Sociedá

L’Atenéu Xovellanos de Xixón acueye la conferencia del antropólogu Roberto González-Quevedo “La cultura asturiana. Introducción a l’antropoloxía d’Asturies”, que va tener llugar a les 19:30 hores na sede d’esta institución xixonesa, na vieya Escuela Comerciu, asitiada na cai Francisco Tomás y Valiente. Na conferencia va presentase’l llibru del mesmu títulu asoleyáu por CH Editorial. L’actu preséntalu Xosé Nel Riesgo, director de la Fundación Municipal de Cultura de Xixón.

L’autor lleonés Roberto González-Quevedo (Palacios de Sil, Lleón, 1953) ye quiciabes la figura más visible na recuperación de la llingua asturiana al sur del Cordal. Escritor, filósofu, antropólogu y llingüísta, lleva al llombu una llarga carrera, trabayando dende los años ochenta pol usu de la variedá occidental del asturianu. Ye miembru de númberu de l’Academia de la Llingua Asturiana ocupando anguaño’l cargu de secretariu, y director de la revista Cultures, amás de profesor universitariu.

El martes 19 de xunu, a les 12:00 hores, na Sala de Conferencies del Centru de Cultrua Antiguu Institutu, foi la presentación del material didáuticu ganador del quintu concursu Vas velo, trebeyos pal aula, organizáu pola Oficina de Normalización Llingüística de Xixón, nel que participaron los Institutos d’Enseñanza Secundaria del conceyu. Nel actu tuvieron presentes el conceyal d’Educación, Cultura, Xuventú y Fiestes, Carlos Rubiera Tuya, la profesora de llingua asturiana del IES Número 1, Mª Paz Fonticiella Gutiérrez, la xefa d’estudios del centru, representantes del alumnáu del institutu ganador, asina como la Responsable de la Oficina de Normalización Llingüística, Mª Xosé Rodríguez López.

Esti ye’l quintu añu que se fai’l concursu, que consiste na preparación de materiales escolares pa trabayar la llingua asturiana nel aula. Presentáronse mozos y moces de dellos institutos de la ciudá y el premiu consistió nuna seleición de discos n’asturianu y na publicación del trabayu ganador.

El trabayu ganador d’esti añu fui: “¿ANTROXAMOS?” un prestosu percorríu peles tradiciones del antroxu asturianu entemecíu con refranes y espresiones de la nuestra llingua al rodiu la comedera. D’esti trabayu son autores: Gaël Acebal Anta de 3U d’ESO, Beatriz Riesco Valcárcel de 3U d’ESO, Lucía Aroa Alejos García de 4U d’ESO y José Antonio Brito Molina de 4U d’ESO.

El xuráu valoró positivamente la presentación mui ellaborada y orixinal d’entrambos trabayos, los temes variaos de los conteníos y centros d’interés que planteguen. El xuráu entendió tamién que ye mui entreteníu y didáuticu colo que pue ser una bona ferramienta pa les clases de los caberos cursos d’Educación Primaria, pa la E.S.O. y pal Bachiller, al tiempu qu’ufierta la posibilidá de trabayar el pallabreru de la comedera, los refranes y dichos d’iviernu y plantega cuestiones que posibiliten el conocimientu del patrimoniu cultural asturianu, sobremanera no que tien de ver cola pintura y les fiestes d’antroxu.

Dende la Oficina camienten qu’ha valorase tamién mui positivamente “el trabayu de tol alumnáu y de los y les profesores d’asturianu que contribuyeron a qu’esta quinta edición del concursu tuviere un nivel tan altu, polo qu’hai que felicitar igual a ganadores como al restu de participantes y animalos a participar n’ediciones vinientes”.

La Tertulia Cultural El Garrapiellu organiza un añu más la Marcha de Xixón a Cuadonga, nesta ocasión los díes 13, 14 y 15 de xunetu. El preciu por persona ye de 83 euros pa los socios del Garrapiellu, y de 88 euros pal restu de la xente. Esti preciu inclúi cena, agospiu y almuerzu dos díes –en Sietes y en Llames de Parres-, y l’autocar de vuelta de Cuadonga a Xixón. Esta hestórica sienda vien faciéndose n’Asturies dende va sieglos. El Garrapiellu recuperóla y señalizola va cuasi venti años y anguaño vive un momentu de gran popularidá.

La reserva de places fadráse per aciu l’ingresu de la cantidá oportuna na cuenta 3007 0100 11 1131883827, de la Caxa Rural de Xixón, col 9 de xunetu como últimu día. Nel ingresu ha figurar el nome de la persona, y un númberu de teléfonu pal contactu. El xustificante del ingresu ha presentase nel momentu de la salida de la marcha, que será a les 8,30 del vienres 13 dende’l Güeyu Deva.

