Plástiques

El legáu escultóricu d’Eduardo Chillida, en dos escenarios. La sala d’esposiciones del Bancu Herrero y l’edififiu hestóricu de la Universidá d’Uviéu acueyen dende güei, y hasta xineru, una esbilla d’obres ellaboraes pol carismáticu artista vascu en bronce, aceru y fierru que definen, en paisaxes xeométricos y espacios tridimensionales, la propuesta estética del malográu creador.

L’amuesa, comisariada por Elvira Maluquer -que yá coordinó en 2002 una esposición n’Uviéu con pieces del artista catalán Antoni Tàpies-, pon a disposición del públicu asturianu más d’una decena d’escultures de mediu tamañu, varios grabaos y una obra de grandes dimensiones allugada, pa la so meyor contemplación, nel patiu hestóricu de la Universidá.

Saludada polos espertos como una mecigaya de l’abondosa obra que salió del taller de Chillida, la esposición qu’agora abre les sos puertes na capital del Principáu inclúi amás testos de tou tipu ellaboraos pol artista, ente ellos cites, poemes y el so discursu d’ingresu na Real Academia de Bellas Artes de San Fernando.

Premiu ‘Príncipe de Asturias’ de les Artes en 1987 y distinguíu pol públicu, estudiosos y críticos pola so singular concepción de la escultura abstracta, Eduardo Chillida dexó tres de sigo depués del so fallecimientu, n’agostu de 2002, un regueru d’obres plástiques y escultóriques qu’algamaron la so másima popularidá -y en dalgunos casos, controversia- nes sos grandes obres allugaes n’espacios públicos.

La relación afectiva del creador vascu con Asturies pasó, amás de pola concesión del ‘Príncipe’ de les Artes, pola construcción de la escultura ‘Elogio del Horizonte’ na Atalaya de Xixón, en 1989. Cuestionada nun principiu por parte de la ciudadanía, la escultura acabó convirtiéndose en seña d’identidá de la ciudá. La decisión del Ayuntamientu d’escavar una zanxa perimetral nel entornu de la obra pa evitar posibles cayíes a la mar, intervención qu’alteró sustancialmente l’entornu, disgustó fondamente a Chillida, que tuvo nel ‘Elogio’ una de les sos creaciones más queríes.

Web del muséu permanente de Chillida nel País Vascu

De Xixón al Reinu Xuníu. Les artistes asturianes Isabel Cuadrado, Gema Ramos y María Jesús Rodríguez amosarán les sos obres hasta xineru prósimu nel prestixosu Midlands Arts Centre (MAC), un muséu de gran capacidá allugáu na llocalidá británica de Birmingham que destaca por permanecer abiertu 15 hores al día y recibir a una media de 650.000 visitantes cada añu.

Les tres creadores del Principáu tarán presentes nel Midlands Arts al traviés de la esposición collectiva ‘Espacio’, que formula propuestes plástiques al rodiu d’esi conceptu y na que tamién figuren obres de les artistes britániques Maria Gaete Gwynne, Ruth Spencer y Lois Wallace.

Les obres de toes elles podrán contemplase nel MAC de Birmingham ente’l 13 de payares y el 2 de xineru, por aciu d’una collaboración ente la Conseyería de Cultura, Comunicación Social y Turismu del Principáu y diverses instituciones del Reinu Xuníu, y hasta’l 24 d’ochobre pasáu permanecieron a disposición del públicu nel Muséu Barjola, en Xixón.

Allugáu nuna zona prósima al centru urbanu de Birmingham, el Midlands Arts Centre abrió les sos puertes hai agora cuarenta años y dende entós vien acoyendo unes 30 esposiciones, 300 actuaciones, mil proyecciones y 600 sesiones educatives al añu. Tales cifres faen d’esi muséu un referente na cultura británica.

De forma paralela a la esposición, la artista Gema Ramos beneficiaráse d’una beca de residencia otorgada pol Institutu d’Arte y Diseñu de Birmingham, que-y permitirá presentar nel Reinu Xuníu el resultáu del so trabayu de forma singularizada.

Páxina web del Midlands Arts Centre, nel Reinu Xuníu

L’escultor vascu Agustín Ibarrola afirmó na so visita a Llanes tener “un puertu enteru de cubos” na cabeza y que’l so deséu a propósitu de la obra entamada nes escolleres del rompefoles de la villa oriental asturiana yera la de ponese al llabor de facer medrar la so creación en cuantes llegara la ocasión. Ibarrola visitó la capital del conceyu llaniscu invitáu nel marcu de la celebración de la “folixa del tardíu” que lleva’l nome de la obra del artista guipuzcuanu.

