Sociedá

La dirección d’Iniciativa pol Asturianu espresó’l so sofitu a la familia de Sergio Marqués, ex Presidente d’Asturies, recordando’l so compromisu cola llingua asturiana, que, recuerden “llevólu a convertise nel únicu presidente qu’aprobó una Llei d’Usu del Asturianu nos más de trenta años d’autonmía asturiana”.

Amás, la organización esplicó que Marqués “defendió la necesidá de que l’asturianu fuera un idioma oficial n’Asturies, llevándolo nos programes políticos colos que concurrió a elecciones, participando nes manifestaciones pola oficialidá y numberoses intervenciones en prensa2.

Por ello, pa Iniciativa pol Asturianu “ye un exemplu pa la clas política asturiana, na que tovía s’observen resistencies a normalizar la situación del asturianu”. La nota remata recordando les pallabres del propiu ex Presidente qu’espresaba la necesidá de “volver a sentir arguyu de la nuesa llingua”.

Na mañana de güei, martes 8 de mayu, l’abogáu y ex Presidente d’Asturies, Sergio Marqués, sufría un infartu al salir a la cai nel so despachu en Xixón. Tres atendelu na cai ye treslladáu al Hospital de Cabueñes mui grave, onde morría darréu a los 65 años. La so vida tuvo dedicada a l’abogacía y a la política, llegando a convertise en Presidente d’Asturies, ente 1995 y 1999, tiempu nel que fizo posible l’aprobación de la primer, y hasta agora única, Llei d’Usu del Asturianu, que se convirtió nun importante sofitu llegal pal idioma.

Sergio Rutilio Marqués Fernández, ñació en Xixón en 1946 y yera Llincencáu en Drechu pola Universidá d’Uviéu. En 1977 forma parte del grupu que funda Alianza Popular en Xixón. Ente 1987 y 1991 ye diputáu y en 1993 conviértese nel vicepresidente del PP d’Asturies, y dempués de la renuncia d’Isidro Fernández Rozada, ye nomáu candidatu a la Presidencia d’Asturies, venciendo por mayoría simple al socialita Antonio Trevín, entós presidente en sustitución del dimitíu José Luis Rodríguez-Vigil.

En 1998 el Partíu Asturianista de Xuan Xosé Sánchez Vicente aprovecha la mayoría simple de Marqués pa forzar l’aprobación d’una Llei d’Usu del Asturianu, mui criticada entós pol sector asturianista de la sociedá, pero que dende entós ye la única ferramienta llegal esistente. Amás aprueba importantes presupuestos pa política llingüísticos, que tardaríen diez años n’igualase.

Los sos problemes con Francisco Álvarez-Cascos, entós vicepresidente d’España y secretariu xeneral del PP estatal, faen que Marqués, alegando que nun se taba respetando l’autonomía del gobiernu asturianu, fuera espulsáu xunto a otros cuatro diputaos el Partíu Popular, creando la Unión Renovadora Asturiana (URAS), que gobernaría hasta 1999 nuna minoría absoluta.

En 1999 preséntase a les elecciones cola URAS, un partíu alredor del que s’axuntaron munchos ex populares pero tamién xente asturianista que venía d’otres formaciones. La URAS de Marqués defendó siempres la oficialidá del asturianu y consiguió trés diputaos, que nun podría revalidar en 2003. En 2007 Marqués foi candidatu per última vegada, xunto al PAS y Xuan Xosé Sánchez Vicente, colos que configuró la coalición Unión Asturianista URAS-PAS, que se fizo con 11 conceyales, pero quedo a unos miles de votos de facese col diputáu. En 2011 foi l’últimu de la llista nacional d’URAS-PAS, como soifitu al candidatu Sánchez Vicente, que tampoco pudo nesta ocasión tornar a la Xunta Xeneral.

