Los centros etnográficos aporten la quinta parte de los visitantes a museos asturianos

Los dos equipamientos etnográficos más veteranos d’Asturies, el xixonés del Pueblu d’Asturies y el muséu de Grandas de Salime, aporten la quinta parte del osíxenu que-yos da vida a los museos públicos asturianos. 95.000 persones accedieron l’añu pasáu a les instalaciones de dambos complexos, y fixeron del Muséu Etnográficu del Pueblu d’Asturies el segundu más visitáu en 2003, con 74.500 entraes despachaes.

Una cifra que namás foi a superar el qu’hasta agora vieno funcionando como’l buque insignia de los museos autonómicos, el Muséu de la Minería y la Industria, allugáu en L’Entregu, que recibió 85.000 visites a lo llargo de 2003. Pesie a que’l panorama camudó dafechu cola apertura, el mes pasáu, del Muséu Xurásicu en Colunga -que namás nos sos primeros venti díes acoyó 30.000 visites-, l’equipamientu cultural entreguín afítase como ún de los museos con más tirón ente los turistes que visiten Asturies.

Según cifres asoleyaes güei pola Conseyería de Cultura, Comunicación Social y Turismu, el tercer muséu de titularidá autonómica más visitáu en 2003 foi el de Bellas Artes, con casi 56.000 entraes emitíes. A una distancia considerable asítiense los museos de Xovellanos (38.600 visitantes l’añu pasáu), de la Sidra (37.000) y de la Iglesia (casi 31.500), mientres que los museos Marítimu y del Ferrocarril acérquense al umbral de los 25.000 visitantes añales.

Cifres enforma más discretes son les qu’aporten otros equipamientos culturales como’l Muséu del Oriente d’Asturies -tamién Etnográficu-, que recibió 9.000 visites l’añu pasáu, y los museos xixoneses de Nicanor Piñole, Barjola y Evaristo Valle, toos ellos con un númberu cercanu a los 15.000 visitantes.