Vicente Gotor pide la unidá de los asturianistes “pa que la llingua tenga más visibilidá na sociedá”

Na entrega de diplomes de los cursos de la Universidá Asturiana de Branu, celebrada esti vienres na capital asturiana, Vicente Gotor, rector de la Universidá d’Uviéu, recordó la “perbona collaboración ente Universidá y Academia de la Llingua Asturiana”. El Rector qu’entamó’l so discursu n’asturianu, disculpóse darréu “el mio asturianu ye tovía incipiente” ya improvisó un discursu nel qu’esplicó les acciones llevaes a cabu pola so alministración al frente de la institución y pidió la unidá de los asturianistes. “Esti equipu de gobiernu, nos dos años llargos que lleva fizo más pol asturianu que cualesquier otru na Universidᔠrecordó Gotor.

Sobre’l llabor académicu dixo “collaboramos col profesoráu correspondiente pa que per primer vegada la Universidá d’Uviéu tenga estudios reglaos d’asturianu en Filoloxía, en Maxisteriu y nel Master de Secundaria”, lo que calificó como “un pasu mui importante”, reconociendo “que munchos pensaran que se podríen dar más creitos”. Pa Gotor “que l’asturianu tenga’l protagonismu que se merez nos nuevos graos ye bien importante”. Dende’l Rectoráu “vamos siguir apoyando la llingua asturiana, como taba nel nuesu programa electoral, anque paez qu’a dalgunos tamos defraudándolos porque la Universidá nun pue oficializar l’asturianu, pero lo que tamos faciendo y vamos siguir faciendo pol asturianu espero que seya entendío”.

Sobre les estremaes estayes de la normalzación, recordó la presencia nel gobiernu de so, de dos vicerrectores “asturianistes de pro”, que taben presentes nel actu d’esti vienres. El vicerrector d’Investigación, que dixo, “apoya la investigación a tolos grupos que faen investigación n’asturianu, con namás una condición, que seyan escelentes”. Sobre’l vicerrector d’Informática y el Director d’Area d’Investigación, “influyeron muncho en que tengamos una páxina web multillingüe, n’asturianu, inglés y castellán, como foi una promesa electoral”. El rector recordó “a munchos detractores del asturianu nun-yos gustará, pero nós tenemos la idea clara”.

Sobre los plazos nos que se tán tomando les midíes de normalización del asturianu “creo que llegamos a tiempu, anque se podríen facer les coses enantes”, escusándose na “situación actual de crisis”.

“Tamién nos comprometimos a la visibilidá del asturianu” dixo Gotor. “Vamos dir a poco y a poco. Agora, col reordenamientu de centros, espero que podamos tener duplicidá de nomes castellán y asturianu”. Recordó’l Rector tamién que “na tienda de la Universidá hai munchos oxetos rotulaos n’asturianu y vamos siguir apoyándolo indudablemente”.

Vicente Gotor pidió na so intervención “unión”: “La xente que trabaya nel asturianu nun ye muncha y tenemos que dir pel mesmu camín, tenemos que trabayar xuntos, pa qu’esta llingua tenga cada vegada más visibilidá na sociedá asturiana”. “La cultura asturiana ye importantísima como seña d’identidá pa tolos asturianos”, a lo que’l cabezaleru universitariu añadió “y dizlo una persona que nun ye asturiana de ñacencia pero que si lo ye de devoción”.