Esti añu contaráse tamién col serviciu d’un coche d’apoyu. Ésta ye una iniciativa personal y desinteresada d’un miembru d’El Garrapiellu, y la so función ye la evacuación de les persones que tuvieren menester d’ello, por lesión, enfermedá, etc. Poro, el coche d’apoyu nun tresportará más equipaxe que’l de les persones que tengan de ser evacuaes. Pa más información puede llamase al teléfonu 629 059 363.

El llunes que vien, 18 de xunu, la estaya de la muyer del PP de Xixón entama una Xornada de Lliteratura y Cultura Asturianes nel Centru Cultura Vieyu Institutu. L’entamu será a les once la mañana cola presentación de la xornada, por Pilar Fernández Pardo (presidenta del PP de Xixón) y Elena González (resposnsable de la Estaya de la Muyer). Darréu podrá sentise la conferencia “Introducción a la etnografía asturiana” pol investigador Alberto Álvarez Peña y proyectaráse’l documentos “Rincones secretos: Mitología de Asturias”, d’unos 22 minutos. A les 12:45 entamará l’últimu de los actos, una charra de l’Academia de la Llingua Asturiana titulada “Trés décades d’estudiu, promoción y defensa del patrimoniu llingüísticu”, que cuntará cola intervención d’Ana María Cano González, presidenta de la institución, y l’académicu Xosé Antón González Riaño.

Pela tarde proyectaráse’l documental “A bruxa de Brañavara” de 40 minutos de duración. Darréu celebraráse una mesa redonda titulada “Introducción al doblaxe cinematográficu en llingua asturiana”, pol xestor cultural Humberto Gonzali y cuntando cola participación del actor Antón Caamaño y del realizador Illán Gonzali.

Darréu proyectaráse “Esbilla de cinema n’asturianu”, uno venit minutos con una selección d’escenes correspondientes a cuatro xéneros cinematográficos distintos: infantil, cine negru, western y fantásticu.

La xornada va rematar cola conferencia “Lliteratura asturiana en femenino. Muyeres escritores n’asturianu y en gallego-asturianu”, pola poetisa y narradora Aurora García Rivas.

Janick Le Men ye una de les filólogues que conoz el léxicu lleonés con más fondura. Lleva cuasi venti años axuntando tolos vocablos de la nuesa llingua en Lleón, y tien espublizada una colección de volúmenes con miles de pallabres. El sestu ye l’últimu y acaba de velu impresu. Dende “ababayos” y hasta “zuzaina” sepártenla más de venti años y miles de pallabres del nuesu idioma al otru llau del cordal.

Le Men estudió Filoloxía Francesa en París y Reims y nel añu 1973 vieno a Asturies. N’Uviéu dio clases na Alliance Française y conoció al pintor lleonés Alejandro Vargas, col que casó. Yá en Lleón estudió Filoloxía Hispánica y con José Ramón Morala, miembru d’honor de l’Academia de la Llingua Asturiana.

La Fundación Monteleón espubliza los sos llibros de léxicu en “Fuentes y estudios de historia leonesa”.

Entrevista a Le Men n’Asturnews (2010)

La Conceyalía d’Educación, Cultura, Deporte y Fiestes de Xixón, dirixida por Carlos Rubiera, organiza esti maetes 12 de xunu, a les 17:00 hores, nel CP Tremañes, la presentación del Pallabreru del Baloncestu, espublizáu pola Oficina de Normalización Llingüística de Xixon.

Nel actu va tar presente’l prologuista de la publicación y ex xugador del Xixón Baloncestu, Ed Johnson. Amás, y como parte del actu, va xugase un partíu de baloncestu con neñes del CP Ríu Piles y CP Tremañes al tiempu que va cuntase cola collaboración de Santiago Cubillas radiando toles xugaes n’asturianu.

El Conceyu de L.lena va celebrar esta selmana’l Día Mundial del Mediu Ambiente nes escueles. La campaña promovida pol Serviciu de Normalización Llingüística va consistir nel repartu de materiales didácticos nos que se quier afondar nel tema del reciclaxe y la separación de residuos. La campaña pretende iniciar a los más pequenos del conceyu na recuperación y respetu pola contorna natural. Los materiales son unes lámines-xuegos qu’han recortar y crear unos roscos nos que dir encaxando los residuos que xeneramos tolos díes nel so correspondiente contenedor.

Amás, la lámina incluye otra actividá de manualidaes como’l reciclaxe de tetrabrick nuna cartera prestosa. Los materiales repartiéronse peles escueles del Conceyu col fin de que los materiales lleguen a tol alumnáu, nun solo a los escolinos de llingua asturiana, anque na mayoría de les escueles hai un porcentaxe mui importante del alumnáu que ta matriculao en llingua asturiana, llegando casi al 100% de matriculación en dalguna.

