Sociedá

La Plaza d’Europa de Piedrasblancas foi’l sitiu onde se disputó’l II Abiertu de Navidá de Liriu, el domingu 26 de payares. Esti eventu, que zarraba la temporada de liriu 2010, axuntó a nueve machorradores, que se dividieron en trés grupos.

Les carreres puntuábense con 3, 2 y 1 puntu, según fueren primeru, segundu y terceru. El meyor dempués de tres carreres, pasaba a la final. Asina lo ficieron Sergio d’Espor[a], Toño de Sidrones y Juan de Quirinal (dempués de defacese del so compañeru Hevia nun desempate).

La final tuvo mui emocionante y la plaza enllenóse de xente curioseando sobre qué yera aquello que facíen aquello mozos. Hevia, organizador del eventu, vestíu como un paisanu d’aldea, repartía piruletes ente los críos. Y los gaiteros y tamboriteros de la Camaretá poníen la nota musical nuna soleada pero fría mañana de domingu.

Sergio ganó la primer carrera, per delantre de Toño. La segunda, más igualada, finó col empate ente estos dos, dexando descolgáu a Juan, con dos puntos. Pero esti llevaría la tercer carrera y los nervios apoderáronse de Sergio y Toño, que tardaron los tres güelpes permitíos n’encastrar, empatando nuevamente, lo que-y dio’l triunfu al esporu por 7 puntos. Toño algamara 6 y Juan, 5.

D’esta miente, Sergio volvía a facese col títulu caberu del añu, como la temporada pasada, y con una bayurosa cesta de productos de Vallina.

Finó la temporada 2010. Na mirada, el futuru, col proyeutu de creación de la FALA, la configuración del calendariu de pruebes pal 2011 y una nueva cita, yá pa xineru: el II Alcuentru de Liriu de Xixón, organizáu por Espor d’Asturies.

El Conceyu Universitariu pol Asturianu dio anuncia esti meudía de la nticia. Según espliquen nun comunicáu va delles selmanes el CUPA tuvo conocimientu de la esistencia del Ier Concursu Lliterariu Universidá d’Uviéues y “nes sos bases apaecía un artículu nel que se conseñaba que se podíen presentar testos namás en castellán”. El CUPA, espliquen, púnxose en contactu col Vicerrector d’Estensión Universitaria, Cultura y Deportes, Vicente Domínguez, “que recibió mui positivamente la propuesta de camudar esti puntu pa que se pudieren presentar obres tamién en llingua asturiana”. Agora esta petición va facese realidá.

El comunicáu sigue esplicando como’l Vicerrector pidió un informe al Serviciu Xurídicu “col envís de conocer si yera posible llegalmente esi cambiu na convocatoria yá abierta”. La respuesta, afirmen dende’l CUPA “foi positiva y va espublizase’l cambiu nel BOPA a non tardar (la enmienda yá foi mandanda), permitiéndose a la fin la participación de testos n’asturianu nel Concursu”. Según-yos comentó’l Vicerrector y pa evitar agravios colos testos en castellán, el plazu de presentación d’orixinales va ampliase hasta l’11 d’abril..

El CUPA amuésase “percontentu” cola decisión y da-y la norabona al Vicerrector Vicente Domínguez pol cambiu de criteriu, “entendiéndolo como una amuesa de bona volunta pa cola llingua asturiana”.

Amás el CUPA fizo un recordatoriu hestóricu “yá en 1908, coincidiendo col 300 Aniversariu de la Universidá d’Uviéu, el rector Fermín Canella convocó un concursu lliterariu que cuntaba con una categoría pa obres en llingua asturiana”. El CUPA llamenta que tuviera que pasar 100 años “pa qu’otru concursu vuelva a tener categoría de llingua asturiana” pero agora esperen qu’esta categoría se caltenga nel tiempu.

La Fundación Belenos sacó esti mes el númberu 29 de la so revista d’estudios “Asturies, memoria encesa d’un país”. Nesta entrega la publicación inclúi reportaxes sobre l’arte megalíticu, la dómica romana o’l celtismu n’Asturies d’autores como Bueno Ramírez, Balbín Behrmann, Barroso Bermejo, Camino Mayor, Alfonso Fanjul, Alberto Álvarez Peña, José María Herro Garate o Alis Serna Gancedo.

