Sociedá

Dientro de los atos organizaos pol Partíu Asturianista (PAS) pa la celebración del so primer cuartu de sieglu d’actividá política, la organización nacionalista tien previsto entamar un conciertu col grupu Tuenda y Xosé Ambas, estis sábadu 2 d’ochobre nel Auditoriu d’Uviéu. Nel actu va actuar tamién l’actor Lluis Antón González, echando ún de los monólogos del programa La Risión, de la TPA.

Amás, a lo llargo de tol día, Xuventú Asturianista organiza frente al Auditoriu, una carpa d’información ciudadana onde’l PAS va siguir cola so campaña “¿Y tu, qué opines?, pa conocer la opinión de los ciudadanos sobre toa triba d’asuntos públicos.

El conciertu ta abiertu pa tolos públicos, de forma llibre y gratuita y el PAS convida “a tola sociedá asturiana celebrar con ellos los sos primeros 25 años de vida como formación”.

Acaben de dase a conocer les candidatures que pasen la primer fase d’escoyeta pa ser Capital Europea de la Cultura en 2016 y Uviéu nun ta ente les escoyíes. Burgos, Córdoba, Donostia, Les Palmes de Gran Canaria, Segovia y Zaragoza siguen el camín p’algamar esta simbólica capitalidá. Con esta decisión remata un llargu y complicáu camín qu’entamó n’Asturies con una candidatura conxunta ente la capital asturiana, Avilés y Xixón, que terminó n’engarradiella política ente’l Gobiernu d’Areces y Gabino de Lorenzo.

Les barricaes ardieron en numberosos puntos d’Asturies dende primer hora de la mañana. Los piquetes provocaron estrozos nes zones industriales y comerciales d’Asturies, zarrando accesos a centros de trabayu y comerciales, magar les declaraciones que facía ayeri a La Nueva España, Justo Rodríguez Braga, secretariu xeneral d’UXT, nes qu’afirmaba que se diba poder “trabayar con normalidá y ensin coacciones”. La imaxe ye d’esta mesma mañana, a les 8:30, na autopista Y, onde munchos ciudadanos quedaron atrapaos pola acción de los piquetes.

Los servicios mínimos nun se cumplieron nos tresportes como reconoz CCOO d’Asturies na so páxina “L’aeropuertu permanez zarráu” y munches persones viéronse atrapaes nes barricaes feches nes principales carreteres asturianes. La prensa paró nun 80% según los sindicatos. Asina, La Nueva España renunció güei a sacar la so edición, TVE tien la señal cortada n’Asturies, lo mesmo que TPA, que tardó más en facelo, pero que dende les 11 la mañana nun emite señal nenguna.

“El serviciu de recoyida de basures paró al 100% y Correos nun 90%, ente que nel sector industrial el siguimientu ta siendo prácticamente total: Arcelor Mittal y Alcoa el 100%, Asturiana de Cinc el 75%”, siempres según los sindicatos.

Un aficionáu del Sporting de Xixón púnxose en contactu con Asturnews pa denunciar que na tienda del equipu xixonés “nun se pue mercar el pantalón de la vestimenta oficial col topónimu ‘Xixón’”. El clú lleva dende esti añu nel pantalón el topónimu tradicional del conceyu, pero como se pue comprobar na páxina web de la entidá deportiva, les equipaciones a la venta namás lleven ‘Gijón’ na camiseta, pero non ‘Xixón’ nel pantalón”. L’aficionáu denunciante recuerda que “los xixoneses pagamos una importante cantidá de los nuesos impuestos pa que’l nome del conceyu vaiga na equipación” polo que reclama que, tamién nes unidaes a la venta, apaeza’l topónimu tradicional del conceyu.

La publicidá fecha pol Conceyu de Xixón na equipación del Sporting tien un costu de 2.050.000 d’euros. El club ha usar el nome de la ciudá na so equipación hasta 2013, comprometíendose amás a organizar un partíu añal del qu’han donase los fondos consiguíos a los clús base de la ciudá, amás de 200 entraes por partíu pal equipu de gobiernu.

31/08/2010: L’Sporting xuega per primer vegada na hestoria col topónimu “Xixón”

Esti miércoles, 29 de setiembre, ta convocada una fuelga xeneral n’Asturies. La convocatoria fíciéronla nel so momentu CCOO y SOMA-FÍA-UXT, pero son munches les organizaciones que se sumaron a esta xornada reivindicativa, anque nun van dir toos de la mano. El sindicatu asturianu CSI convocó una manifestación alternativa na que se responsabiliza, non solo al PSOE de la situación d’anguaño, sinón tamién a los propios sindicatos mayoritarios, al PP ya IX. L’Ensame pola República Asturiana va más allá, y va manifestase frente a les sedes de CCOO, FADE y FSA-PSOE n’Uviéu, na xornada previa.

Esta concentración énte les sedes asitiaes na cai Santa Teresa, baxo’l lema “PSOE, PP, IU, UXT y CCOO son la crisis d’Asturies”. Va tener llugar el martes 28 de setiembre a les 20 hores.