Los materiales van colgase tamién de la páxina web del conceyu: www.aytolena.es, nel apartáu de política llingüística.

Aconceyáu’l Xuráu del Concursu d’Investigación de Recoyida de material toponímico oral, que convoca l’Academia de la Llingua Asturiana correspondiente al añu 2012 apautóse en premiar el trabayu tituláu Toponimia de la parroquia de Proaza. Conceyu de Proaza, del que son autores Antonio Alonso de la Torre y Francisca Iglesias Álvarez. El Xuráu taba formáu por Ana María Cano González como presidenta, Xosé Lluis García Arias como vocal y Alfonso Martín Caso faciendo de secretariu.

Dientro d’esta estaya, concediéronse tamién un primer accésit al trabayu Toponimia de la parroquia de L’Arteosa (Piloña), d’Aurina González Nieda y Jerónimo González Cueto, y dos segundos accésits correspondientes a los trabayos Toponimia de les parroquies de Riañu (Llangréu) y La Pasera (Noreña), de Xabiel Fernández García, y al estudiu La parroquia casina de Caliao. Material toponímico de la totalidá d’esta collación de Xulio Llaneza Fernández.

Asina mesmo, el Xuráu del Concursu de Teatru, compuestu por Miguel Ramos Corrada como presidente, Xosé Ramón Iglesias Cueva como vocal, faciendo de secretariu Adolfo Camilo Díaz, premió nesta convocatoria la obra titulada Pa L’Habana, de la que ye autor l’escritor candasín Xurde Fernández Fernández.

Un informe tituláu “Definir el términu “asturianu” con xeitu. Informe sobre la presencia del vocablu “asturianu” y otros términos nos diccionarios normativos d’otres llingües” va presentase esti llunes na sede de la Real Academia Española (RAE). Un trabayu que propon a la RAE que’l términu “asturianu” dexe de referise a “dialecto” nel so diccionariu, “pa responder a la realidá ciéntifica y llegal, que dexa a les clares que l’asturianu ye un idioma”. Avalen esti informe un llistáu de profesores, que sigue creciendo, y qu’inclúi a más de 10 universidaes de países como Xapón o Portugal, a l’actual decana de la Facultá de Filosofía y Lletres de la Universidá d’Uviéu y a caderalgos y profesores.

Pa Iniciativa pol Asturianu ye innegable “la necesidá de cambiar esta definición” del Diccionario de la RAE, pues ye pa ellos “una cuestión de respetu a la realidá sociollingüística d’Asturies y del restu de los territorios asturfalantes”.

El presidente d’Iniciativa pol Asturianu, Inaciu Galán, tará esti llunes en Madrid pa presentar en mano ante la Real Academia Española (RAE) na sede de la institución, na cai Felipe IV, 4, de la capital estatal. Xunto a esti informe presentaránse los avales y una carta dirixida al Presidente de l’Academia.

La Xunta pola Defensa de la Llingua Asturiana (XDLA) considera fundamental la presencia efectiva nel Gobiernu de cargos con capacidá y rangu “pa poder sacar alantre les midíes contemplaes na llexislación pa desenvolver polítiques afayadices pal futuru de la llingua asturiana”. La organización de defensa de los derechos llingüísticos pidió al traviés d’un comunicáu “abrir una dómina nueva qu’asegure, non solo los derechos básicos, sinón tamién la tresmisión interxeneracional y el prestixu públicu pal idioma”.

Pa la XDLA, esta presencia efectiva tien que tar inspirada y venir determinada pola tresversalidá, p’asina caltriar en tolos departamentos de l’Alministración. Esto ye, qu’a los tradicionales ámbitos de Cultura y Educación –onde l’asturianu ha tener la más alta representación política y alministrativa–, han sumase les demás Conseyeríes que, coordinaes dende la Presidencia, tienen que tener la capacidá real de facese presentes y vertebrar tol territoriu asturianu al traviés del nuestru idioma.

Otra manera, la organización entiende que la fusión de les conseyeríes de Cultura y Educación “nun pue suponer recortar el rangu qu’hasta’l momentu tuvo l’idioma dientro del organigrama del Gobiernu”. Por eso, la XDLA solicita’l mantenimientu de la Dirección Xeneral de Política Llingüística dientro de l’actual Conseyería que dirixe Ana González. La estructura nueva, amás, pue permitir una mayor coordinación ente les midíes de promoción social y les desarrollaes nel ámbitu educativu, dos estayes fundamentales p’asegurar el futuru de la llingua asturiana.