Patrimoniu

El conxuntu hestóricu de Castropol algama’l másimu nivel de protección oficial depués de siete años de trámites llegales. El Boletín Oficial del Principáu d’Asturies (BOPA) publica la declaración d’un ampliu perímetru de la villa del estremu occidental d’Asturies como Bien d’Interés Cultural, lo que supón el remate d’un procesu burocráticu entamáu en 1997 y resueltu pol Conseyu de Gobiernu el pasáu 20 de mayu.

L’enguedeyáu camín de la llegalidá empezó hai agora siete años, cuando la Conseyería de Cultura decidió abrir l’espediente de declaración de Bien d’Interés Cultural por mor de la importancia artística ya hestórica de los edificios que constitúin el perímetru monumental de Castropol.

Llueu de la emisión de dictámenes favoratibles por parte de la Real Academia de Bellas Artes de San Fernando, la Real Academia de la Hestoria y la Universidá d’Uviéu, Ayuntamientu y Principáu protagonizaron en 1999 l’únicu alcontronazu del procesu, al defender el Conceyu una delimitación de la zona protexida distinta a la que proponía’l Gobiernu autonómicu. A la fin, mantúvose’l criteriu’l Principáu.

La declaración del conxuntu hestóricu de Castropol como Bien d’Interés Cultural, qu’entra en vigor mañana, traduciráse na práctica na especial protección de los edificios y los espacios incluyíos nel perímetru protexíu, que nun podrán sufrir nenguna intervención ensin un premisu espresu.

La villa del estremu occidental asturianu, allugada na oriella de la ría l’Eo, alberga destacaos exemplos de l’arquitectura asturiana nes sos distintes variantes dende’l sieglu XVI hasta anguaño, con edificaciones representatives del barrocu, el racionalismu y el denomináu rexonalismu montañés.

Ente elles alcuéntrense los Palacios del Marqués de Santa Cruz de Marcenado, de Valledor y de les Cuatro Torres, amás de la ilesia de Santiago Apóstol, l’edificu ‘Villa Rosita’ o la mesma Casa Consistorial.

Promulgación de la midida nel BOPA

Ye’l caberu y pue desapaecer. L’edificiu de la firma ‘Conservas Lis’, últimu esponente en pie de la hestórica industria conservera de San Xuan de L’Arena, cuerre peligru por intereses urbanísticos, según denuncia un collectivu vecinal que s’opón al posible valtiamientu del inmueble, edificáu a primeros del sieglu XX con una fachada qu’inclúi elementos propios de l’arquitectura modernista.

Según vien denunciando l’asociación de vecinos Ríu Nalón, col sofitu de grupos con representación nel Ayuntamientu de Muros como l’independiente Cambiu Sieglu XXI, la especulación urbanística pue arramplar darréu cola cabera conservera que queda en pie en L’Arena si les autoridaes polítiques nun amuesen un determín claru a favor del caltenimientu del hestóricu inmueble.

L’edificiu de ‘Conservas Lis’ abrióse en principiu como hotel y casinu, y depués pasó a funcionar como cine baxo los nomes sucesivos de ‘Vemfac’ y ‘Taylor’. Na dómina de la posguerra utilizóse como ilesia hasta que se reconstruyó’l templu parroquial, y na década de los cuarenta foi alquiríu a la fin pol empresariu conserveru Manuel Iglesias de la Torre, que mantuvo nél una fábrica de conserves y salazones de pescáu hasta los setenta.

La publicación llocal ‘La Ilustración Asturiana’, editada por un grupu de vecinos de Muros, dedíca-y nel so númberu correpondiente a la primavera un ampliu reportaxe a la hestoria de la industria conservera de L’Arena, clave na economía de la zona a lo llargo’l sieglu XX.

L’equipu d’espertos universitarios qu’esplora la cueva’l Sidrón, allugada nel conceyu de Piloña, enfótase n’atopar nun segundu yacimientu esterior cercanu a la cavidá nuevos restos humanos asemeyaos a los yá afayaos, cuya antigüedá cífrase en 40.000 años. El Principáu presentó esta tarde un conveniu ente Gobiernu y Universidá dotáu con 300.000 euros col que se garantiza la continuidá de les escavaciones pa los prósimos tres años.