Na revista desquen reportaxes como’l dedicáu al campu bélicu de La Carisa o al etnografía del perru mastín n’Asturies. Amás, como ye vezu, faise una selección de llibros y discos, a cargu d’Ignaciu Llope.

Col alderique sobre la xuntanza de los partíos nacionalistes abiertu, nestes fiestes son mayoría les fuercies que se ponen d’alcuerdu en pidir la oficialización de les seleiciones deportives asturianes, anque na mayor parte los casos nun se fai de forma conxunta. Xuventú Asturianista del PAS abrió la llista de peticiones, faciéndolo de siguío Bloque por Asturies, per un llau, y Darréu y Fai!, de forma conxunta.

Toles fuercies coinciden na necesidá de que les seleiciones asturianes tornen a los campos de xuegu, especialmente la de fútbol, que lleva más d’ocho años ensin xugar nengún partíu.

A Fai! y Darréu paez-yos “qu’entamar de nuevu un partíu amistosu con otra seleición nacional sedría un ésitu sinificatible”, yá qu’albidren que “la ciudadanía asturiana tien ganes de ver xugar a la seleición del so País y económicamente sedría un ésitu que podía ayudar al fúbol asturianu,sobremanera a les categories de mozos y moces, qu’anguaño viven munches dificultaes”.

Bloque por Asturies criticó la eliminación de beques al deporte base y pidió tamién la vuelta de los partíos de la seleición absoluta de fútbol “como forma de facer medrar l’autoestima de los asturianos y poder ver a xugadores d’élite asturiano qu’esportamos fuera del país”.

Xuventú Asturianista, pela so parte pidió, amás de la torna de la seleción asturiana absoluta de fútbol y el so afitamientu como representante futbolísticu de los asturianos y asturianes, “la oficialidá y la normalización internacional de toles federaciones deportives asturianes”.

L’I.Y.S. “Rosario d’Acuña” de Xixón convoca’l decimotercer premiu d’investigación y divulgación en tres categoríes:

1-Premiu de divulgación o investigación dirixíu a estudiantes d’Enseñanza Secundaria (ESO, Bachilleratu y Ciclos Formativos). Dotáu con 600 euros pa los estudiantes y 400 euros pal centru que representa.

2- Premiu empobináu a cualquier investigador o investigadora, ensin necesidá de que seya studiante, que trate sobre aspeutos rellacionaos col conceyu de Xixón. La dotación del premiu va ser de 2.500 euros.

3- Premiu empobináu a cualesquier investigador o investigadora, ensin necesidá de que seya estudiante, que trate sobre aspeutos rellacionaos con Asturies. La dotación del premiu va ser de 3.000 euros.

Al concursu pueden presentase obres n’asturianu y en castellán, hasta’l 2 d’abril de 2011.

Bases completes del concursu

La XV Feria d’Artesanía de Mieres va desenrrollase hasta’l 5 de xineru de 2001, organizada pol Conceyu de Mieres y el Consorciu de la Feria Industrial y asitiada nel Parque Xovellanos a lo llargo de quince díes.

Participen 48 espositores con bayura de productos artesanos. Nesta edición, como ye vezu, van facese actividaes pa toles edaes.

Programa completu

El grupu Cafento, propietariu de la conocida marca Cafés El Gallego, fízose col Premiu a la Meyor Empresa Asturiana del Añu, qu’entreguen el Partíu Asturianista y la Fundación Nueva Asturies dende va doce años.

La empresa premiada ñació en Tinéu nos años trenta por iniciativa de la familia Rodríguez. L’actual primer executivu del grupu, Carlos Manuel Rodríguez, ye ñetu de los fundadores. Anguaño cunten con más de 20 empreses nel grupu, con 3 centros de producción, 11 delegaciones comerciales y 450 emplegaos.

Cafés El Gallego confirmó’l so fuerte compromisu y venceyu con Asturies, inaugurando una nueva fábrica en Tinéu, que concentra bona parte de la producción de les empreses mercaes.

