Plástiques

Les obres del artista asturianu Juanma (nome artísticu de Juan Manuel González Varela; Muros del Nalón, 1945), afincáu en Bruselas dende fai más de cuarenta años, van tar espuestes nel salón d’actos del Centru Asturianu de Bruseles hasta el prósimu mes de xunu. L’artista de técnica mista manifestó alcontrase perilusionáu énte la que va ser la so primer esposición n’Asturies, una amuesa de les sos obres que va inaugurase el prósimu 6 de mayu nel Centru Asturianu d’Uviéu.

Nesta ocasión va poder contemplase una selección de les obres más significatives d’una carrera artística que l’asturianu empezó tarde, va malpenes quince años.Gran investigador de técniques pictóriques y empléu de materiales, Juanma llogra unos resultaos bayurosos en matices y sorprendentes n’espresión artística.

Na esposición abierta en Bruseles, compuesta por quince obras que tienen al zapatu como oxetu protagonista, el visitante alcuéntrase con trabayos fechos en cartón o teles clásiques de diferentes dimensiones con una gran bayura cromática e imaxinativa.

Juanma defínese como un artista n’infrayable busca de nueves formes d’espresión. El so permanente estáu d’esperimentación cola materia, la técnica y les idees, reflexen un espíritu críticu ya inconformista que pon en custión la so propia obra y l’entornu nel que se produz. Al mesmu tiempu, ye esti entorno la so fonte d’ispiración cimera, centrándose cuasi siempre nos pequeños detalles de la vida cotidiana.

Dafechu autodidacta, Juanma reconoz que se punxo a pintar un día tres ver na

televisión belga un programa de pintura pa neños. Dende entós nun paró de crear y hasta fabrica él los pinceles colos que pinta. Habiendo abandonao el colexu a los nueve años –ye’l segundu de dieciocho hermanos y ensiguida tuvo ponese a trabayar-, Juanma ye un home que se formó a sí mesmu y al que la so curiosidad llévalu a interesase por too. Esti ansia de saber ye’l que defín la so personalidá y la so trayectoria artística.

Alberto Vázquez, conocíu polos sos trabayos como dibuxante y ilustrador en solitariu o al través del grupu El Contuberniu, ye l’autor de la tira cómica ‘Dotramiente’ que se publica n’Asturnews dende la selmana pasada. Al través del personaxe de Fele, el viñetista mierense, dirá amosando la so particular mirada irónica de la realidá más actual nuna tira que tenta sobretoo buscar la complicidá de los llectores.

L’autor de la nueva tira cómica d’Asturnews nació en Madrid en 1973 y reside en Mieres dende nenu, onde desenvolvió delles de les sos principales actividaes como creador y animador d’iniciatives culturales. Estudió na Escuela d’Artes d’Uviéu y ye miembru del colectivu artísticu El Contuberniu. Anguaño trabaya en diversos frentes creativos nel mundu de la ilustración y el diseñu, a la vez qu’imparte cursos de dibuxu de comics.

Trece grabaos y cinco escultures de Joan Miró componen la esposición titulada ‘Antiretrato’ que va poder visitase nel edificiu de la Universidá vieya tol mes de marzu. El vicerrectoráu d’Estensión Universitaria en collaboración cola Fundación Miró de Barcelona empobinen esta amuesa monográfica na que la mirada del artista catalán busca les formes y secretos de la muyer mediterránea.

La esposición enseña trabayos fechos por Joan Miró ente los años 1969 y 1981 en diverses técniques y al través de la complexa simplicida de testures que caracteriza la obra del lluminosu creador catalán. La milenaria tradición de la muyer mediterránea como ser inconcretu y xenéricu ye’l leit motiv d’estos grabaos y escultures que pueden vese nel salón d’actos del edificiu hestóricu de la Universidá, na cai San Francisco d’Uviéu.

Los organizadores de l’amuesa pretenden que pueda vela el númberu mas ampliu de visitantes y asina, nuna ocasión ensin precedentes, la sala onde s’enseña ‘Antirretratos’ va tar abierta nel horariu avezáu el xueves y viernes de Semana Santa. Na inauguración de l’amuesa esti martes primeru de marzu, el rector Juan Vázquez y la vicerrectora d’Estensión Universitaria, Paz de Andrés, quisieron resaltar el significáu d’esta y futures iniciatives como manera de proyectar l’interés de la institución por abrise a la sociedá asturiana arriendes de les sos funciones propiamente académiques.