Sedrán tres pagos añales d’ente 91.000 y 117.000 euros p’alitar a los responsables d’una investigación na que s’anuncia un inminente descubrimientu de proyección internacional y que va cuayando n’afayos non sólo orgánicos -güesos de neandertales-, sinón tamién técnicos: El responsable de la estaya antropolóxica de les escavaciones, Antonio Rosas, asoleyó güei n’Uviéu varies répliques de les osamentes atopaes, ente elles un güesu frontal, algamaes con modernes técniques que permiten caltener intacta la pieza orixinal.

Hasta agora, los espertos que trabayen nel yacimientu piloñetu dende l’añu 2000 analizaron un total de 46 amueses de güesos humanos d’ente los alredor de 700 restos afayaos, y una de les conclusiones principales ye que eses osamentes llegaron a la cueva depués d’un desplazamientu curtiu, fechu n’algunos casos con gran violencia.

L’oxetivu de los técnicos ye agora responder a la entruga de cuál ye la procedencia de los restos afayaos, siguir escavando p’atopar más güesos y entamar nuevos análisis de datación, too ello col enfotu de que dalgunes de les rempuestes tea oculta nun gran abrigu esterior asitiáu cerca de la cueva estudiada.

La Conseyera de Cultura, Comunicación Social y Turismu, Ana Rosa Migoya, destacó na presentación del conveniu los restos del Sidrón como’l conxuntu de restos neandertales más importante de la Península Ibérica. Pol so llau, el caderalgu coordinador de los trabayos, Javier Fortea, agradeció-y al Principáu el so sofitu y vaticinó nuevos ésitos na investigación.

El cascu hestóricu de la villa de Castropol gocia dende güei d’un especial nivel de protección oficial frente a posibles intervenciones arquitectóniques, depués de que’l Conseyu de Gobiernu’l Principáu declarara’l conxuntu como Bien d’Interés Cultural (BIC), la máxima categoría de protección que prevé la Llei de Patrimoniu Cultural.

Na única resolución que cinca a la Conseyería de Cultura, Comunicación Social y Turismu na xuntanza ordinaria que’l Conseyu de Gobiernu cellebró esti mediudía n’Uviéu, l’Executivu autonómicu alcordó da-y plena validez al decretu que protexe’l cascu vieyu de Castropol, dientro la calificación de Conxuntu Hestóricu.

La villa del estremu occidental asturianu, allugada na oriella de la ría l’Eo, alberga destacaos exemplos de l’arquitectura asturiana nes sos distintes variantes dende’l sieglu XVI hasta anguaño, con edificaciones representatives del barrocu, el racionalismu y el denomináu rexonalismu montañés.

Ente elles alcuéntrense los Palacios del Marqués de Santa Cruz de Marcenado, de Valledor y de les Cuatro Torres, amás de la ilesia de Santiago Apóstol, l’edificu ‘Villa Rosita’ o la mesma Casa Consistorial.

Entrada gratuita a tolos museos públicos y una atención especial al patrimoniu oral. Asturies súmase güei a les celebraciones del Día Internacional de los Museos, que nesta edición destaca el patrimoniu inmaterial, abriendo les puertes de los sos equipamientos culturales, que recibieron mediu millón de visites a lo llargo de 2003 y qu’esti añu van camín de superar esa cifra gracies a l’apertura hai poco más d’un mes del Muséu Xurásicu en Colunga.

La gratuidá nes entraes sedrá la midida más al algame de la ciudadanía nesta xornada de celebraciones, pero los habitantes de la zona central tendrán amás la oportunidá d’asistir esta tarde n’Uviéu a la conferencia que Jesús Suárez López, filólogu y responsable del Archivu de la Tradición Oral del Muséu Etnográficu del Pueblu d’Asturies, que fará un llamáu na so intervención a sistematizar l’estudiu d’esta estaya pa evitar la desapaición d’un bayurosu patrimoniu oral como l’asturianu.

A xuiciu de Jesús Suárez, ye urxente y necesaria l’aplicación d’un programa de recolección, estudiu y difusión del patrimoniu oral pa poder evitar la so perda, xera na que puen ayudar decisivamente les nueves tecnoloxíes que tán emplegándose n’otros países.

