Sociedá

El Nacimientu del Conceyu de Xixón, asitiáu en Los Campinos de Begoña, inaugúrase esti miércoles 22 d’avientu a les 18:00 hores, na pérgola de los Campinos hasta’l día 6 de xineru. Les obres d’ampliación del aparcaderu soterrañu de Begoña motivaron un amenorgamientu del mesmu, pero nun se quixo prescindir totalmente de la so instalación, como vien siendo tradición nestes feches.

Esti nacimientu monumental ye obra del escultor xixonés Miguel Álvarez “el Ponticu” y va cuntar na so inauguración cola actuación musical del Coru Infantil “Los Xustinos”, los más nuevos integrantes del grupu folclóricu Los Xustos, que nesta ocasión va tar integráu namás por neñes d’ente ocho y catorce años. El repertoriu que van interpretar, acompañaes de vigulín, xiblata y percusiones, ta compuestu por una selección de cuatro villancicos tradicionales asturianos como Alsa Vayona o Veníi curriando a Belén.

Na dómina del Conseyu Soberanu d’Asturies y Lleón, Rafael Fernández yera entá un rapaz. Con namás 23 años conviértese en Conseyeru de Facienda baxo les órdenes del so suegru, Belarmino Tomás, y yá enantes fuere Conseyeru de Mocedá. Perdida la Guerra vive nel esiliu, en México, hasta la so vuelta en 1974, instalándose perdafechu nel 75. En 1978, de vuelta nel FSA-PSOE tres formar la Junta Democrática, conviértese en presidente del ente preautonómicu, el Conseyu Rexonal d’Asturies, dirixendo’l camín hacia l’autonomía con acciones como la fundación de l’Academia de la Llingua Asturiana, anque con un considerable retrasu pola falta de la so firma nel decretu correspondiente.

Nel 77 conviértese en Senador por Asturies. En 1981, aprobáu yá l’Estatutu d’Autonomía p’Asturies, Fernández sigue siendo Presidente d’Asturies hasta la convocatoria d’elecciones de 1983, cuando lu sucede Pedro de Silva.

Cola so muerte, desapaez l’últimu superviviente d’un gobiernu “soberanu” n’Asturies. Sicasí, Fernández, abogáu de profesión ñacíu n’Uviéu en 1913, afirmó va años que la declaración de soberanía que fizo’l gobiernu de Belarmino Tomás foi un error. El primer presidente de la democracia posfranquista llevaba años apartáu de la política y afectáu d’alzheimer.

Xuventú Asturianista, mocedá del Partíu Asturianista, recuerda que los partíos de la Seleición Asturiana de fútbol surdieron por iniciativa de la “Fundación Nueva Asturies”, venceyada al PAS, “que fizo les actividaes necesaries de sofitu pa la so creación, como la recoyida de firmes de futbolistes asturianos de 1ª y 2ª División, naquel tiempu”.

El primer partíu foi nel 2000 nel “Nuevo Carlos Tartiere” n’Uviéu escontra Macedonia (1-0 ganóse), y l’últimu nel 2002 nel “Suárez Puerta” n’Avilés escontra Hondures (5-3), toos col aliendu de l’afición asturiana.

XA llamenta “la inactividá de la nuestra clas dirixente que-y torga a los asturianos dende hai 8 años ver a la so selección nacional nel deporte rei”. A la mocedá asturianista prestaría-y ver “a xugadores d’esbilla como David Villa, Juan Mata, Luís García, Adrian Colunga, Santi Cazorla, y munchos más. Sedría una folixa pal fútbol asturianu, y pa los asturianos”. XA diz nun pue imaxinar “qué-y fizo’l Pueblu Asturianu pa qu’otres comunidaes autónomes puedan tenela y nosotros non”.

Xuventú afirma que la política deportiva d’esti Gobiernu Asturianu “formáu poles fuerces centraliegues españoles PSOE ya IU, nun tien nenguna credibilidá”. Critiquen la falta d’atención pa colos deportes tradicionales como los bolos, “dende cuantayá amenorgando les sos llicencies”.

