Sociedá

Na Xunta de Gobiernu celebrada’l pasáu 1 de febreru formalizóse la concesión alministrativa de l’Antigua Escuela de Comerciu a la entidá Fundación d’Escueles y Negocios d’Asturies (FENA), que va desenvolver nesti edificiu actividaes rellacionaes cola formación de personal directivu o de responsabilidá que pueda incorporase a les empreses.

Ente les obligaciones de la concesión, ta’l caltener actividá formativa; y facer inversiones de meyora nel edificiu, con un mínimu de dos millones d’euros en venti años, anque’l primer millón d’euros tien d’emplegase nos siete primeros años, a lo que se suma la entrega de 1,2 millones d’euros de canon al Conceyu a lo llargo de los 20 años pol usu del edificiu.

Tamién tendrá de disponer d’un espaciu p’actividaes de la Universidá, como les actividaes de la Cátedra y los cursos d’español pa estranxeros, amás d’habilitar un llugar con un mínimu de 150 places p’aula d’estudiu. Por tantu non solo se salvaguarden los compromisos cola Universidá d’Uviéu pa que pueda siguir faciendo actividaes nel edificiu d’empresariales sinón que tamién s’abre l’usu de los distintos espacios del edificiu a tola ciudá.

No que fai a l’adecuación del edificiu, hai una serie d’obres obligaes, como la eliminación de torgues arquitectóniques nel accesu al mesmu; el plenu caltenimientu del edificiu; arreglos necesarios en toles carpinteríes d’edificiu; y lo que tenga que ver con garantizar el plenu funcionamientu del inmueble.

El martes, 1 de febreru, tuvieron llugar les eleiciones sindicales pa renovar los Comités d’Empresa que representen a la mayoría del personal llaboral de l’Alministración Asturiana y el sindicatu alternativu CSI, Corriente Sindical d’Izquierda medró un 125 % al respective de los resultaos de 2006 (de 8 delegaos pasaron a 18), lo que pa la organización “supón un respaldu perimportante a una manera d’entender l’aición sindical que, colos sos erros y fallos, intenta ser honráu ya independiente perenriba de too”.

La CSI reclama agora tán na negociación del Conveniu Colectivu, “negociación que vamos intentar activar y frayar l’actual y absurda paralización”.

Resultaos completos de les Eleiciones

Ayeri moría na so casa d’Uviéu, Jesús Neira, cuando cuntaba con 94 años d’edá. El dialectólogu de L.lena yera miembru de la RAE y del RIDEA y diose a conocer nel añu 1951 cola publicación de “El habla de Lena”. Dempués espublizó llibros como “El bable, estructura e historia”, “Bables y castellano”, y el dialectolóxicu “Diccionario de los bables de Asturias”.

Yera Caderalgu Eméritu de Dialectoloxía na Universidá d’Uviéu y formaba parte del grupu cercanu a Emilio Larcos y xunto a esti y al filósofu Gustavo Bueno, fundó en 1988 l’asocación “Amigos de los bables”, dende la que llucharon contra toa midida de promoción de la llingua asturiana, difundiendo idees contraries a la normativización del idioma y promocionando’l nome artificial de “bables”, mientres criticaben l’usu del nome “asturianu”, el d’usu más habitual ente los falantes tradicionales de la nuesa llingua.

Cola so muerte marcha ún de los homes más contradictorios de la filoloxía asturiana, pues los sos estudios sobre l’asturianu tuvieron una gran importancia nel ámbitu académicu, pero les sos postures ficieron muncho dañu al procesu de recuperación del idioma de los asturianos.

N’Ast amosó al traviés d’un comunicáu la so satisfaición pol ésitu del festival musical ‘Xixón fala n’asturianu’, entamáu pola conceyalía de Cultura Tradicional del conceyu, cola collaboración de la Oficina de la Llingua, pero considera qu’esta triba d’actos “nun puen xustificar la falta d’una planificación, pública y asumida pol consistoriu xixonés, que garantice la normalización llingüística nel conceyu”, entamando, recuerden “pol respetu a los asturfalantes y que siga pola potenciación y deprendimientu de la nuesa llingua, énte’l conxuntu de la población xixonesa, con especial enfotu nel colectivu inmigrante que s’afaya desatendíu dafechu nesi aspectu”.

N’Ast ve con esmolecimientu como “mientres se faen celebraciones como la enantes mencionada, sigue ensin dase una situación de normalidá democrática en materia llingüística, tanto no que cinca a la toponimia, qu’en munchos casos nun respeta la propia normativa municipal, como en cuantes a garantizar l’acesu a la documentación y la información n’asturianu, nin munchu menos exercer el llexítimu drechu a caltener la comunicación col ayuntamientu en llingua asturiana”.

Nesti sen, encamienta a la Oficina de política llingüística, a la Conseyería de Cultura Tradicional, y a tolos partíos con responsabilidaes municipales, “a tomar en serio la cuestión llingüística, y aplicar midíes práutiques que valgan pa garantizar los drechos llingüísticos de los xixoneses y aíden a normalizar la nuesa llingua en Xixón”.

Sobre’l casu Riopedre

N’ast declaróse tamién sobre l’escándalu de corrupción que chisca al ex Conseyeru d’Educación, José Luis Iglesias Riopedre. Esperen que la so detención “seya la primera d’otres munches” y confíen en que bien aína tea que responder tamién “pol so llabor nel xenocidiu cultural protagonizáu pol PSOE n’Asturies”.