74.500 persones accedieron l’añu pasáu a les instalaciones del Pueblu d’Asturies, en Xixón, que se convirtió nel segundu muséu más visitáu en 2003. Una cifra que namás foi a superar el qu’hasta agora vieno funcionando como’l buque insignia de los museos autonómicos, el Muséu de la Minería y la Industria, allugáu en L’Entregu, que recibió 85.000 visites a lo llargo de 2003. Pesie a que’l panorama camudó dafechu cola apertura, el mes pasáu, del Muséu Xurásicu en Colunga -que namás nos sos primeros venti díes acoyó 30.000 visites-, l’equipamientu cultural entreguín afítase como ún de los museos con más tirón ente los turistes que visiten Asturies.

Según cifres asoleyaes pola Conseyería de Cultura, Comunicación Social y Turismu, el tercer muséu de titularidá autonómica más visitáu en 2003 foi el de Bellas Artes, con casi 56.000 entraes emitíes. A una distancia considerable asítiense los museos de Xovellanos (38.600 visitantes l’añu pasáu), de la Sidra (37.000) y de la Iglesia (casi 31.500), mientres que los museos Marítimu y del Ferrocarril acérquense al umbral de los 25.000 visitantes añales.

Los dos equipamientos etnográficos más veteranos d’Asturies, el xixonés del Pueblu d’Asturies y el muséu de Grandas de Salime, aporten la quinta parte del osíxenu que-yos da vida a los museos públicos asturianos. 95.000 persones accedieron l’añu pasáu a les instalaciones de dambos complexos, y fixeron del Muséu Etnográficu del Pueblu d’Asturies el segundu más visitáu en 2003, con 74.500 entraes despachaes.

Una cifra que namás foi a superar el qu’hasta agora vieno funcionando como’l buque insignia de los museos autonómicos, el Muséu de la Minería y la Industria, allugáu en L’Entregu, que recibió 85.000 visites a lo llargo de 2003. Pesie a que’l panorama camudó dafechu cola apertura, el mes pasáu, del Muséu Xurásicu en Colunga -que namás nos sos primeros venti díes acoyó 30.000 visites-, l’equipamientu cultural entreguín afítase como ún de los museos con más tirón ente los turistes que visiten Asturies.

Según cifres asoleyaes güei pola Conseyería de Cultura, Comunicación Social y Turismu, el tercer muséu de titularidá autonómica más visitáu en 2003 foi el de Bellas Artes, con casi 56.000 entraes emitíes. A una distancia considerable asítiense los museos de Xovellanos (38.600 visitantes l’añu pasáu), de la Sidra (37.000) y de la Iglesia (casi 31.500), mientres que los museos Marítimu y del Ferrocarril acérquense al umbral de los 25.000 visitantes añales.

Cifres enforma más discretes son les qu’aporten otros equipamientos culturales como’l Muséu del Oriente d’Asturies -tamién Etnográficu-, que recibió 9.000 visites l’añu pasáu, y los museos xixoneses de Nicanor Piñole, Barjola y Evaristo Valle, toos ellos con un númberu cercanu a los 15.000 visitantes.

La Conseyería de Cultura, Comunicación Social y Turismu del Principáu d’Asturies, de la que ye titular Ana Rosa Migoya, prevé rematar antes qu’acabe esti añu un remocicamientu de la ilesia prerrománica de Santa María’l Narancu, allugada n’Uviéu, pal que se destina un presupuestu de 216.500 euros.

L’actuación nel monumentu basaráse na renovación de la cubierta y nel remocicamientu de los pavimentos, que tán enforma deterioraos por mor de l’alta afluencia de visitantes al templu. Nesti aspectu, y énte la dificultá de cuidar con normalidá’l prau qu’arrodia el monumentu, Cultura colocará una pavimentación de cantu rodáu na superficie esterior más averada al palaciu-ilesia, pola que’l públicu accede al edificiu.

Ye una de les iniciatives aprobaes nel Plenu’l Conseyu de Patrimoniu Cultural qu’ayeri se cellebró n’Uviéu, xuntanza na que tamién se decidió entamar obres de remocicamientu n’otros dos templos: San Xuan de Prioriu (Uviéu) y San Salvador de Fontes (Villaviciosa).