Los vecinos de la villa corita recibieron en plenu festeyu de la IV edición de ‘Llanes al cubo’ una bona noticia de llabios d’Agustín Ibarrola, la de que piensa ampliar la so obra nel puertu col fin de dar calce sueltu a bien d’idees creatives que foi concibiendo pa plasmar nesta escultura al aire llibre entamada nos cubos d’hormigón de la escollera.

Dende l’iniciu de la obra en 2000 los cubos d’Ibarrola conviertiéronse nun de los mayores atractivos del conceyu p’atraer la llegada de visitantes turísticos, una de les principales fontes d’ingresu nesta zona de la costa oriental. Agora l’ampliación de la obra abierta va suponer un incentivu inda más grande pal interés que vien suscitando la escultura d’Agustín Ibarrola. El so calter d’obra abierta non namás ye un propósitu del artista vascu sinón dalgo inxerío al propiu calter del so trabayu, espuestu a los emburriones del mar bravu de Llanes, que faen necesariu el caltenimientu constante de les pintures estampaes nos cubos. Los motivos pintaos na escollera aluden a la hestoria y cultura del conceyu: el so pasáu marineru, la emigración a América, el so patrtimoniu hestóricu y arqueolóxicu, etc.

Ibarrola acudió de nuevu al llugar d’una de les sos obres más emblemátiques pa participar na inauguración de l’amuesa: ‘Memoria de los artistas.Ibarrola/Marinero’ que’l diseñador de moda Miguel Marinero espón na Casa de Cultura de Llanes con creaciones suyes inspiraes nos cubos del escultor.

L’arte asturianu pon un pie firme en Madrid. Les hermanes María y Carolina Masaveu, vinculaes al grupu empresarial homónimu, abrieron ayeri na capital del Estáu les puertes de la galería Fruela, concebida p’averar el trabayu de los principales artistes plásticos d’Asturies a los grandes circuitos de compra y distribución. La sala inaguróse con una amuesa d’obres atropaes por Amador Fernández, responsable de la galería xixonesa Cornión.

Allugada na cai d’Alfonso XII, en plenu centru urbanu de Madrid, la nueva embaxada de la creación plástica asturiana despachó les sos primeres ventes na mesma xornada d’apertura, que contó cola presencia, ente otros artistes, de Joaquín Rubio Camín, Pelayo Ortega, José Arias, Pablo Maojo, Amancio, Amador Fernández, Tadeo del Río y Ramón Prendes.

La instalación en Madrid -epicentru de creadores, marchantes y galeristes- d’una sala permanente pa promocionar l’arte fechu n’Asturies quier caltener eses creaciones al fácil algame de los profesionales del sector, yá que hasta agora la presencia del arte asturianu nos grandes circuitos taba enforma condicionada pola participación na Feria d’Arte Contemporáneu de la capital (Arco), que dura alpenes cinco díes y tien calter añal.

Artistes y empresarios sorrayaron na inaguración de la galería Fruela, a la qu’asistió el presidente autonómicu, Vicente Álvarez Areces, el papel decisivu del nuevu equipamientu pa convertise n’espaciu de referencia a nivel estatal y pa propiciar el fluxu dende y hacia otros países d’obres y creadores.

Esti xueves 28 d’ochobre inaugúrase na Sala Borrón d’Uviéu la XV Amuesa d’Artes Plástiques del Principáu con un actu presidíu pola conseyera de Cultura Ana Maria Migoya nel que van entregase los premios de los trabayos seleccionaos nesta edición. La esposición recueye les obres escoyíes pol xuráu calificador d’ente les sesenta y dos propuestes recibíes na convocatoria d’esti añu. El xuráu decidió resaltar a una de les creadores premiaes Irma Álvarez Laviada como ‘artista moza revelación del añu d’Asturies’.

Los artistes galardonaos nes diverses categoríes de l’Amuesa foron en pintura: José Jorge Nava Montes, Juan Díaz-Faes Díaz, Jacobo de la Peña Miguélez, Jorge Faes Ruiz, Irma Álvarez Laviada, Elena Rato Tascón, Lorena ÁLvarez Barrero y Cristina Busto Álvarez. En Grabáu, recibieron el premiu Eduardo Guerra Álvarez y Fermín Santos López. Eva Mª Pividal Alonso, Isaben Fernández Rodríguez y Irma Álvarez Laviada, foron les galardonaes na categoría artística de Fotografía. El premiu correspondiente al apartáu d’Escultura y Instalaciones quedó desiertu.

