Sociedá

Ecoloxistes n’Acción entama esta charra na Casa Cultura de La Pola Siero’l próximu 2 d’avientu a les 19,30 hores. Na charra van tar Beatriz González, Eduardo Casares, Paco Ramos, Javier Arjona y Luís Echevarria

Esti miércoles, 1 d’avientu, celébrase na Plaza l’Humedal de Xixón una manifestación embaxo’l lema “¿Vas aguantar otra vuelta de tuerca?”. CSI, SF, SUATEA y CGT convoquen l’actu al que se sumó tamién UNA, Andecha Astur y Bloque por Asturies. Nel percorríu de la manifestación va celebrase un conciertu de K-Nalón y Arma X dende un camión.

La reinvindicación de los manifestanres faise contra los recortes, la privatización de la sanidá, la reforma llaboral y la llei d’estranxería.

Esti vienres, 26 de payares, Avilés acueye la celebración del décimu aniversariu de l’Asociación Asturiana pa la Educación Sexual Astursex, que va consistir nuna xornada dedicada a falar del papel que desempeñó la sexoloxía nos últimos años. L’actu va facese nel Edificiu de Servicios Universitarios, na cai La Ferrería s/n d’Avilés, dende les 15,30 hores.

Los interesaos pueden inscribese na xornada por 10 euros, más 20 euros si s’asiste a la espicha de clausura. Más información nel teléfonu 985 938 008 y nel corréu: dmoises@live.com

SOS Racismu Asturies organiza una charra nel marcu de les terceres xornaes de menores non acompañaos. L’actividá va celebrase nel Conceyu Abiertu, n’Uviéu, esti vienres 26, a les siete y media la tarde, embaxo’l títulu “Les persones menores d’edá tamién emigren. Ausentes, Invisibles, Hipervisibles”.

La ponente va ser Maru Trujillo, trabayadora social nel centru d’acoyida Inmediata Angel Gavinet de Granada. Máster n’investigación d’estudios migratorios. Miembru del grupu d’investigación SEPISE (Seminariu pa la Intervención Social y Educativa) de la Universidá de Granada.

Esti sábadu 27 de payares, nel centru Cambalache d’Uviéu, la organización política de mocedá Fai! Asturies entama una “Entrambasaguas: Xornadas del gallego-asturiano, el outra llingua d’Asturias”, con una charra a les siete la tarde de Miguel Rodríguez Monteavaro titulada “El gallego asturiano dende un punto de vista social y filolóxico” y una “Amostra poética” a les 19:45 hores.

El xueves 25 a les 10,45 hores, l’Alianza Francesa de Xixón en collaboración cola asociación Los amigos de Thionck-Essyl d’Asturies, va recibir na Universidá Llaboral nel nivel 0, sala 009, al escritor y periodista Pierre Cherruau, responsable de la sección África del prestixosu selmanariu “Courrier International”, que va charrar sobre la inmigracion de los africanos nel Estáu español y les razones poles que yá nun ye un destín tán cotizáu pa la inmigración.

Ñacíu en Dunkerque en 1969, Cherruau vivió demientres dellos años en países como Senegal y Nixeria, periodu nel que desenrrolló una gran fascinación por África, que dempués treslladó non yá a la so carrera como periodista, sinón tamién a la so trayectoria como escritor.

Esti miércoles a les siete y media la tarde, el Conceyu Abiertu celebra un charra embaxo’l nome “Y dempués del 29-s ¿qué? Balance y perspectives”, la segunda de les charres d’analís de la convocatoria celebrada nesti espaciu. Na primer mesa que participaren la CSI, la CGT, la CNT y SUATEA y agora ye’l turnu de los sindicatos mayoritarios.

Na mesa van tar Miguel Iglesias Ballina, Secretariu d’Emplegu de CCOO d’Asturies; Pedro García Rodriguez, Secretariu d’Organización de la UXT d’Asturies; y, Rafael González Valbuena, Secretaruiu d’Emplegu de la USO d’Asturies.

La Xunta pola Defensa de la Llingua Asturiana (XDLA) amuesó al traviés d’un comunicáu el so apoyu a les decisiones tomaes pola Xunta de Toponimia y píde-y “que nun ceda a les manipulaciones de dalgún mediu de comunicación y a les práctiques que dellos caciques locales llevan poniendo en práctica nestos meses en dos parroquies del conceyu Carreño”, qu’albidren, tán faciéndose “col fin de valtar el procesu técnicu, científicu y democráticu pol que s’afita la toponimia tradicional d’Asturies”.

La Xunta denuncia lo que camienta “maniobres delirantes y trapaceres de la prensa marellista y l’actuación de grupos escurantistes, nostálxicos y ultras que traten d’echar per tierra un procesu de recuperación toponímica xustu, adaptáu a la llegalidá y exemplu de participación democrática y procuru” y esixe que nun se permitan “los argumentos viciaos, sesgaos y acientíficos salgan trunfantes nin nesti nin n’otru tema”.

La organización recuerda que “Muncho menos se pue permitir que de resultes de la presión mediática s’alterien los criterios de rigor colos que se determinen los topónimos tradicionales” y ye por ello que piden a les instituciones competentes y a la Xunta de Toponimia “firmeza y rigor nel cumplimientu de les sos atribuciones llegales y democrátiques”.

El FICXixón 2010 dedica un espaciu al asturianu embaxo’l nome “Da-y a la llingua nel festival”, qu’organiza la Dirección Xeneral de Política Llingüística a comuña con Suburbia Ediciones y el Festival. Nel actu va presentase’l cómic “Manzajú” espublizáu pola citada editorial, amás d’una película “A religiosa portuguesa”, sotitulada n’asturianu.

L’actu va tener llugar nos cines Centro de Xixón, esti martes, 23 de payares, de magar les 17 hores cola presencia del autor del cómic, Ruma Barbero, la Directora Xeneral de Política Llingüístca, Consuelo Vega y l’escritor Miguel Rojo.

Esti sábadu, 20 de payares, Graciano García, presidente eméritu vitaliciu de la Fundación Príncipe d’Asturies va ser nomáu patronu d’honor de la Fundación Caveda y Nava nes sos octaves xornaes, que como siempres van tener llugar en Villaviciosa. Nel actu van lleer discursos, amás del reconocíu como patrón d’honor, Telvino González ya Inaciu Iglesias, presidente de la Fundación.

L’actu va entamar a les 12:30 hores cola ufierta florar a Xosé Caveda y Nava, cabo la so casa de nacencia. A la una, nel llar de la Fundación Cardín, va facese l’actu de nomamientu del nuevu patrón.

L’añu pasáu foi nomáu miembru Vicente Gotor, rector de la Universidá d’Uviéu; y n’otres ocasiones fueron nomaos Enrique Castro “Quini”, futbolista; Gabino Díaz Merchán, arzobispu d’Uviéu; o Emilio Marcos Vallaure, director del Muséu de Belles Artes.

Graciano García

Graciano García fundó nos años setenta la revista “Asturias Semanal”, onde apaeció la estaya Conceyu Bable, que dio entamu al surdimientu de la llingua asturiana y la so reivindicación moderna. Foi fundador y director de la Fundación Príncipe d’Asturies dende la so fundación y hasta esti añu, cuando pasó a ser presidente d’honor vitaliciu.