Dalgo más de 50.000 euros. Esa sedría la cantidá ingresada pola única galería asturiana presente na XXIV Feria Internacional d’Arte Contemporáneu de Madrid (Arco), la sala uvieína Vértice, según la media de ventes calculada pola directora’l certame, Rosina Gómez-Baeza, pa cada ‘stand’ de la feria, que güei pieslla les sos puertes con menos visitantes y más facturación qu’en 2004.

En total, más d’una decena de creadores asturianos -ente ellos Ricardo Mojardín, Herminio, Matarranz, Isidro Tascón y Soledad Córdoba- colgaron les sos obres n’Arco, considerada como ún de los principales escenarios nel calendariu añal del arte contemporáneu, nuna edición que foi visitada pola conseyera de Cultura, Comunicación Social y Turismu, Ana Rosa Migoya.

De les ventes d’esos autores -canalizaes o non pola galería Vértice- saldrá’l balance económicu de la presencia asturiana na feria, na que l’Ayuntamientu de Xixón difundió amás dos iniciatives culturales, el certame d’arte ellectrónicu ‘Observatoriu Orbital de la Humano’ y ‘Cultur*At’, un programa européu qu’abre víes de desarrollu dende la cultura y el patrimoniu y nel que participen, amás de Xixón, otres siete ciudaes del denomináu Arcu Atlánticu.

Según les primeres estimaciones, Arco recibió esti añu a unos 180.000 visitantes frente a los 200.000 rexistraos l’añu pasáu. Esi descensu de públicu compensaráse, según Gómez-Baeza, con un aumentu de les ventes n’alredor d’un diez por cientu respecto a la edición anterior de la feria.

Uviéu pondrá’l negociu y Xixón, la promoción institucional. La galería uvieína Vértice ultima los preparativos p’amosar y promocionar un cientu d’obres na Feria Internacional d’Arte Contemporáneu de Madrid (Arco), como la única sala’l Principáu con presencia propia nesta edición del certame, qu’arranca mañana. L’Ayuntamientu de Xixón divulgará en Madrid dos proyectos municipales.

Pal so ‘stand’ na feria -una de les más importantes cites nel calendariu européu del arte contemporáneu- los responsables de Vértice apuesten por una decena de creadores ente los que figuren Ricardo Mojardín, Herminio, Matarranz, Isidro Tascón y Soledad Córdoba. La llista d’autores alpenes varía respecto a años anteriores.

Pol so llau, la conceyala de Cultura de Xixón, Mercedes Álvarez, encabezará una delegación municipal qu’a partir del vienres divulgará n’Arco los trabayos del proyectu ‘Cultur*At’, un programa européu qu’abre víes de desarrollu dende la cultura y el patrimoniu y nel que participen, amás de Xixón, otres siete ciudaes del denomináu Arcu Atlánticu. Lo que l’Ayuntamientu xixonés presentará en Madrid ye un llibru en tres idiomes qu’espeya les actes de les xuntances d’esi grupu de ciudaes.

Amás d’ello, Álvarez espardirá na feria madrilana les conclusiones, en formatu audiovisual, del ‘Observatoriu Orbital de lo Humano’, un certame d’arte ellectrónicu desendolcáu en Xixón en setiembre pasáu con participación de cerca d’una decena de creadores mozos.

La Feria Internacional d’Arte Contemporáneu de Madrid (Arco 2005) quedará abierta mañana, miércoles, con México como país destacáu d’esta edición y 290 galeríes procedentes de 36 Estaos. L’añu pasáu, quince artistes asturianos tuvieron presentes na feria, ente ellos Pelayo Varela, qu’algamó ún de los premios de l’amuesa cola so instalación ‘Escucha’.

Lautrec, Rodin, Manet, Renoir, Gauguin. Uviéu abre-y güei les puertes a una esposición que recuerre, en 36 pintures y tres escultures, la producción más representativa de les vanguardies plástiques entamaes pol arte francés nel sieglu XIX, cola representación de la figura humana como filu conductor y l’accesu al públicu abiertu hasta finales de marzu.

