Sociedá

L’Ayuntamientu de Xixón entruga a los asturianos, en xeneral, y a los xixoneses, en particular, onde pondríen el nueu llogotipu de la ciudá, cuatro pieces d’acieru macizo de 25 centimétros de grosor y más de dos tonelaes caúna, que miden pente 3 y 3,5 metros d’altor y entre 1,1 y 1,5 metros d’anchor. Cuatro lletres que según l’asociación “N’ast” dexen el topónimu oficial de la ciudá y menosprecien a los xixoneses. Pa la organización “l’Ayuntamientu (PSOE-IX) paez escaecer que’l nome Gijón/Xixón ye’l correchu, y nes lletrones, por muncho que lo antroxen de “llogotipu” lo que se llee clarísimamente ye Gijón: falta un cachu o sobra tou”, declaren.

N’ast tiénlo mui claro “nós pondríemos la escultura na papelera de reciclaxe” o “nel llistáu d’errores ortográficos” asina como “na llaaarga llista de les discriminaciones llingüístiques que los asturianos carecemos”. Pa N’ast, esi toponimón contradiz el llabor de la Xunta Asesora de Toponimia del Principáu d’Asturies, qu’entá l’añu pasáu espublizaba, en collaboración col Ayuntamientu de Xixón los cartafueyos de toponimia xixonesa, colos que se suponía afalaben a la población a usar los topónimos tradicionals y recuerden el testu qu’apaez tovía güei na páxina web del Ayuntamientu de Xixón, anque N’ast camienta “les sos propies directives nun van con ellos”:

“Agora son oficiales, agora usalos ye normal (…) delles veces un llugar tien dos nomes al mismu tiempu: como Gijón/Xixón y ye importante que les instituciones, les empreses, les asociaciones, entidaes y vecindá en xeneral tengan conocimientu de los nomes oficiales de los topónimos, pa que poquiñín a poco vayan usándose per escrito en lletreros, rótulos, vehículos, publicidá, cartelos, documentos, etc.(…)Afalamos a tolos vecinos y toles vecines de Gijón/Xixón a emplegar los nuestros nomes, los que la xente siempre dixo.”

La editorial Espublizastur acaba d’asoleyar el llibru últimu de David M. Rivas “Incompetentes y autoritarios. La industria de Xixón dende l’autarquía al desmantelamientu”, un ensayu sobre les claves de la evolución de la industria xixonesa ente 1940 y 1990, que como pue lleese na obra “Si tuviéramos que buscar dalguna alterística que desplique la evolución de la industria de Xixón pente l’autarquia de los cuarenta y cincuenta ya’l desmantelamientu de los ochenta y noventa, podríamos alcontrala na incompetencia y dexadez de la burguesía llocal y asturiana, perafitada nel autoritarismu’l modelu políticu implantáu tres la guerra civil”.

L’ensayu de David M. Rivas cunta con un llibretu central con una esbilla de semeyes del fotógrafu xixonés Xurde Margaride y un entamu del académicu de la llingua Roberto González Quevedo. El llibru d’esti reconocíu economista asturianu asoléyase dientru de la colección “Ensayu” de la editorial siendo l’únicu llibru de los ocho qu’agora mesmo componen la colección que cuntó con dalgún sofitu del Serviciu de Política llingüística d’Asturies, declaren de nde Espublizastur, qu’afirma que “Espublizastur ye, sinon la única, sí la editorial que más llibros espubliza ensin dengún sofitu istitucional, tantu cuantitativamente comu porcentualmente”.

David M. Rivas (Xixón, 1957), Doctor n’Economía y Profesor Titular de la Universidá Autónoma de Madrid ye, dende 1993, miembru de l’Academia de la Llingua Asturiana. Amás de la so bayurosa produición académica tien delles obres lliteraries y ensayos de distíntes temátiques.

La Cruz Encarnada d’Asturies precisa una cuidadora pa sofitar a persona con discapacidá na zona de Siero. La organización sociosanitaria ufierta un contratu de 4 meses, de llunes a vienres, de 17 a 20 hores, aproximadamente. Ye imprescindible cuntar con coche.

El plazu de solicitú ta abiertu hasta’l día 17 de xineru. Les interesaes han llamar al teléfonu 985 209 640.

La Procuradora Xeneral d’Asturies convoca esta Primer Edición del Premiu de Drechos Humanos, Premiu “Amparu de Drechos y Llibertaes”. El premiu tien por oxetu facer pública la reconocencia a aquella entidá privada, ensin ánimu d’arriquecimientu y con domiciliu nun estáu miembru de la Unión Europea, que se distinguiere, de forma relevante, na defensa y promoción de los drechos humanos y llibertaes públiques.

