Proteición de la Diversidá de les Espresiones Culturales, “sollíñense dos custiones perimportantes pal asuntu que se trata. La primera, contenida nel so entamu, recuerda ‘que la diversidá llingüística ye un elementu fundamental de la diversidá cultural’. La segunda, artículu 2.3, proclama’l principiu d’igualdá de dignidá y respetu de toles cultures, mesmamente les de les persones pertenecientes a minoríes o pueblos autónomos”.

Esti tratáu, que foi ratificáu per España nel BOE de 12 de febreru de 2007, contradícese pa los xuristes asturianos, pues “dase un tratu estremáu a diversidaes culturales sustancialmente asemeyaes (les cuatro llingües rexonales españoles) y entá menos pretendiendo sofitar l’actu discriminatoriu n’otra discriminación anterior: la negativa del llexislador a reconocer a una d’elles la condición de cooficial establecida na Constitución”.

Por ello piden al Congresu que, y yá que “N’acatamientu –polo menos formal- d’estos preceutivos antecedentes llegales, l’Estáu español incorporó a la so normativa interna’l respetu a la identidá llingüística nes sos actividaes televisives, pente medies de los artículos 3.2.e) de la Llei 17/2006, de 5 de xunu, de la Radio y la Televisión de Titularidá Estatal (“Nel exerciciu de la so función de serviciu públicu, la Corporación RTVE deberá promover la xuntura territorial, la pluralidá y la diversidá llingüística y cultural d’España”) y 5.1 ( “toles persones tienen el drechu a que la comunicación audiovisual incluya una programación n’abierto qu’espeye la diversidá cultural y llingüística de la ciudadanía”) de la Llei 7/2010, de 31 de marzu, Xeneral de la Comunicación Audiovisual”, l’Estáu español ha ufrir, como dicen na so normativa “La Corporación RTVE cuntará cola cadarma territorial del casu p’atender l’afayadiza prestación de les sos funciones de serviciu públicu…. Les desconexones fadránse na llingua propia de les CCAA”.

La pallabra tienla agora la comisión de RTVE nel Congresu que tendrá de xustificar la negativa a que’l Centru Territorial de TVE n’Asturies realice les sos desconexones n’asturianu “llingua tradicional y propia de la Comunidá Autónoma del Principáu d’Asturies”, según la llexislación vixente.

Unu de los ámbitos que tradicionalmente se venceya col nacionalismu español, el mundu de los toros, ta acabante sorprender a los xixoneses al utilizar na so cartelería oficial de la Feria Taurina de Begoña 2010, la toponimia de Xixón nes sos dos formes oficiales (Gijón/Xixón).

El topónimu tradicional, y dende 2006 tamién oficial, úsase esti añu nel cartelu de la feria taurina, que se celebra ente’l 10 y el 15 d’agostu, y nel d’un espectáculu de caballos tituláu “Pasión y duende del caballo andaluz”, que va celebrase’l vienres 6 d’agostu.

Sicasí, el tamañu del topónimu n’asturianu qu’apaez en dambos cartelos ye de menos d’una cuarta parte del qu’usen na tipografía en castellán.

El Centru Municipal d’El Llano, de Xixón, acueye a lo llargo de güei y mañana, 2 y 3 de xunetu, el IV Congresu Internacional Muyer y H.oquei: La perspectiva de xéneru nel deporte.

Un alcuentru que busca camudar “La ralura d’estudios dedicaos a la muyer deportista, la falta de perspectiva de xéneru nes formaciones de entrenadors, y poro, la falta de formación escontra la muyer deportista son barreres que frenen la meyora del deporte femenino”.

Esti Congresu va intentar ufiertar “conocencia deportiva en relación a la muyer a nivel físicu, psicolóxicu y social/educativu y va dar ferramientes de trabayu a formadores, directivos, xestores deportivos, entrenadores, asina como a les mesmes deportistes.

El Congresu ta empobináu a estudiantes, clubes, asociaciones de muyeres, Federaciones deportives, Patronatos Deportivos, Conceyos, profesionales de la educación y/o del entrenamientu, y a cualquier persona interesada. Los organizadores son el Biesca Xixón y el H.oquei Patinos Femenín.

Más información del Congresu

El Conceyu Universitariu pol Asturianu (CUPA) dio anuncia de que ta acabante unviar a la Universidá d’Uviéu, y siguiendo’l trámite de consultes abiertu por esta, una propuesta pa que la nueva imaxe corporativa, que va usase pola mor del nuevu proyectu de Campus d’Escelencia, “vaya tamién n’asturianu, recoyendo la realidá billingüe de la sociedá asturiana”. Una decisión que la dirección del CUPA camienta importante pa “facer visible l’usu del asturianu dientro de la Universidá d’Uviéu, con una midida que nun supón absolutamente nengún gastu y que, amás, respuende a la llexislación vixente, qu’obliga a la promoción del asturianu dientro de la Universidá”.

Amás el CUPA recuerda que “col cambiu de munchos de los centros de la Universidá (fusiones, cambios de denomaciones, etc.) ye un bon momentu p’adaptar la cartelería de forma billingüe, como prometió’l Rector Vicente Gotor”.

El CUPA unvió al traviés d’un de los sos representantes nel Claustru de la Universidá la propuesta, dientro de los plazos abiertos pol Rectoráu pa facer reclamaciones y suxerencies sobre los proyectos que van aprobase en futures sesiones del Conseyu de Gobiernu de la Universidá.

La selmana pasada Javier Cubero presentó na Casa Conceyu de Xixón el so primer llibru “Del Romanticismu al Rexonalismu: escritores carlistes na lliteratura asturiana” obra ganadora del II Premiu “Federico González-Fierro Botas d’Ensayu y Trabayos d’Investigación na so edición de 2009. El llibru asoléyenlu l’Ayuntamientu de Xixón y Ediciones Trabe. Asturnews ufre una galería de semeyes y dellos vidios de la presentación.

Vidios:

Inaciu Iglesias, editor, fala del llibru:

Galería de semeyes de la presentación