“Estos partíos de la combinada nacional de fútbol daríen perres pal desendolcu de polítiques deportives nun tiempu perdifícil pa munches asociaciones y peñes deportives”, recuerden. Piden por ello “la torna de la seleción asturiana absoluta de fútbol y el so afitamientu como representante futbolísticu de los asturianos y asturianes, amás de la oficialidá y la normalización internacional de toles federaciones deportives asturianes”.

Esti llunes, 13 d’avientu, entamen nel salón d’actos de Caxa España de la cai San Torcuato de Zamora les Xornaes de Cultura Zamorana, cola conferencia titulada “Archivu d’escritura popular” a cargu de Pablo Tobal Sarto, de l’Asociación Etnográfica Bajo Duero. El martes 14 el miembru de Furmientu Pedro Gómez Turiel impartirá la conferencia “L’asturlleonés d’Aliste nel s. XXI”. Pa finalizar, el miércoles 15, y embaxo’l títulu “L’arquiteutura tradicional n’Aliste”. Sobre la necesidá de la so difusión preventiva, el tamién sociu de Furmientu José Félix Pérez Lorenzo, disertará sobro esti aspeutu del patrimoniu cultural zamoranu. Toles conferencies son a les ocho la tarde.

Los Premios Andrés Solar algamen nesti 2010 la so XXVI edición. Como nos sos 26 años de vida, los premios tienen una vertiente doble: per un llau, la Xunta premia a una entidá o persona que rescamplara nel últimu añu pol so llabor en defensa o promoción del asturianu. Esti reconocimientu materialízase n’El Pegollu, que nesta ocasión quier reconocer el trabayu de tol equipu que fai posible’l programa Camín de Cantares y en concretu, al responsable de la idea, Ramón Lluis Bande y al conductor del mesmu, Xosé Antón Fernández, Ambás.

La Xunta quier reconocer l’usu que fai de la llingua asturiana esti programa, nun exemplu de normalidá y puesta en valor de les nuestres señes d’identidá. La recuperación de les tradiciones, sobre manera nel ámbitu musical, y too ello cola conducción del propiu programa col asturianu como llingua vehicular, son dalgunes de les razones poles que se dan esti premiu. Pol so apueste decidíu a lo llargo de 6 temporaes, ensin complexos, y pol so exemplu de que l’asturianu nun ye un llastre, sinón daqué que xuega al nuestru favor, la Xunta pola Defensa de la Llingua Asturiana decidió concede-yos esti 2010 el El Pegollu de los Premios Andrés Solar.

Los Premios Andrés Solar tienen tamién una versión negativa, que reconoz a la persona o entidá que rescamplara pol so llabor negativu pa cola llingua asturiana. Esti dudosu honor represéntase con un “Madreñazu”, que na edición de 2010 va pal Conseyeru d’Educación y Ciencia del Principáu d’Asturies, Herminio Sastre. Como responsable máximu na Conseyería d’Educación y Ciencia, la Xunta topa delles razones poles que castigalu con esti premiu. Tres la resolución recién del Tribunal Superior de Xusticia d’Asturies, qu’afita que los ratios mínimos d’ocho alumnos nun son conformes a derechu y manda al Gobiernu asturianu que cumpla la llei y garantice la enseñanza del asturianu, el nuevu conseyeru de Educación preséntase en comparecencia pública calificando l’aplicación de la llei como “despilfarru”, despreciando’l derechu reconocíu de los estudiantes asturianos a poder estudiar asturianu y anunciando recursu contra la sentencia, colo que la Xunta pola Defensa de la Llingua Asturiana considera qu’Herminio Sastre ye bon merecedor del antipremiu.

La entrega de los Premios va facese’l día 18 d’avientu a les 19:30 hores nel Salón d’Actos del Antiguu Institutu de Xixón. L’actu va contar cola actuación musical de dellos músicos de la escena folk asturiana, que van facer reellaboraciones de temes tradicionales asturianos.

Tamién, como tolos años, depués de l’actu va haber una espicha. Esti añu va ser nel chigre xixonés Canteli, y la entrada val 20 euros. Pa dir, hai qu’acutar sitiu, y pa ello puedes llamar al teléfonu 985229553 o mandar un corréu a info@exunta.org primero d’esti xueves 16 d’avientu.