Yá na propia xornada de movilización, va celebrase una manifestación peles cais de Xixón convocada pola Corriente Sindical d’Izquierda (CSI), con salida na Plaza L’Humedal a la una la tarde. A esta manifestación anunciaron la so asitencia l’Ensame pola República Asturiana,

La manifestación convocada por CCOO, UXT y USO va celebrase n’Uviéu de magar les siete les tarde. La manifestación cunta col sofitu d’Izquierda Xunida d’Asturiesm, ente otres organizaciones.

El Vicerrectoráu d’Investigación, al traviés de la OTRI, entama esti vienres, 24 de setiembre, nel Patiu del Edificiu Hestóricu de la Universidá d’Uviéu, “La Nueche de los Investigadores” ye una acción enmarcada nel Programa PEOPLE del 7u Programa Marcu Européu y va celebrase al memsu tiempu en ciudaes de toa Europa.

Sol lema “Espierta na Nueche de los Investigadores: cena cola ciencia” desenrrollaránse actividaes de divulgación científica pa tou tipu de públicu. Ente les actividaes, abiertes al públicu xeneral, van tar “Química ente fogones”, onde van realizase esperimentos rellacionaos con cromatografía de dulces y verduras; “¿Químicos o cocineros?”, onde van realizase esperimentos que nos fadrán ver en qué s’asemeya una cocina y un llaboratoriu y otres como “ La cocina microscópica” o “Los microbios na cocina”.

L’accesu ye llibre y l’horariu va ser dende les 18:00 a les 22:00h (cada turnu d’esperimentos va entamar cada 45 minutos: 18:00-18:45 / 19:00-19:45 / 20:00-20:45 y 21:00-21:45).

La Tertulia Pachín de Melás torna a funcionar dempués del parón del branu con un alderique alredor del futuru de la rede ferroviaria del país, sol títulu “Hai una llinia trataza: la rede ferroviaria asturiana”, l’agrupación d’Unidá Nacionalista Asturiana nel conceyu de Xixón organiza esti actu nel Bar Cantábrico, asitiáu énte los Xardinos de la Reina de Xixón, a les 20.30 hores del xueves 23 de setiembre.

Nel mesmu van participar Carlos García Alcalde, miembru del colectivu “Asturias en tren” y autor del artículu “¿Un Feve para el siglo XXI?” espublizáu en La Nueva España; José Luis Delgado, miembru del Sindicatu Ferroviariu; y Rubén Ardura, autor del artículu “AVE cantábricu, el mitu de la eficiencia” espublizáu na revista Atlántica XXI.

El cantautor, políticu y escritor José Antonio Labordeta morrió güei en Zaragoza a la edá de 75 años tres una llarga enfermedá, según informen dende’l so partíu, la Chunta Aragonesista (CHA), col que foi diputáu nel Congresu de los Diputaos, a lo llargo de llexislatures.Labordeta finó alrdeodr de la una la mañana d’esti sábadu nel Hospital Miguel Servet de la capital aragonesa al que foi treslladáu esta selmana al agravase’l so estáu de salú, que lu tenía postráu na so casa dende va dellos meses pola mor d’un cáncanu de próstata.

Ediciones La Cruz de Grau edita esta obra sobre’l futbolista de Tiuya y va presentala esti vienres, 17 de setiembre a les 19:30 hores, na librería Cornión de Xixón. Nes páxines d’esti llibru analízase la figura de David Villa en dos facetes distintes. Per una parte, los testos percuerren la distancia curtia, partíu a partíu, el Mundial d’`El Guaje´, una de les figures de mayor altor en Sudáfrica 2010. L’autor usa tamién como sida l’escurrir del tornéu pa recontar la trayectoria del xugador y pa introducir amás dalguna pincelada acullá del seguimientu al delanteru, con reportaxes sobro la hestoria de los mundiales o l’afamáu pulpu Paul.

Per otru llau, les fotografíes conformen un mosaicu d’escenes y xugaes, vivencies y escenarios del delanteru asturianu más universal a lo llargo de doce años de carrera deportiva, dende los entamos como xugador xuvenil del O.P. Llangréu hasta la so consagración definitiva cola llegada al F.C. Barcelona.

Francisco Álvarez González (Xixón, 1970) ye periodista del diariu asturianu ‘El Comercio’, dende va venti años, pasando per delles estayes hasta llegar a deportes. Entamó na emisora llibre Onda Latina de Madrid y col periódicu oficial de la Selmana Negra de Xixón. Cursó estudios na Facultá de Ciencies de la Información de la Universidá Complutense de Madrid. Esti llibru ye’l cuartu del autor, tres ‘Patiu de prisión’ (VTP, 1998), ‘En poques pallabres’ (Trabe, 1998) y ‘Dixebra: cróniques d’un pueblu’ (L’Aguañaz, 2003). Ye tamién lletrista de Dixebra. Col ‘Cantar de la redención’, foi escoyíu Meyor Cantar n’Asturianu nos Premios de la Música 2010, en Madrid.

La comarca portuguesa de Miranda, onde se fala l’asturianu embaxo’l nome de “mirandés”, celebra esti vienres, 17 de setiembre, el “Die de la Lhéngua Mirandesa” cola conferencia “Más de mil años de llingua mirandesa”, impartida por Amadeu Ferreira. Amás van inaugurase delles esposiciones y va representase la obra en mirandés “Ls lusíadas”.