Sociedá

L’Asociación “Amigos del Roble” anunció’l nomamientu de Nacho Fonseca, docente y fundador del grupu de música infantil en llingua asturiana Xentiquina, como Personaxe del Añu 2012 en reconocimientu a la so trayectoria a lo llargo de 35 años.

El músicu y maestru, acabante xubilar, dexó les sos llabores de responsable del grupu y profesor nel colexu “Xentiquina” de Lieres, anque la so actividá musical y de puxu y recuperación de la música y cultura asturiana sigue alantre.

“Amigos del Roble” anunció tamién que la cena homenaxe a Fonseca y a Lelo Cuesta, nomáu “Chigreru del añu”, tendrán llugar el 15 de xunu nel restaurante La Fusta d’Argüelles. Les invitaciones pueden retirase del 24 de Mayu al 11 de Xunu en Mesón Peñamayor, Texíos El Chico, Viaxes Astur Siero, El Cafetín, Llibrería San Vicente y el restorán La Fusta.

Esti xueves 31 a les 19 h. na Casona del Bravial continúen los actos de la Selmana del Asociacionismu en Samartín del Rei Aurelio cola charra “Normalización llingüística y asociaciones: los beneficios de trabayar en xunto” . Nesta charra va faláse-yos a les asociaciones de los recursos de los que disponen pa poder llevar a cabu los sos proyeutos en llingua asturiana, tanto a nivel alministrativu (sovenciones, cumplimentación d’impresos, documentación necesaria…) como a nivel llingüísticu (revisión ortográfica de los testos, redacción de los proyeutos, etc.)

Amás d’ufierta-yos esta información, tamién se van poner como exemplu otros trabayos y proyeutos que yá desendolcaron munches asociaciones del conceyu n’años pasaos en collaboración con esti serviciu. Lo que se pretende con too ello ye animar a estos coleutivos a llevar a cabu actividaes que supongan una contribución a la promoción y normalización social del asturianu.

/p>

El trabayu ufierta, al traviés de los sos 656 páxines, la estructura habitual nesti tipu d’estudios: curties notes sobre la vexetación, documentación fotográfica, taxonomía botánica actualizada, nomes vernáculos que se correspuenden colos usaos na contorna de L.laciana o nes vecines de Babia y Omaña, acercamientu a los principios de la etnobotánica colos taxones descritos, rematando con una bibliografía bien curtia pero práctica, y un glosariu de términos, que va ayudar siempres a estenar les duldes sobre la organografía vexetal. D’últimes, un pormenorizáu estudiu de 571 taxones que l’autor, bon conocedor del territoriu que tría, alcontró, investigó y fotografió a lo llargo de los últimos diez años, y agora espubliza.

Unu a unu, los 571 taxones qu’apaecen nes páxines del llibru son descritos pormenorizadamente tanto nes sos característiques como nel so hábitat y usos, cuntando con una o delles semeys de caún d’ellos pa la so correcta identificación. Nel casu de munchos, amás, añedir como complementu una o delles palabres na llingua propia del llugar, pa la so identificación polos paisanos. Dende árboles tan conocíos como l’abeduriu o l’ablanar, nel llibru pueden vese tamién los emblemáticos narcisos o grillándanes –en L.laciana llamaos gril.lándanas–, delles especies de felechos o’l Taraxacum lacianiense, nueva especie de xarol afayada na braña de Buenverde de Villager de L.laciana, con una semeya per vegada primera espublizada nun llibru.

L’autor del llibru, Luis Fernández Fernández (Carbayeda de Babia, 1957), ye babianu de nacencia y l.lacianiegu de vivencia. Trabayó mientres años como vixilante nes mines de la MSP y anguaño ta xubiláu. Amante de la naturaleza dende la so infancia, exerz altruistamente como anfitrión n’escursiones científiques y grupos de turistes y aficionaos, participando en charres divulgatives, grupos escolares, esposiciones y seminarios. Espertu aficionáu a la fotografía, dalgunes de les sos imáxenes fueron merecedores de premios ya ilustren llibros y publicaciones. Primeramente a esta obra, publicó’l llibru Rioscuro, imágenes en la memoria (2011), escoyeta hestórica y gráfica del so pueblu d’orixe.

Tal como describe nel prólogu’l catedráticu de Bioloxía Vexetal, Carlos Manuel Romero, Luis Fernández supo conxugar nel so llibru “intuitivamente la amenidadá y el rigor científicu, la impecable descripción fotográfica con curioses pincelaes etnobotániques, seique por cuenta de la so molición botánica y a la so fonda humanidá, reforzaes pol encantu ensin llendes del paisaxe forestal que contempla dende la so braña”. La bióloga y tamién prologuista de la obra, Cristina Carralero, encuádra-y nesa casta de naturalistes hispanos autodidactes que tan bonos servicios emprestaron a la naturaleza y a esta sociedá”.