El Xovellanos acueye la tercer edición de “Xixón fala n’asturianu”

El Centru Xuvenil Santullano, d’Uviéu acueye un cursu de payasu o “clown” qu’imparte Gonzalo Fierren “Ignatius Flop”. Va tener llugar la fin de selmana de los díes 4, 5 y 6 de febreru con unes 16 hores de duración. El so preciu ye de 55 euros pa los non socios del Centru.

Los interesaos pueden facese con más información nel teléfonu 985 201 360, o na cai Fernández Ladreda, 48. Amás de na web: http://clowntigo.com/

Natur -Naturaleza y Turismu- entama estes xornaes sobre’l llobu y l’osu nel agospiu Vega de Hórreo, en Cangas, asitiáu nel parque natural de Fontes del Narcea, Degaña ya Ibias. Les feches son del 29 d’abril al 2 de mayu.

Consisten en rutes de monte pel Parque Natural pa conocer de cerca l’hábitat d’estes especies, los sos rastros, los problemes de caltenimientu y los trabayos que se tán llevando a cabu pa la so protección. Too ello acompáñase con charres, conferencies y proyecciones.

Más información sobre los actos

L’Academia de la Llingua Asturiana fai dos convocatories añales de conocencia de la llingua onde se puede evaluar los conocimientos básicos d’asturianu. La institución tien abuerta la convocatoria de xineru, que va tener por fecha pal esame’l 29 de xineru, con dos partes, estaya de llingüística y estaya de llingua y sociedá, faciendo prueba escrita y oral.

A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.Les persones que nun superen les pruebes del nivel 1 podrán presentase a nueves convocatories toles vegaes que-yos pruya.

El plazu de matrícula ye del 17 al 27 de xineru, pudiendo facese inscripciones na cai L’Águila 10 d’Uviéu o nel teléfonu 985 21 18 37, amás de nel corréu alla@academiadelallingua.com

Bases completes de la convocatoria

Esti martes 25 de xineru de 2011, los sindicatos CSI, SUATEA, CGT y CNT tienen convocada una manifestación con salida a les siete y media la tarde de la xixonesa plaza L’Humedal. Nella van refugase los recortes sociales que se tán dando y n’especial el “pensionazu”. Les organizaciones sindicales animen a participar nesta movilización xuntiraria.

El Patiu de la casa de Cultura de Grau acueye hasta’l día 18 de febreru la esposición temporal: “Mazcaraes n’Asturies” entamada pol Conceyu de Cultura Tradicional Vezos Ástures y que presenta un percorríu por delles de les más representatives mazcaraes d’iviernu d’Asturies que lluchen por nun perdese nesti momentu nel que’l disfraz y l’Antroxu perdieron el so ancestral significáu. L’amuesa componse de 5 paneles de gran formatu y 14 maniquís que representen les mazcaraes de Vos Reises del Valledor (Allande), los Sidros en Valdesoto (Siero), los Zamarrones de L.lena, y la Guirria de San Xuan de Beleño (Ponga), amás d’un vidiu documental complementariu que s’emite de forma ininterrumpida.

Conócense como mazcaraes d’iviernu a les celebraciones que se faen ente Navidá y Antroxu nes que los mozos amarútense y salen a percorrer los pueblos pidiendo l’aguilandu. Estes celebraciones tienen un orixe ancestral, munchu autores rellaciónenles coles fiestes romanes d’empiezu del añu pero la gran estensión del fenómenu por toa Europa paez confirmar la so mayor antigüedá. Per otru llau, el cristianismu asitió dalgunes de les sos festividaes más señalaes alredor del solsticiu d’iviernu y la llegada de la primavera al nun poder erradicar estos vieyos ritos.

Nel periodu ente Navidá y Antroxu empecipia l’añu agrariu. Por esta razón podemos considerar a les mazcaraes ivernices como un ritu de camín pa favorecer l’añu nuevu que trai amás elementos asemeyaos en cuasi toles mazcaraes peninsulares y europees: llueques, elementos vexetales, homes solteros, pidida d’aguilandu, pieles, ceniza…

Na actualidá caltiénsense bien poques mazcaraes d’iviernu n’Asturies: A Reisada en Tormaleo (Ibias), Vos Reises del Valledor (Allande), el Guilandu en La Puela (Allande) y Xedré (Cangas de Narcea), los Sidros en Valdesoto (Siero) y la Guirria de San Xuan de Beleñu (Ponga), sicasí hai munches referencies bibliográfiques y testimonios que confirmen la estensión d’esti tipu de celebraciones en tol territoriu asturianu: Los Bardancos de Casu, Los Zamarrones de L.lena, aguilandos en Quirós, Teberga, Pravia, Salas, Tinéu, farses na cuenca del Nalón o guirrios en Bimenes.

A lo llargo de la hestoria fuéronse perdiendo y tresformando con distinta suerte, en dellos casos fueron treslladándose dende l’entamu d’añu a Antroxu y n’otros desdibuxáronse los personaxes pero permaneció’l nome pa referise a cualesquier antroxáu.

Esta fin de selmana l’Atenéu Llibertariu d’Uviéu tien programaes delles actividaes. El vienres 14, dende les siete y media la tarde, van celebrar un alderique embaxo’l tema “El movimientu llibertariu y la cuestión llingüísitca n’Asturies” y el sábadu 15 va presentase la “Biblioteca Social de la CNT”, na capital d’Asturies. Les dos actividaes van facese nel Atenéu Llibertariu, na cai Ricardo Montes, 37, baxu (Ciudá Naranco).