El premiu ta dotáu cola cantidá de diez mil euros (10.000 euros) y un diploma acreitativu. La concesión del premiu ye compatible cola de cualesquier otru gallardón que fuera otorgáu, con una finalidá igual o asemeyada por cualesquier institución, organismu internacional, alministración pública o entidá pública o privada. El plazu de presentación de candidatures remata’l 28 de febreru de 2011.

Más información nel BOPA de 29 d’avientu de 2010

Los Reis Magos d’Oriente aporten un añu más a Asturies pa repartir regalos perdayuri. Cola so habitual maxa son quien a apaecer en dellos conceyos con mui pocos minutos de diferencia. Uviéu, Xixón, Avilés, Mieres, Ribeseya, Tinéu, Candás, La Corredoria, A Caridá… llocalidaes del país enteru van recibilos a lo llargo de güei, esperando afalagalos abondo pa que’l 6 de xineru seya pesie a la crisis un bon añu de regalos de reis. Facemos un repás a los percorríos con más tradición.

Uviéu

La capital del país celebra una Gran Cabalgata de les sos Maxestaes los Reis Magos d’Oriente, el Príncipe Aliatar y la banda de música “Ciudá d’Uviéu” peles cais más céntriques de la ciudá, de magar les 18:30 hores. El pasucais real pasa peles cais Independencia, Uría, San Francisco, Plaza la Catedral, L’Águila, Xovellanos, Plaza del Carbayón, Alcalde García Conde, Cuadonga, Melquíades Álvarez y otra vegada, Independencia.

La Corredoria

El conceyu d’Uviéu cunta con otra cabalgata en La Corredoria. El pasucais va tar formáu anguaño por un séquitu de 150 persones y cunta con un presupuestu d’8.000 euros gracies a l’aportación de los establecimientos del barriu. La cabalgata va partir a les 19.30 hores de la cai Aguamiera y va rematar xunto al colexu.

Xixón

Nin tierra nin aire, los Magos d’Oriente recalen en Xixón per mar. Y va ser a les 11:30 hores del día 5 de xineru nel Puertu Deportivu de Xixón, xunto al edificiu de l’Antigua Rula. La cai Claudio Alvargonzález va ser, pos, onde tenga llugar la primera toma de contactu de Les sos Maxestaes colos sos miles de siguidores, que van acompañar a les sos Alteces Reales hasta la Plaza del Marqués pa guardar el curtiu discursu de bienvenida ya invitación a la posterior Cabalgata. Esti actu va dar el pistoletazu de salida a una xornada llena d’emoción pa los más pequenos.

Y yá n’horariu de tarde, a les 19:00 hores, va dar empiezu dende la Cai Río Eo, xuntu al Colexu Severo Ochoa, la esperada Cabalgata, que va prosiguir el so percorríu pela Carretera Carbonera, l’Avenida Schultz, l’Avenida de la Costa, Cabrales, la cai Menéndez Valdés, la Plaza del Parchís, la cai Xovellanos, la de los Moros, Munuza, la Plaza’l Carmen, la cai Felipe Menéndez y la de Marqués de San Esteban, hasta llegar a los Xardinos de la Reina, dende onde los Trés Reis Magos van dirixir a la Plaza Mayor pa dar en la llectura de los sos discursos dende’l Balcón del Conceyu, actu que va tener llugar aprosimao a les 21:00 hores.

Avilés

Los Reis Magos d’Oriente van llegar per barcu a Avilés esti miércoles y van desembarcar nos pantalanes del muelle deportivu, onde van ser recibíos poles autoridaes llocales. Dende ellí, van dir escoltaos por axentes de la Policía Llocal hasta’l Colexu El Quirinal, onde-yos esperará el so séquitu pa empecipiar la Cabalgata a les 18.30 hores.

La cabalgata va entamar na cai Xuan XXIII, pa siguir pela plaza del Vaticanu, Oreja Sierra, José Cueto, plaza de La Mercé, cai y plaza de Pedro Menéndez, La Muria y La Cámara, rematando n’El Parche. Yá nel edificiu consistorial, les SS.MM. los Reis Magos d’Oriente van dirixir unes pallabres a los avilesinos dende’l balcón central.