La edición d’esti ambiciosu trabayu foi posible gracies a la collaboración de la Xunta de Castiella y Lleón, la Cátedra de Desenvolvimientu Sostenible y Mediu Ambiente de la Universidá CEU-San Pablo y Gas Natural-Fenosa. Cola so apaición, empecípiase una colección dedicada a la biodiversidá del Monte Occidental Ástur-Lleonés, na que bien llueu van ver la lluz nuevu referencies. Una colección que tien na dirección técnica a Antonio Galán de Mera y José Alfredo Vicente Orellana, dambos profesores de la Universidá CEU-San Pablo qu’estudiaron distintos aspeutos biolóxicos de la zona. El Club Xeitu pretende asina poner en valor y dar espardimientu a la biodiversidá del Valle de L.laciana y les sos contornes estremeres, territoriu protexíu por delles figures ambientales.

Esti miércoles 23, el periodista Inaciu Galán participó con una comunicación sobre l’escritor Pin de Pría nes xornaes sobre republicanismu federal entamaes pola asociación N’ast y la Sociedá Cultural Xixonesa na sede d’esta última institución. La charra centróse nun primer momentu en dar a conocer la vida y obra del que ye ún de los autores clásicos más reconocíos de les lletres asturianes. Darréu Galán estudió la influencia que pudo tener la so militancia política como republicanu federal na decisión de convertise n’escritor n’asturianu, qu’en pallabres del propiu Pin asocedió lleendo un artículu d’un reconocíu federalista.

Diose un repás tamién a les obres de Pin de Pría, destancando como pesie a la so encesa defensa del idioma asturianu, los artículos qu’espublizaba en prensa yeren entá en castellán, por mor de la diglosia predominante na dómina.

L’alderique centróse darréu nun discutiniu sobre les razones del menor desenrrollu y más tardiegu de la reivindicación llingüística n’Asturies, en comparanza con otros territorios del estáu español con llingua propia.

El profesor José Girón zarrará les xornaes nel mes de xunu.

El Niemeyes d’Avilés anuncia que yá queden poques entraes pa l’actuación del magu Tamariz, esti sábadu 26 de mayu a les 20.00 hores. El so espectáculu “Magia Potagia” ye un compendiu de los meyores númberos de Tamariz, en compañía de la maga colombiana Consuelo Lorgia, quien va ablucar al públicu coles sos dotes telepátiques.

Amás ye’l títulu del espectáculu de Juan Tamariz pa teatros, nel que pueden vese los meyores númberos ya ilusiones realizaes por Juan Tamariz nes sos 40 años de carrera. En contra de lo que la xente pueda pensar, Magia Potagia vese y nótase perfectamente nun gran teatru. Hai delles grandes ilusiones, munchos xuegos de participación col públicu y un importante momentu faciendo maxa de cerca, pero proyectando sobre una pantalla.

El Festival Internacional de Cine de Xixón presentaba’l so llogotipu nuevu, diseñáu pol artista Mariscal de cara al cincuenta aniversariu del mesmu. Esti nun inclúi les sigles que davezu veníen usándose n’otres ocasiones, y onde si apaecía’l topónimu asturianu (FICXixón), frente al nome completu del festival, onde tamién venía usándose la forma acastellanada de llamar a esti conceyu asturianu. La Xunta pola Defensa de la Llingua (XDLA) refugó dafechu al traviés d’un comunicáu lo que consideren “la eliminación del toponimu Xixón del logotipu nuevu del Festival Internacional de Cine”. Bloque por Asturies-UNA tamién se sumó a esta protesta que tuvo repercursión nes redes sociales, onde dalgunos asturianos pidíen esplicaciones a la nueva dirección del FICXixón, que precisamente ayeri cambiaba en twitter el so perfil, de FICXixón a FIC Gijón.

Pa la XDLA “la imposición d’esti diseñu, obra del valencianu Javier Mariscal, carga directamente contra la denominación del certame, onde taba yá plenamente normalizada la presencia del asturianu al traviés del usu del topónimu tradicional, que ye oficial dende setiembre del 2006.