El xuráu valoró esta cuestión y la so política d’inversión y crecimientu, con un “absolutu compromisu con Asturies, el caktenimientu a lo llargo de munchos años d’una actividá económica que xenera emplegos y beneficios en conceyos alloñaos de la centralidá económica ya institucional, y l’exemplu que supón pa tolos asturianos pola combinación d’audacia empresarial, tradición familiar ya innovación comercial”.

Nel xuráu tuvieron Alberto González, Ovidio de la Roza, Rocío Ardura, Juan Carlos Villar y Mª José Iglesias.

Del 25 d’avientu de 2010 al 4 de xineru de 2011 abre de nuevu les sos puertes el Salón Infantil y Xuvenil Mercaplana, qu’esti añu algama la so 38 edición. Mercaplana abre otra vegada les sos puertes a los neños asturianos ufiertando un ampliu abanicu d’actividaes que van sopelexar, ente otros, valores como la creatividá, la solidaridá o’l respetu al mediu ambiente pero siempres pensaes y diseñaes pal esfrute y aprendizaxe de los más pequeños. Cinco pabellones que suman 60.000 metros cuadraos p’allugar más de 150 actividaes, que van poder esfrutase n’horariu de 16:00 a 20:30 hores.

La propuesta pa Mercaplana 2010 contempla cuatro exes alredor de los qu’articularán los distintos espacios y actividaes que se desenvuelvan: Recreación, Participación, Innovación y Creatividá que van ser xunto colos neños los protagonistes de les navidaes xixoneses.

Talleres lúdicos y educativos (TIC, Mediu ambiente, EDPD, lliteratura, arte, etc); Actividaes multideporte; Animaciones y representaciones teatrales/musicales; Xuegos y xuguetes; Bebeteques; Atracciones infantiles; Presentaciones lliteraries y esposiciones y espectáculos.

Como novedá proponer p’anguaño un espaciu específicu empobináu a los mozos y moces d’ente 11 y 13 años onde se van realizar talleres de danza y baille, de rap y beatbox y de fingerskate.

La llingua asturiana tará presente como cada añu nel estand de la Oficina Municipal de la Llingua de Xixón.

Amás de la entrada individual a 3,90 euros, poner a disposición del públicu bonos de 10 entraes por 28,50 euros y talonarios de 25 entraes por 57,20 euros. Los menores de 3 años apuerten gratuitamente a la cortil que va permanecer abiertu del 25 d’avientu al 4 de xineru, sacante’l día 31 que nun va abrir les sos puertes.

Esti xueves, 23 d’avientu a les 19:30 nel Salón de Receiciones del Ayuntamientu de Xixón, va presentase la reedición de los númberos 1 al 6 del bimestral de la Conceyalía de Memoria Social de Xixón “L’alcordanza de la memoria”. Intervendrán nel actu Jesús Montes Estrada, teniente alcalde y responsable de la memorial social de Xixón y Luís Miguel Piñera, coordinador de la publicación. Amás, el cantautor Rafa Lorenzo interpretará dellos temes venceyaos cola nuesa memoria más cercana.

Esti miércoles, día 22 d’avientu, aconceyará n’Uviéu’l xuráu del Premiu a la Meyor Empresa Asturiana 2010, que ta constituyíu por persones independientes, pertenecientes al mundu empresarial y al del periodismu económicu. El premiu entámalu’l Partíu Asturianista y la Fundación Nueva Asturies.

N’otres ocasiones, yá van más de doce años entregándolu, ganaron esti gallardón Valle, Ballina y Fernández, SA; Luminosos Ales; Industrias Cárnicas de Muñás, SA, El Palacio; CASINTRA; Los Telares, SA y Cartonajes Vir (ex aequo); Fundación Santa Bárbara (FUSBA) y Tekox (ex aequo); Grupo Daniel Alonso (Tadarsa); Hijos de Luis Rodríguez (Cadena Más y Más); Talleres Alegría, SA; Formastur, SA; Destilerías los Serranos y Talleres Zitrón, SA, que lu llevó l’añu pasáu.