Sobre la oficialidá del asturianu dixo, ente otres coses: “-Nun entiendo la oposición a esto, el bable ye unu de los sistemes llingüísticos más antiguos de la hestoria española, yo nun falo bable, pero gustaríame la cooficialidá y voi faer lo que tea na mio mano dende onde proceda pa consiguilo” (7 de marzu de 2007, Villaviciosahermosa.com)

La lluvia nun foi a callar al movimientu de reivindicación llingüística asturianu. Miles de persones percorrieron les cais d’Uviéu na manifestación añal organizada pola Xunta pola Defensa de la Llingua Asturiana, dende la estación de Renfe y hasta les puertes del Teatru Filarmónica. “Yá, yá, yá, oficialidᔠy “La llingua vive, la llucha sigue”, ente los glayíos que más pudieron sentise nesta xornada, que remató con un discursu na Plaza Porlier, de la mano de Paula Cristóbal, de la XPDLA.

Nel discursu, Cristóbal calificó a la clas política asturiana de “mediocre y incompetente” y acusólo de llevar años “inorándonos, mintiéndonos y estafándonos”, no que cinca a cuestiones llingüístiques.

La representante punxo’l contrapuntu recordando que “Nes ultimes décades fuimos quien a construyir un movimientu social humilde y dignu con capacidá pa entamar campañes, reclamaciones y demostraciones unitaries, de valor y de compromisu”, que punxo l’alderique sobre l’asturianu y el so futuru na cai y na clas política.

Pa la XPDLA esti día reivindicativu llega “depués d’un añu de tiempu perdíu, parálisis y inmovilismu” que va tener por respuesta “la reivindicación permanente”. Ente les afirmaciones de Paula Cristóbal la de que la “burocracia política insensible colos derechos llingüísticos yá fiede”, recordando cómo los tribunales-y quiten la razón, en referencia a la recién decisión del Tribunal Cimeru qu’elimina’l cupu d’ocho alumnos pa l’asignatura d’asturianu.

Cristóbal pidió “trabayar pa que l’airón de la nuestra indignación arrastre’l so inmovilismu y la so axenda oculta de desaparición de la nuestra llingua”, recordando que ye “tiempu de nós”, un tiempu qu’esplicó ha ser “d’axuntanos, d’analizar en conxunto, de reforzar la reivindicación llingüística y les sos bases teóriques, d’actualizar les actividaes y los discursos énte los cambios na realidá y na sociedá”.

Darréu el discursu dibuxó un murniu panorama, recordando’l pieslle de Les Noticies, les llibreríes de llibru n’asturianu, la escasa presencia del asturianu nos medios públicos y la protestando pola reducción de les sovenciones a la promoción llingüística. La vocera de la Xunta llamó a “siguir lluchando pola oficialidá del asturianu”, rematando con un “Vamos conquistar un futuru pa la nuestra llingua y pa la nuestra sociedá”.

Na manifestación participaron colectivos y partíos políticos como Bloque por Asturies-UNA, Andecha Astur, Comisiones Obreres Enseñanza, onde pudo vese a Jesús Iglesias, llíder d’Izquierda Xunida d’Asturies, Iniciativa pol Asturianu, FETE-UXT, CSI y grupos de defensa del gallego-asturianu.

Discursu completu

La organización Iniciativa pol Asturianu va participar esti vienres 4 de mayu na Manifestación pola Oficialidá, n’Uviéu. Esti actu reivindicativu que se celebra coincidiendo col Día de les Lletres Asturianes, convócalu dende va décades la Xunta pola Defensa de la Llingua Asturiana. Iniciativa pol Asturianu fizo un llamáu a la sociedá pa participar nesta reivindicación, perimportante pal futuru d’Asturies y de la so cultura.

Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial, espliquen.

Por ello Iniciativa pol Asturianu convida a toles persones a sumase con ellos a esta manifestación, onde aprovecharán pa siguir faciendo socios y dando a conocer la nuesa actividá.