La organización reivindicativa ve estes midíes como “rancies y involucionistes pa cola nuestra toponimia” y lláma-y l’atención “que vengan precisamente dende l’actividá de la Conceyalía de Cultura de Xixón, con unos responsables que tienen el mandáu de visibilizala y que, hasta’l momentu d’ostentar cargos públicos, desempeñaron un papel activu y destacáu nel procesu de dignificación de la nuestra cultura”, y más cuando “dende la Conceyalía de Cultura de Xixón anunciaren un cambiu na dirección del festival pa da-y un calter más asturianu y más popular”, espliquen.

La XDLA nun entiende cómo pue ser el certame cinematográficu más asturianu y popular si, nesta edición, el logotipu del festival desanicia la forma tradicional. Por too ello, esixen que, “de manera inmediata, se restituya la denominación de siempre al Festival Internacional de Cine de Xixón y reclamamos que, por coherencia cola so trayectoria asturianista, los responsables de Cultura de Xixón se pronuncien al respective”.

El voceru de Bloque por Asturies-UNA en Xixón treslladó esta mañana la sorpresa de la coalición pola supresión del topónimu “Xixón” nel nuevu logotipu del FICX, yá que “supón un importante pasu tras na normalización del asturianu y na visualización de la toponimia oficial”.

El Director Xeneral de Política Llingüística, Alfredo Álvarez Menéndez, acompañáu pol Director Xeneral d’Ordenación del Territoriu y Urbanismu, D. José Miguel García Arias, presenten en rueda de prensa’l “Nomenclátor Xeográficu de la Toponimia Oficial del Principáu d’Asturies”, un proyectu de catalogación, cartografiao y xerarquización de los nomes oficiales de les entidaes de población según consten nos Decretos d’oficialización aprobaos pol Conseyu de Gobiernu y publicaos nel BOPA.

Na presentación detallaránse los oxetivos y característiques d’esta ferramienta según los formatos nos que se podrá consultar y descargar. Dichu proyectu foi desenvueltu conxuntamente por estes dos Direcciones Xenerales, dientro del plan de midíes a “costu cero” anunciaes pola Dirección Xeneral de Política Llingüística al empiezu de la llexislatura. L’actu tendrá llugar el xueves 17 de mayu, a les 11:30 hores, na sede de la Conseyería de Cultura y Deporte na Plaza‘l Sol.

José Manuel Reguero Lopez, “El Maestru”, de Illas, fízose col nonu Premiu Pepe Campo de monólogos, convocáu pola Sociedá d’Humanitarios de Samartín. El testu titúlase “Un fallu tienlu cualquiera” y va recibir un diploma y 600 euros.

Ente los ganadores d’otres ediciones tán Carlos Alba Cellero, José Antonio de Dios o Benxa Pérez.

Facemos repás a la hestoria d’esti concursu, qu’entama en 1997

La Xunta pola Defensa de la Llingua Asturiana (XPDLA) ta acabante denunciar la “escasa presencia” que tuvo la Selmana de les Lletres Asturianes nos medios de comunicación públicos, amás de protestar pola non celebración del actu de llectura de testos n’asturianu na Xunta Xeneral.

Esti actu institucional celebráu dende va siete años yera según la Xunta “un homenaxe al nuestru idioma, la nuestra lliteratura y los nuestros escritores, mostrando asina lo que significa la llingua y lo que tendría que ser pa los nuestros representantes políticos: una fonte de consensu y un patrimonio de tolos asturianos, sía cual sía la so ideoloxía”. Un actu que pa la XPDLA se convirtiere col pasu los años “nun de los más mediáticos de la Selmana de les Lletres, con gran visibilidá gracies a l’atención que-y daben los medios de comunicación”.

Pa la XPDLA la importancia d’esti actu vien de les poques xornaes “onde’l nuestru idioma tien güecu –siempre de manera testimonial– dientro de la Xunta Xeneral”.

En cuantes a la cobertura de la RTPA, denuncien que nun retresmitió esti añu la Xunta Estraordinaria que fai cada añu l’Academia de la Llingua Asturiana nin emitió nengún programa especial dedicáu a los autores d’esti añu Benito de l’Auxa y Antón Balvidares, como si ficieron otros años nel programa Nomes d’Asturies, de la RPA. Dende la organización ciudadana recuerden que la RTPA ye “una entidá pagada coles perres de tolos asturianos y que tien ente los sos principios la promoción del nuestru idioma”.

La Ilesia de San Pedru, na playa San Llorienzo de Xixón, va acoyer esti miércoles 9 de mayu’l funeral pol alma del ex Presidente d’Asturies, Sergio Marqués. De magar les seis de la tarde, la ilesia xixonesa recibirá a familiares, amigos y toles persones que quieran despidilu.