La reunión del Plenu’l Conseyu de Patrimoniu, que presidió la conseyera de Cultura, foi la primer xuntanza d’esti muérganu na presente llexislatura autonómica.

D’esti mou, el conxuntu d’edificaciones tradicionales que formen Argul, llocalidá asitiada a 4 kilómetros de la capital de Pesoz, quedará embaxo’l máximu nivel de protección que prevé la Llei de Patrimoniu Cultural del Princípáu, polo que se llimitarán dafechu les futures intervenciones sobro cases, horros y otros elementos qu’agora resulten especialmente protexíos.

Lo mesmo ocurrirá con tres edificios singulares: el Palaciu’l Marqués de Camposagráu, en Mieres, llevantáu nel sieglu XVII y propiedá orixinal de la familia Bernaldo de Quirós; la torre medieval de Silviella, reconstruyida n’Onís depués de sufrir un incendiu; y el Palaciu Valdés Bazán, asitiáu en Candamu dende’l sieglu XVII por iniciativa d’Antonio Valdés Bazán, Ministru de Marina y collaciu de Xovellanos.

Nos planes del Conseyu de Patrimoniu Cultural entra tamién la tipificación como BIC d’un tableru de cancel prerrománicu allugáu tamién en Candamu y del complexu hidroelléctricu de Grandas de Salime conocíu como El Saltu, qu’inclúi relieves de Joaquín Vaquero Palacios y un mural del so fíu, Vaquero Turcios.

Esperábense 60.000 visitantes pa tol añu 2004 y sólo nos sos primeros venti díes de vida, el Muséu Xurásicu d’Asturies (MUXA) recibió 30.000 visites. L’equipamientu cultural temáticu, ambientáu na dómina na que vivieron los dinosaurios y allugáu na rasa de San Telmo, na costa de Colunga, esborda les previsiones de la Conseyería de Cultura y alita a los responsables del Gobiernu asturianu a meyorar la señalización p’acceder al recintu.

En concreto, l’Executivu autonómicu tien previsto asitiar a curtiu plazu nueves señales que-yos faciliten el camín p’hacia el muséu a los automovilistes que circulen tanto pola autovía’l Cantábricu como poles carreteres comarcales de Colunga. Tamién nel planu de les innovaciones, Cultura prevé echar a andar la proyección de breves películes interactives que-yos fagan más amena la visita al MUXA a los más neños.

La Universidá d’Uviéu, pol so llau, trabaya xunta los responsables del Principáu pa tener llistu al rodiu del mes de xunu un calendariu d’esposiciones itinerantes y conferencies rellacionaes colos conteníos que s’amuesen nel muséu, con epicentru nel habitat y na vida cotidiana de los dinosaurios hasta la so misteriosa estinción.

Inaguráu el 31 de marzu pasáu y titularidá del Principáu, el Muséu Xurásicu d’Asturies recibió miles de visites con ocasión de les vacaciones de Selmana Santa. El Gobiernu asturianu ta acabante fixar el miércoles como el día de visita gratuita al equipamientu cultural, depués de que nun principiu s’apostare polos martes.

Web oficial del Muséu Xurásicu d’Asturies

La entrada gratuita al Muséu’l Xurásicu d’Asturies (MUXA), allugáu costa de Colunga, sedrá definitivamente los miércoles. Asina lo alcordó el Gobiernu’l Principáu, que nun principiu estableciera’l martes como xornada de visita gratuita al equipamientu cultural y qu’agora rectifica por razones, según el propiu Executivu, por “razones operatives que cinquen a la organización y funcionamientu del Muséu”.

El cambiu tá yá ratificáu nel Boletín Oficial del Principáu d’Asturies (BOPA), que publica la midida na so edición del llunes 19 d’abril y camuda un matiz na regulación de les tarifes d’entrada al muséu, afitada nel Decretu 23/2004, de 25 de marzu, y espublizada nel BOPA cinco díes depués.

D’esti mou, el públicu podrá acceder gratis al Muséu’l Xurásicu d’Asturies tolos miércoles del añu, amás de cada 18 de mayu, fecha na que se cellebra’l Día Internacional de los Museos.