Cada ún de los galardones ta dotáu con una aportación económica de 1.000 euros y el premiu al ‘artista xoven revelación’ con 2.200 euros más la ufierta d’entamar una esposición individual na sala agospiadora d’esta amuesa, la Borrón d’Uvieu. Na edición qu’agora se celebra presentáronse un total de 62 obres: 30 na modalidá de pintura, 9 na de grabáu, 5 n’escultura y instalaciones y 18 pa fofografía. La inauguración de la XV Amuesa d’Artes Plástiques del Principáu ye esti xueves 28 a les 19,30 na mencionada sala uviéina.

El Centru Cultura Antigu Institutu de Xixón acueye hasta’l prósimu 18 d’ochobre una esposición retrospectiva de la obra gráfica del dibuxante Pau (Palma Mallorca, 1972). Entamada dientro les actividaes del Salón Internacional del Cómic del Principáu d’Asturies,l’amuesa enseña trabayos orixinales del ilustrador mallorquín dende los sos empiezos en fanzines, el pasu por ‘El Víbora?’ o el chiste fixu dende 1996 en ‘Diario de Mallorca’.

Na esposición ‘El arte de Pau’ van poder vese diverses manifestaciones del llabor d’esti artista: bocetos, planches a llapiceru, con tinta o coloriaes. Tamién los trabayos más nuevos valiéndose del soporte de les teconoloxíes dixitales.

Pau empezó la so carrera como dibuxante collaborando en fanzines, en 1993 principió una colaboración fixa nel Diario de Mallorca, titulada ‘Pau per tots’. Foi collaborador de publicaciones como El Víbora,Comic Clips y DiibuComics. El mallorquín ye autor de series como ‘Los repartidores de cerveza’ o ‘Hazeros inoxidables’. Pau ye un participante avezáu del Salón del Cómic de Xixón dende la so primer presencia en 1997. Agora’l salón asturianu ufierta-y esta esposición que va poder visitase hasta’l prósimu 18 d’ochobre

.

Tres esposiciones asitiaes na Sala Borrón, el Muséu Barjola y el Centru Cultura Antigu Institutu valen de prólogu a lo que va ser la nueva edición del Salón Internacional del Cómic del Principáu d’Asturies en Xixón. La selmana qu’entra inaugúrase l’alcuentru de dibuxantes y illustradores cola presntación de los autores participantes nun actu que va cellebrase nel Teatru Xovellanos a les 19,00 hores. Amás de la presentación de los autores presentes, l’actu desenvolver entrambos coloquios con dos figures importantes del panorama del cómic internacional, los americanos Paul Smith y Bruce Jones.

Dos de les esposiciones inauguráronse esta mesma selmana. Son la que s’amuesa na Sala Borrón, organizada pol Institutu de la Mocedá, baxo’l títulu ‘Homenaje al Salón del Cómic; nel Muséu Barjola, dende’l martes 5 puede visitase la esposición titulada ‘Miscelánea’. La primera, que va poder vese hasta’l prósimu 22 d’ochobre, amuesa dibuxos y ilustraciones de mediu centenar de creadores; na relación atópense nomes como Al Williamson, Ana Miralles, Carlos Gímenez, Forges, Gallego y Rey, Víctor de la Fuente o Walter Simonson.

El martes 12 col iniciu de la XXVIII edición entamen diverses actividaes nes que s’incluin alcuentros colos propios autores, sesiones de cómic en vivo, meses redondes y presentaciones de novedaes editoriales. Mañana sábadu inaugúrase nel Centru de Cultura Antigu Institu, una nueva esposición titulada ‘Pau per Tots’, que va poder vese hasta’l prósimui 18 d’ochobre.

L’arxentín Mordillo o los americanos Bruce Jones y Paul Smith son dellos de los autores presentes na XXVIII edición del Salón Internacional del Cómic del Principáu d’Asturies que va celebrase en Xixón ente los díes 12 y 16 d’ochobre. L’alcuentru de dibuxantes y illustradores va cuntar tamién con una destacada participación de dibuxantes y illustradores de tol estáu, ente ellos los asturianos Gaspar Meana, Violeta Suárez, Berto Álvarez Peña o Ígor Medio. Debates, esposiciones y la presentación de les últimes novedaes editoriales igüen el programa del salón d’Asturies

Xixón ye la ciudá onde van celebrase la mayoría de les actividades ente’l Centru de Cultura Antigu Institutu y el Teatru Xovellanos. Dotramiene el certame estiende parte de los sos actos a Uviéu cola esposición ‘Homenaxe al Salón del Cómic’na Sala Borrón y una mesa redonda embaxo’l títulu ‘Alcuentru del cómic latinu’ que va tener llugar el xueves 14 d’ochobre na Escuela d’Artes.