La oficialidá nun ye una varina máxica que vaiga solucionar tolos problemes del idioma d’una vegada, pero sí ye imprescindible pa que’l procesu de recuperación del asturianu pueda llevase alantre.

Iniciativa pol Asturianu aprovecha pa recordar que dempués de la manifestación va celebrase nel Teatru Filarmónica la Xunta Estraordinaria de l’Academia de la Llingua Asturiana, que nestos momentos pasa per una situación d’estrema debilidá presupuestaria, polo que ye necesario sofitar a la institución más que nunca, acudiendo al actu que ye d’entrada llibre.

Güei, miércoles 2 de mayu,siguen los actos de la Selmana de les Lletres Asturianes . A la una la tarde, el Paraninſu de la Universidá d’Uviéu acueye la presentación del llibru “Poesíes de Benito de l’Auxa y Antón Balvidares”, a cargu de Xuan Carlos Busto, profesor de la Universidá d’Uviéu. En Candás, a les 19,30 hores, la Biblioteca Carlos González Posada va acoyer el Descubrimientu d’una placa dedicada a Benito de l’Auxa. Y, darréu, la conſerencia «El poeta candasín Benito de l’Auxa: ente Marirreguera y Xovellanos» por Xuan Carlos Busto.

La 33 Selmana de les Lletres Asturianes céntrase, al abellugu del bicentenariu de la muerte de Gaspar de Xovellanos y de la promulgación de la Constitución de Cádiz, na recuperación de dos poetes coetanios, Antón Balvidares y el presbíteru Benito de l’Auxa.

El xueves, 3 de mayu, los actos treslládense a Sariegu. A les siete la tarde, en La Casa Riba (Valvidares), va descubrise una placa dedicada a Antón Balvidares na so casa natal.

A les 20,00 hores, na Casa Cultura de Vega, nel mesmu conceyu, conſerencia «Antón Balvidares Argüelles: un poeta sareganu de la Ilustración asturiana» por Florencio Friera Suárez (RIDEA).

Esti miércoles, 2 de mayu, a les 17 hores, y con motivu de la XXXIII Selmana de les Lletres Asturianes, el Partíu Popular de Xixón celebrará un actu conmemorativu na so sede, allugada nel primer pisu del 3 de la cai Alvarez Garaya. Nesti actu va rendise homenaxe a la Poesía Asturiana Contemporania en forma d’una llectura colectiva de testos d’autores n’asturianu y en gallego-asturianu, participando militantes y simpatizantes de la formación.

La conceyala y presidenta del PP xixonés, Pilar Fernández Pardo, presentará l’actu. Lleeránse poemes, ente otros, de Pablo Ardisana, Nel Amaro, Xosé Manuel Bolado, Xosé Manuel Valdés, Aurora García Rivas, Xuan Xosé Sánchez Vicente, María Teresa González, Roberto González-Quevedo, Miguel Rojo, Ánxel Álvarez Llano, Antón García, Xosé Antonio García, Ignaciu Llope, Lourdes Álvarez, Humberto Gonzali, Berta Piñán, Aurelio González Ovies, Marta Mori, Xabiero Cayarga, Xuan Santori, Chechu García, José Luis Rendueles, Martín López-Vega, Pablo Texón y Rubén d’Areñes.

Esti llunes 30 tendrá llugar la entrega del III Premiu d’Ensayu Emilio Trabanco Trabanco, qu’añalmente concede la revista La Sidra y que patrocina’l Llagar de Trabanco. Nesta edición el xuráu, compuestu por David M. Rivas (presidente), Antón Fuertes, Inaciu Hevia Llavona y Antonio Fernández Álvarez, alcordó por unanimidá otorgar el Premiu Emilio Trabanco a Antonio Martínez Fernández por su obra “Noreña y la sidra. Apuntes sobre la historia d’un conceyu sidreru”.

Arriendes d’ello, el xuráu valoró perpositivamente la calidá del restu de trabayos presentaos y confirma’l “cada vuelta mayor nivel de les obres que se presenten a esti premiu”, qu’algama yá la so tercer edición.