Ribeseya

Ye una celebración yá tradicional na villa. Tres la visita que’l príncipe Aliatar, unviáu de los Reis Magos, fai a tolos neños rioseyanos, realízase, nel víespora de Reis, la Cabalgata, que parte de la plaza d’Abastos encabezada pela Banda de Gaites de Ribeseya hasta llegar a la plaza de la Ilesia Parroquial.

Tinéu

La so primer parada va ser na Residencia de Vieyos El Mirador de Tinéu y siguen con un desfile pela villa de Tinéu, saludando a los más pequeños y dándo-yos regalos. De siguío van ser recibíos pol Alcalde de Tinéu, y los neños que quiera pueden visitalos na plaza del Conceyu.

Mieres

L’asociación Santa Bárbara y el Conceyu de Mieres tienen tou preparáu pa celebrar la cabalgata de los Reis Magos que, nesta ocasión, va cuntar con cerca de 150 figurantes. El desfile va entamar na redolada del Campus y va percorrer les cais del centru hasta’l parque Xovellanos. Tolos que quieran formar parte de la cabalgata tendrán d’averase al colexu Santiago Apóstol el día 5 a les 16:30 hores.

A Caridá

Na cabeza del conceyu d’El Franco la cabalgata entama a les 20:30 hores, cola arribada de los Reis Magos d’Oriente, anubriendo d’allegría, entusiasmu ya ilusión les cais d’esta villa occidental.

Candás

A partir de les 18:30 hores la Banda Gaites Candás va recibir a los Reis Magos que van entrar a Candás pel Paséu Maritimu y van llegar a la Plazuela de la Marinera. De siguío va empecipiase un desfile peles cais de la Villa aportando a la Ilesia Parroquial San Felix de Candás Dende ehí los Reis Magos van dir al Teatru Prendes pa falar a los neños del conceyu.

La revista d’investigación Cartafueyos d’ensayu de N’ast asoleya un númberu nuevu, que fai’l sestu na so colección. Nesta ocasión cuéntase con artículos d’autores como Xuan Porta Allende, David Gimeno i Ayuso, Inaciu Galán y González, Xaviel Vilareyo Villamil, Xulio Elipe Raposo “Xune” y Javier Cubero de Vicente. El númberu inclúi artículos sobre investigación lliteraria, drechos llingüísticos y hestoria política, ente otros temes.

El volume, del que pue descargase una amuesa en llinia, ábrese con un prólogu del director, Daniel Cueli nel que se fala de les novedaes que se presenten na revista na que los miembros de l’Asociación Cultural N’Ast quixeron dese un homenaxe, “xuntando unos cuantos testos nos que se fala, principalmente, de llingua y lliteratura asturianes”. Amás la revista, espliquen, estrena collaboración col Conceyu Bimenes, “primeru d’esti país en declarar la oficialidá de la llingua asturiana”.

Xuan Porta Allende abre les collaboraciones con “La llingua asturiana, ente les llingües nacionales del Estáu español”, siguiendo darréu un artículu espublizáu en catalán, llingua orixinal del autor y asturianu “Oficialitat?. No hi ha alternativa”, de David Gimeno i Ayuso. L’espaciu dedicáu a la lliteratura ábrelu Inaciu Galán y González con un “Averamientu a la figura del escritor Antón Forascepi (1869-1947)” y sigue nes lletres de Xaviel Vilareyo con un estudiu sobre’l “Vocabulariu asturianu na lliteratura de José María de Pereda”.

La revista recueye tamién el Pregón de la XIV Fiesta de la Oficialidá de la Llingua Asturiana. Bimenes 2010, qu’echó Xulio Elipe Raposo “Xune” y vuelve a editar, por fallos d’imprenta na anterior versión “L’Alianza Popular Revolucionaria Americana: Alderique ideolóxicu y práutica política”, de Javier Cubero de Vicente.

La revista aprovecha la ocasión pa convidar a investigadores y hestoriadores a unviar les sos collaboraciones pa númberos próximos. Los trabayos tendrán, como norma xeneral, un llargor máximu de 20 fueyes. Sedrán espublizaos n’asturianu, anque s’almitirán trabayos n’otres llingües, encargándose N’AST de la so torna. Los autores comprométense a correxir una prueba d’imprenta.