L’amuesa, asitiada na sala d’esposiciones que’l Bancu Herrero rexenta na cai Suárez de la Riva, espera acoyer a 20.000 visitantes, según los cálculos de la conseyera de Cultura, y pon a disposición del públicu asturianu la contemplación d’obres de 29 autores franceses de sonadía, dende los representantes del neoclasicismu más perfeccionista a los siguidores de les pautes marcaes pol romanticismu.

Desnudos, retratos íntimos o de sociedá y representaciones sicolóxiques de personaxes de la Francia moderna cuelguen de les parés de l’amuesa allugada n’Uviéu, qu’axunta fondos del muséu Petit Palais de París gracies a les obres de remocicamientu que se faen nesi equipamientu municipal y que propiciaron la salida temporal d’obres de la so colección pa la so amuesa n’otros museos.

De fechu, la esposición ‘Figuras de la Francia Moderna. D’Ingres a Toulouse-Lautrec’, que mantendrá les sos puertes abiertes hasta’l prósimu 31 de marzu, recibió a cien mil persones nel so pasu por Madrid. Nel casu’l Principáu, la visita de l’amuesa a Asturies ye posible gracies a l’andecha de l’Alministración autonómica, el Bancu Sabadell y la Fundación Juan March.

La convocatoria pa construyir el Centru d’Arte y Creación Industrial de la Universidá Llaboral de Xixón yá ye oficial. El Gobiernu autonómicu convoca güei formalmente el concursu públicu nel que va elixise a la empresa constructora que llevantará’l proyectu, que tendrá que tar rematáu a mediaos de 2006 y costará 10,6 millones d’euros, dientro’l plan integral pa da-y puxu al complexu xixonés.

Según l’anuncia asoleyada pola Conseyería de Cultura nel cuartu Boletín Oficial del Principáu d’Asturies (BOPA) del nuevu añu, la recepción d’ufiertes pesllaráse’l prósimu 21 de febreru y l’apertura de los correspondientes pliegos pa designar a la constructora que llevará alantre’l proyectu realizaráse tres díes depués na propia Conseyería.

A partir d’ehí, la empresa a la que se-y alxudique la obra tendrá un plazu de 18 meses pa rematar los trabayos, polo que les previsiones del Gobiernu autonómicu pasen por abrir el Centru d’Arte de la Llaboral nel veranu de 2006 o, si media una pequeña demora, na seronda d’esi mesmu añu.

La creación d’un centru artísticu na Universidá Llaboral ensértase nun de los proyectos ‘estrella’ de la Conseyería de Cultura, Comunicación Social y Turismu pa lo que queda de llexislatura autonómica: El remocicamientu integral del complexu xixonés, allugáu en Cabueñes, que tamién inclúi la meyora de les instalaciones empobinaes a formación profesional y l’habilitación de la sé de la radiotelevisión autonómica.

Promulgación de la midida nel BOPA

L’espresionismu español pierde a una de les sos figures claves nel sieglu XX. El pintor estremeñu Juan Barjola, inspirador del muséu que lleva’l so nome en Xixón y Fíu Adoptivu d’Asturies, falleció esta tarde nuna clínica de Madrid a los 85 años d’edá y dexa tres d’él un bayurosu regueru de cuadros neofigurativos enllenos de collor y contrastes cromáticos.

Nacíu en 1919 na llocalidá pacense de Torre de Miguel Sesmero, Barjola recibió a lo llargo de la so carrera los Premios Nacionales de Pintura (1963), de Debuxu (1965) y de ‘Bellas Artes’ (1985), y más recientemente, nel añu 1991, la Medalla d’Estremadura. A finales de la década de los noventa, el Muséu Estremeñu ya Iberoamericanu d’Arte Contemporáneu entamó la primer esposición antolóxica de Barjola a partir d’un cientu d’obres del artista.

Creador prolíficu, la relación de Juan Barjola con Asturies tien como episodiu fundamental les dos donaciones de cuadros que’l pintor fizo en 1985, una d’elles con destín al Muséu de ‘Bellas Artes’ d’Uviéu y la otra pal equipamientu xixonés qu’anguaño lleva’l so nome y que’l pasáu xueves cumplió 16 años de vida.