L’ilustrador uvieín Pablo Amargo, acabante recibir el Premiu Nacional d’Ilustración Infantil y Xuvenil pol trabayu entamáu pa la obra ‘El monstruo de la lluvia’ de Marilar Aleixandre, considera el trabayu del ilustrador como un llabor creativu independiente que constitúi una visión paralela del testu lliterariu, con significáu propiu. Amargo, al pesar de confesase como “un privilexáu que tovía puede dicir non a un encargu que nun-y gusta”, piensa que les tendencies del mercáu editorial tienden n’España a considerar la xera de los ilustradores con un valor namás decorativu.

Inda baxo los efectos de l’alegría pola concesión del premiu, el creador asturianu ironiza respective a lo que suponen esta clase de renocimientos nun mercáu editorial que nun valora lo suficiente el llabor d’estos artistes: “ente los ilustradores circula la broma privada de qu’un premiu importante supón una mengua d’encargos, porque se cree que vas aumentar el caché o vas tar bien solicitáu”.Sicasí, l’ilustrador admite la oportunidá d’estos premios pa una forma de creación que n’España inda nun tien la mesma reconocencia que n’otros países europeos. ‘Amás -afirma Amargo- tiende a relacionase la ilustración col llibru infantil y xuvenil, ensin contemplar la posibilidá d’un llibru ilustráu p’adultos y a la inversa, obres pa nenos ensin ilustrar’.

Pablo Amargo (Uviéu, 1971) recibió’l pasáu llunes el premiu Motiva d’ilustración pol so trabayu na colección ‘Otru mundu ye posible’ de la Editorial Ámbitu y nel añu 1999 algamara’l premiu Lazarillo del Ministeriu de Cultura pola obra ‘No todas las vacas son iguales’.

Colaborador de publicaciones como el diariu “El Mundo” y la revista d’economía “El Exportador”, el creador uvieín cuenta asinamesmo na so nómina de trabayos con ilustraciones de llibros pa les editoriales SM, Anaya y Santillana, ente otres. Anguaño trabaya en diversos proyectos, el más ambiciosu ilustrar una versión de la Odisea d’Homero pa nenos.

Una trayectoria íntima y silenciosa, n’ocasiones desconocida, que constituyó una “aportación indiscutible” a la evolución de la cultura asturiana. Nesos términos eloxó esta tarde la presidenta de la Xunta Xeneral del Principáu, María José Álvarez, el llabor de les muyeres más destacaes na creación plástica asturiana al entrega-yos la Medalla d’Asturies na so categoría de plata, un galardón que tamién recibió’l poeta Antonio Gamoneda.

En puridá, la distinción otorgárase-yos, como representantes del so singular movimientu artísticu, a les veteranes artistes plástiques Amparo Cores, Blanca Meruéndano, Covadonga Romero, Maruja Motuas, Mercedes Gómez Morán, Pepa Osorio y Rosario Areces, pero namás cinco d’elles acudieron güei a recibir la réplica de la Cruz de la Victoria cola que’l Parlamentu asturianu honró, nuna recepción oficial a tolos galardonaos coles Medalles d’Asturies -que s’entregaron darréu nel Auditoriu ‘Príncipe Felipe’ na so edición de 2004.

Cola reconocencia’l Principáu a la xeneración de les creadores premiaes, el Parlamentu asturianu quier homenaxear al so llabor difícil, pioneru y vanguardista, testimoniu de la voluntá creadora penriba d’unos cánones sociales desfavorables.

Nel mesmu actu, que se cellebró nel Salón Europa de la Xunta Xeneral del Principáu, la presidenta’l Parlamentu asturianu entregó una distinción más a un representante del ámbitu cultural, l’escritor afincáu en Lleón Antonio Gamoneda, énte quien María Jesús Álvarez eloxó la poesía como un preséu “qu’ayuda a facer los pueblos llibres” pesie a ser ún de los xéneros lliterarios, aseguró Álvarez, d’ente los menos reconocíos.