L’Atles de les Llingües del Mundu en Peligru, espublizáu pola Organización de les Naciones Xuníes pa la Educación, la Ciencia y la Cultura (UNESCO), recueye al asturianu dientro de les llingües que tán nuna situación más peligrosa. Nel estáu español namás aragonés, occitanu y vascu, nun menor rangu de peligru, apaecen nesti mapa. Les polítiques llevaes alantre en Galicia, Cataluña, Valencia ya Islles Baleares consiguió dexar atrás el peligru pa les sos llingües.

L’asturianu podría convertise nuna más de les anguaño 220 llingües desapaecíes según la UNESCO nos sesenta años últimos. L’estudiu tien cinco tipos de peligru: vulnerable: los neños falan l’idioma, que pue tar restrinxíu a ámbitos del llar; definitivamente en peligru, cuando los menores nun deprenden l’idioma como llingua materna; gravemente en peligru, falen los güelos, los padres entienden y los neños nun lo faen; críticamente en peligru, güelos y mayores son los falantes más mozos; y estinta, ensin falantes dende 1950. L’asturianu ta asitiada na categoría “definitivamente en peligru”.

Mapa de les llingües del mundu en peligru

L’Asociación Xuvenil Mezá organiza la tercer edición del Outono Cultural nel conceyu de Bual, una cita cola cultural asturiana que ve reducíu’l so llargor a namás una xornada por mor de la falta d’ayudes del Gobiernu, que nun aporta esti añu nada, y a la reducción de les collaboraciones d’entidaes privaes. La xornada va celebrase’l sábadu 11 d’avientu, con dellos actos na Casa Cultura de Bual, rematando a les siete y media con conciertu de Toli Morilla y Mezá.

Pero enantes, de magar les les 12:30 la mañana van entamar los actos, cola presentación del llibru “Trenta razóis pra nun medrar” (Trabe, 2010) del poeta local Miguel Rodríguez Monteavaro, que va cuntar na presentación-recital cola presencia del escritor Xosé Miguel Suárez Fernández “Tapia”.

A les seis de la tarde va celebrase una mesa redonda embaxo’l títulu “A recuperación y conservación del patrimonio cultural: perspectivas, críticas y solucióis”, coordinada por Xosé Antón Fernández «Ambás» y na que van participar Pepe “El ferreriro” (ex director del Museo Etnográfico de Grandas), Marta Elola (directora del Muséu Etnográficu del Oriente d’Asturies), Armando Graña (etnógrafu) y Gerardo Díaz Quirós (profesor d’Hestoria na Universidá d’Uviéu).

La xornada va pesllase col recital de Toli Morilla y Mezá, yá citáu y nel mesmu espaciu del conceyu de Bual.

Según sentencia del Tribunal Supremu de Xusticia d’Asturies (TSXA), dellos de los artículos del “Reglamentu sobre presentación y receición d’escritos en bable/asturianu nel rexistru de la Universidá d’Uviéu” queden anulaos o modificaos por insuficientes énte una norma llegal como la Llei d’Usu del asturianu de 1998, qu’afecta según el xuez a la Universidá. El Maxistráu basa la so sentencia nel autu del Tribunal Constitucional de data 25 de febreru d’est añu, pol que nun s’almitió a trámite’l recursu d’Inconstitucionalidá, que’l TSXA califica agora na sentencia como “un desenfoque del juez”.

Xuristes pol Asturianu, que presentó esti recursu a la norma recuerda que la sentencia “refierta una vuelta más que les alministraciones públiques, ente elles la Universidá d’uviéu, tan obligaes a tramitar con normalidá los escritos que se-yos empobinen n’asturianu”.

Y ye qu’anque’l reglamentu en cuestión permitía presentar documentos n’asturianu nel Rexistru (creóse pa ello), plantegaba delles escepciones, como la necesidá de la presencia física de quien presentara un documentu, la imposibilidá de presentar testos pa procedimentos de calter urxente n’asturianu, o la posibilidá de que l’equipu rectoral refugara cualesquier testu según el so criteriu.