En viéspores de l’apertura del Muséu ‘Barjola’ de Xixón, el pintor estremeñu recibió la distinción de Fíu Adoptivu d’Asturies, reconocencia que se completó en 1994 cola concesión del títulu de Fíu Adoptivu de Xixón.

Cultivador del xéneru tremendista, Juan Barjola estampó nos sos lienzos imáxenes crudes a mediu camín ente la pura angustia y la realidá más descarnada, ensin filtros nin dulcificaciones. Nes sos creaciones amiéstense perfiles distorsionaos y deformes que falen, dende un sentíu éticu mui personal, del sufrimientu y la inxusticia del mundu.

Depués de nueve años, hai veredictu. El Muséu de ‘Bellas Artes’ d’Asturies colgó esta mañana na so colección permanente un cuadru de Salvador Dalí donáu a la institución en 1995 y sometíu llueu a un llargu procesu d’autentificación. La obra ‘Metamorfosis de ángeles en mariposa’, pintada sobro papel pol artista catalán en 1973, revaloriza los fondos de la principal pinacoteca asturiana y faila “privilexada”, según destacó el director del muséu, Emilio Marcos.

Al so xuiciu, al gran valor que-y da al cuadru tar firmáu por Dalí hai que-y sumar amás que ye una obra de grandes dimensiones -140 por 200 centímetros-, “de les mayores que yo conozo pintaes en papel”, precisó Marcos, quien sorrayó que siempre ye enforma difícil pa un muséu contar en propiedá con una obra del xeniu catalán.

La pieza llegó a la pinacoteca uvieína en 1995, dientro de la colección d’arte que Pedro Masaveu cedió a l’Alministración autonómica como pagu d’impuestos, y dende entós sometióse a una complicada xera d’autentificación a cargu del espertu Ricard Mas, qu’a la fin certificó que n’efectu se trata d’una obra de Salvador Dalí.

El cuadru, una alegoría del amor humanu y divinu ente la muerte y la vida, ye n’opinión de la conseyera de Cultura, Ana Rosa Migoya, una pieza “única y singular” que se cuelga amás nun momentu propiu pa ello: Nel mesmu añu en que se conmemora el centenariu’l nacimientu del pintor de Figueres.

Dientro’l so procesu de recuperación y catalogación de la pintura asturiana, el Muséu de ‘Bellas Artes’ inagurará el 21 d’avientu prósimu una esposición integrada por 159 obres de 19 pintores asturianos del primer terciu’l sieglu XX, amuesa qu’acompañará a la edición del correspondiente catálogu. Pa 2005, la pinacoteca pública prepara una esposición d’Orlando Pelayo al traviés de les 58 obres d’esi autor que custodia el muséu.

L’artista madrilanu Juan Pablo Villalpando recibirá los 6.010 euros del II Premiu de litografía ‘Ciudá de Xixón’, convocáu pol ayuntamientu d’esa ciudá pa da-yos puxu a les artes gráfiques. El xuráu, qu’aconceyó esta mañana, decidió conceder amás sendes menciones d’honor a obres de la uvieína Isabel García Cuadrado y la murciana Concepción Lidón.

L’autor natural de Madrid recibió’l premiu absolutu del certame cola so creación ‘Through the rads’, na qu’emplegó como materiales l’aluminiu y el terciopelu. Pol so llau, García Cuadrado recibió la reconocencia simbólica del xuráu pola so obra ‘522 besos’, mientres que Concepción Lidón algamó la mención d’honor cola litografía ‘Memoria de un ciclamen’.

A la segunda convocatoria del galardón ‘Ciudá de Xixón’, que se falló esta mañana nel marcu de la feria de creación gráfica ‘Estampa’, en Madrid, concurrieron 37 artistes procedentes d’estremaes comunidaes autónomes, con destacada participación asturiana. Parte de les obres unviaes a concursu integrarán en 2005 una esposición nun espaciu públicu de Xixón inda por determinar.

L’ayuntamientu xixonés potenció la creación con técniques litográfiques -qu’empleguen piedra nel procesu d’impresión- depués de recuperar les instalaciones y preseos que la vieya sociedá Litografías Viña conservaba nel barriu d’El Natahoyu.