En pallabres del autor:”Noreña y la Sidra” tien un oxetivu primeru, el d’emponderar una industria escaecida nel conceyu,la de la sidra, que tuvo un pesu relevante na hestoria de Noreña y que, polo xeneral, o nun se tien en cuenta o trátase de forma anecdótica n’obres xenerales sobro’l conceyu”.

El próximu vienres, día 4 de mayu, nel Teatru Filarmónica d’Uviéu, va celebrase’l xxxiii Día de les Lletres Asturianes a les 20,30 hores. L’Academia de la Llingua Asturiana, entidá organizadora, ta acabante dar anuncia de los participantres nel actu: Paz Rendueles (Vicerrectora d’Investigación de la Universidá d’Uviéu), Lisardo Lombardía (Direutor del Festival Interceltique de Lorient-France), Pedro Suárez (matemáticu y profesor), Pilar Rubiera (periodista, especialista en temes culturales), Ricardo Saavedra (músicu y escritor) y Luis Arias Argüelles-Meres (Caderalgu d’Enseñances Medies). Les sos intervenciones xirarán al rodiu de les posibilidaes de futuru de la llingua asturiana.

Esta Xunta Estraordinaria de l’Academia de la Llingua Asturiana finará col discursu institucional de la presidenta, Ana María Cano González.

L’actu, presentáu por Sonia Avellaneda y Próspero Morán, director d’Asturnews, cuntará con un entamu musical a cargu del acordionista Xuan Nel Expósito y de la cantante Marisa Valle Roso y tendrá como pieslle l’actuación de la Banda Gaites Villaviciosa.

Iniciativa pol Asturianu quier celebrar el Día del Llibru colos sos socios. Por ello tolos que se faigan socios miembru (7 euros al mes o 60 euros al añu) a lo llargo de la selmana del 23 al 29 d’abril van recibir un llibru n’asturianu de regalu. Amás, coinciendo col entamu de la Selmana de les Lletres Asturianes, van sortear un llote de 10 llibros y revistes n’asturianu ente los sos socios.

Los interesaos en facese socios pueden escribir a contautu@iniciativapolasturianu.org

El pasáu 13 d’abril finó n’Uviéu a los sesenta y ocho años, Joaquín Fernández García. Doctor en Medicina, escritor n’asturianu y en castellán, y sobre manera divulgador de la etnografía del Altu Ayer, onde tenía los sos raigaños familiares, pese a que ñaciere n’Uviéu, en 1943. Yera miembru del Real Institutu d’Estudios Asturianos, pero al mesmu tiempu vieno collaborando cola Academia de la Llingua Asturiana dende entamos de la década de los noventa, con ensayos en Lletres Asturianes y Cultures alredor de la medicina popular n’Asturies. Con Ediciones Trabe asoleyó delles noveles nes que recoyía bayura d’elementos etnográficos.

Dexó ocho collaboraciones en Lletres Asturianes, trés na revista Cultures y un llibru pa escolinos, “Lau, la mio perra fiel”, espublizáu pola ALLA en 1998. Ente les sos noveles y llibros de rellatos: Coses d’osos, 1993; Maldaes de l.l.obos, 1996; Les vaques tamién piensan y sienten, 1996; Fito nel país de los gorretinos, 1994; Gene, 1998; amás d’una novela sobre la emigración a América (Siete vides, 2001). El branu pasáu asoleyaba’l que sedría’l so llibru últimu El Cordobeyu y otros cuentos. (Nueve cuentos alleranos), que forma parte de lo que l’autor llamó yá hai tiempu «lliteratura etnográfica de creación».

Les sos collaboraciones col RIDEA tamién supunxeron numberoses publicaciones y conferencies. La última dábala en payares del 2011 na sede de la institución, dedicada al mal de güeyu na tradición asturiana.

Dexa inédita una importante producción lliteraria, mesmo en castellán que n’asturianu.