Por mor de la mentada sentencia del TSXA del día 30 de payares pasáu, anúlense dellos párrafos de los artículos 2, 3 y 4 del Alcuerdu del Conseyu de Gobiernu de la Universidá d’Uviéu, de 23 de mayu de 2009, pel que s’aproaba’l Reglamentu sobre presentación y receición d’escritos en bable/asturianu nel Rexistrude la Universidá d’Uviéu, arriendes d’interpretar, alcordies cola Llei 1/1998, d’Usu del Bable/Asturianu, los artículos 1 y 5.

Pa Xuristes pol Asturianu “da una idega del algame de la sentenci´l fechu de que se corrixen –per desaniciu o interpretación correuta- cinco de los seyes artículos de la norma inpugnada”.

Declaróse tamién el Conceyu Universitariu pol Asturianu (CUPA) que nel so día celebró la creación de la norma calificándola d’“insuficiente”. El CUPA, recuerda que “yá avisó al equipu rectoral” nel so momentu sobre la falta de llegalidá de partes del Reglamentu y celebra que los tribunales “corrixan estes deficiencies”. El CUPA pide al equipu de Gobiernu de la Universidá qu’aplique de siguío la sentencia, “pues tán en xuegu los drechos de los asturianos”.

Reglamentu d’Usu del Asturianu nel Rexistru de la Universidá d’Uviéu

El Conceyu de Xixón anunció que la tercer edición del premiu d’ensayu en llingua asturiana ‘Fierro Botas’, que convoca la Conceyalía de Cultura Tradicional y Llingua Asturiana se declaró ermu. La decisión tomóse esti vienres pasáu, 26 de payares, nel conceyu convocáu pol xuráu.

Esti taba presidíu por Jorge Espina Díaz, asesor de la Conceyalía de Cultura Tradicional y Llingua Asturiana, Marta Mori d’Arriba, escritora y representante de l’Academia de la Llingua, Javier Cubero de Vicente, ganador de la edición anterior, Penélope Miranda Fernández, del SNL de L.lena, Humberto Gonzali García, asistente del grupu popular, Paz Fonticiella Gutiérrez, escritora, Jaime González-Fierro Huerta, en representación de la familia de Fierro-Botas, y María Antonia Pedregal Montes, responsable de la Oficina de Política Llingüística d’Asturies; actuando como secretaria María Xosé Rodríguez López, de la Oficina de la Llingua de Xixón.

El Premiu Fierro-Botas convocóse n’otres dos ocasiones, resultando ganador na primera d’elles, el trabayu “Discursos llingüísticos y movimientu obreru na Asturies decimonónica” de Rafael Rodríguez Valdés, y Javier Cubero de Vicente col estudiu “Del romanticismu al rexonalismu: escritores carlistes na lliteratura asturiana”.

Nel so venti aniversariu, la tertulia cultural El Garrapiellu, de Xixón, recibe la Medaya de Plata del conceyu onde s’asitien. Nestos venti años punxo en valor la cultura y la llingua asturiana con numberoses actividaes dedicaes a la recuperación del patrimoniu asturianu.

Xunto a El Garrapiellu, van ser nomáu Fíu Predilectu Santiago Carrillo, dempués de que l’añu pasáu’l Partíu Popular de Xixón defendere la postura contraria. L’alcuerdu, por unanimidá de PP, PSOE ya IX, llegó col nomamientu del ex ministru conservador Rodrigo Rato como Fíu Adoptivu del conceyu.

La Medaya d’Oru va ser esti añu al puertu y la comunidá portuaria de Xixón, mientres que les de Plata son pa: Francisco Prado Alberdi; la periodista María Teresa Álvarez -vilda de Sabino Fernández Campo-; José Manuel Menéndez Rozada, pola so trayectoria sindical; la Unidá d’Hospitalización de la Casa del Hospital de Cabueñes; la escritora Carmen Gómez, que tien obra publicao en castellán y n’asturianu, y la yá citada Tertulia Cultural El Garrapiellu.

Les distinciones van entregase’l 29 de xunu, coincidiendo cola festividá de San Pedro, patrón de la ciudá.

Entrevista con Tino Lozano, presidente d’El Garrapiellu