Cada artículu cuntará obligatoriamente con títulu y nome del autor. Acompañaráse d’una tarxeta onde se comuniquen señes, teléfonu y direición de corréu lletrónicu, los artículos presentaránse en formatu informáticu compatible colos procesadores de testos más avezaos al usu pa ordenadores. La cuenta pa recibir trabayos ye info@n-ast.org

Descarga de baldre una amuesa de la revista

L’Asociación Belenista d’Uviéu entrega esti martes, 4 d’avientu, premios y diplomes del so concursu de ñacimientos. L’actu va celebrase na Sala de Cámara del Auditoriu Príncipe Felipe, de magar les siete la tarde.

El Diputáu del Bloque por Asturies escribió al Ministru de Fomentu José Blanco, a los responsables de FEVE y RENFE y la Directora Xeneral de Política Llingüística pa que se resuelva la situación de la toponimia oficial nos servicios ferroviarios de RENFE y FEVE, que nun usen la toponimia oficializada pa les sos paraes y nomes de trayectos. Bloque por Asturies recuerda que “son yá años de magar se van aprobando los topónimos tradicionales como oficiales según manda l’Estatutu d’Autonomía y la Llei d´Usu y Promoción del Asturianu pero les empreses FEVE y RENFE siguen incumpliendo la llei y nun respeten los nomes oficiales qu’apaecen publicaos nel BOPA y que son los únicos oficiales”.

Dende la formación afirmen que son munches les persones que se tán poniendo en contactu con ellos pa resolver esta situación y como primer pasu el diputáu Roberto Colunga escribió cartes al Ministru de Fomentu Xosé Blanco, a los responsables de RENFE y FEVE y a la Directora Xeneral de Política Llingüística, Consuelo Vega, “pa saber si hai dalgún alcuerdu o contactu con estes empreses y por qué nun ye efectiva la oficialización”.

.

Esti vienres, 31 d’avientu, la tradicional Carrera Popular San Silvestre de Xixón va entamar a partir de les 16:15 hores con 800 metros pa persones discapacitaes, que van salir dende la escalera 8 y quince minuto dempués, col mesmu percorríu van salir los menores de 10 años. Les categoríes alevines, infantiles y cadetes van faer un percorríu de 2.200 metros a partir de les 16:35 hores.

Coles mesmes, la categoría de mayores va realizar un percorríu averáu de 6 kilómetros a partir de los cinco de la tarde. Dambes pruebes van salir dende l’Estadiu d’El Molinón y van rematar nel Edificiu Pescadería Vieya.

La Redacción d’Asturnews quixo sorprender a los sos llectores esti martes, Día de los Inocentes, y fízolo faciéndo-yos creer que’l Presidente José Luis Rodríguez Zapatero yera partidariu de la oficialidá del asturianu y diba dedicar el restu de la so carrera política a la creación d’una comunidá autónoma asturlleonesa. Dalgunos llectores, los más despitaos, nun cayeron na fecha na que tábemos y otros munchos sorrieron al dase cuenta del inocente engañu.

Un llector llamentábase consciente de que la noticia nun yera real “Que pena que seya 28 D” y felicitaba a la redacción d’esti mediu. Unu de los más inocentes confesaba “Redios,per un momentu quedare ablucau,y dempues de lleer los comentarios y decatame de la fecha que ye guei,menudu baxon. Trague fasta´l fondu. NON XUGUEIS CON ESTOS TEMES,QUE MANCAN jejeje “, bromiaba.

Otru, por embargu nun entraba pel espíritu de la fecha y pidía “más seriedá”. Otra llectora duldaba “Inocente inocente ¿no?” pa desear dempués “ya podía ser verdad”. Otru llector vía na parte dedicada a les declaraciones de los políticos asturianos sobre la “conversión” de Zapatero la parte más interesante “Lo meyor son les declaraciones de Javier Fernández y del PP”. Otros llectores ríense y comentaba “pasaronse col testu. que -yos enseña l lleones a les fies en la moncloa! jajaja” o “nótase damasiao’l día que ye…una pena” anque añadía “pero eso si que nun mos falte’l sentiu l’humor”.

Dalgunos proponíen dalgún añadíu a la noticia “¡¡Ta coyonudu!! Sólu-y falta al sou llau a Areces col lletreru n’eonaviegu. Anque eso sí que nun colaría…..”, “y qué diz JESÚS?”, en referencia a Iglesias, llider d’IX d’Asturies.

La Redacción d’Asturnews quier agradecer les muestres de ciñu y espera que los llectores sorrieran cola chancia, deseando a les persones que cada día mos lleen, lo meyor pal Añu 2011.

Noticia del Día los Inocentes: Zapatero conviértese nel primer presidente español qu’apoya la oficialidá del asturianu