L’Arena denuncia qu’una trama urbanística quier valtiar la última de les sos hestóriques conserveres

Ye’l caberu y pue desapaecer. L’edificiu de la firma ‘Conservas Lis’, últimu esponente en pie de la hestórica industria conservera de San Xuan de L’Arena, cuerre peligru por intereses urbanísticos, según denuncia un collectivu vecinal que s’opón al posible valtiamientu del inmueble, edificáu a primeros del sieglu XX con una fachada qu’inclúi elementos propios de l’arquitectura modernista.

Según vien denunciando l’asociación de vecinos Ríu Nalón, col sofitu de grupos con representación nel Ayuntamientu de Muros como l’independiente Cambiu Sieglu XXI, la especulación urbanística pue arramplar darréu cola cabera conservera que queda en pie en L’Arena si les autoridaes polítiques nun amuesen un determín claru a favor del caltenimientu del hestóricu inmueble.

L’edificiu de ‘Conservas Lis’ abrióse en principiu como hotel y casinu, y depués pasó a funcionar como cine baxo los nomes sucesivos de ‘Vemfac’ y ‘Taylor’. Na dómina de la posguerra utilizóse como ilesia hasta que se reconstruyó’l templu parroquial, y na década de los cuarenta foi alquiríu a la fin pol empresariu conserveru Manuel Iglesias de la Torre, que mantuvo nél una fábrica de conserves y salazones de pescáu hasta los setenta.

La publicación llocal ‘La Ilustración Asturiana’, editada por un grupu de vecinos de Muros, dedíca-y nel so númberu correpondiente a la primavera un ampliu reportaxe a la hestoria de la industria conservera de L’Arena, clave na economía de la zona a lo llargo’l sieglu XX.