Patrimoniu

El Colectivu d’investigación etnográfica “Fundación Belenos” ta acante d’espublizar un númberu nuevu de la revista más importante n’Asturies no que cinca a les investigaciones etnográfiques. La revista dirixida por Lisardo Lombardía, Ignaciu Llope, Gausón Fernande y Xosé Nel Riesgo, tien dellos artículos, la sección “L’estoxu”, onde se reseñen les últimes novedaes bibliodiscográfiques del país.

L’artículu “Asturies y el so gloriosu Exército Defensivo Asturiana na guerra la Independencia”, a cargu del ARCHA abre la revista y siguen artículos como “Averamientu a la tradición del viguilín n’Asturies” d’Ana Lombardía González o “La panera de la casa de la Viuda, L.linares(Ayande) onde Amparo García Iglesias y Luis Rodrigo Rodríguez Simón describen “un casu únicu dientro l’Estilu Ayande”.

La revista ta a la venta nes llibreríes del país y na web de la Fundación Belenos, qu’ufre la posibilidá de soscribise.

L’Asociación Camudando entama mañana e les I Xornaes Ecolóxiques na sala Capistrano de Villaviciosa. Los actos inclúin la presentación del colectivu, el vienres a les siete la tarde. Amás, a partir d’esta mesma hora van celebrase charres sobre la salú y el mediu ambiente y esperiencies agroecolóxiques llevaes alantre n’Asturies.

El sábadu va falase d’educación ambiental y esperiencies en güertos ecolóxicos pela mañana. Y yá de tarde van celebrase talleres de recicláu de papel y aceite, y ente otres coses, un conciertu de baldre en “La Bodega”.

Les xornaes cuenten cola participación de dellos coleutivos de dientro y fuera de la Comarca la Sidra , con abonda esperiencia nestos temes y que vienen desarrollando propuestes y alternatives nueves dende hai bien de tiempu.

El Muséu Xurásicu d’Asturies (MUXA) prepárase pa celebrar el so cuartu aniversariu con un ampliu programa d’actividaes que se desendolquen a lo llargo de la próxima selmana. El 1 d’abril el MUXA festeya’l so cuartu aniversariu con una xornada de puertes abiertes a la que va asisitir la Conseyera de Cultura y Turismu, Encarna Rodríguez Cañas. Pa facilitar l’accesu al recintu, dende les 10,00 de la mañana ponse en marcha un serviciu d’autobús gratuitu dende Colunga (delantre de la ilesia) y Llastres (paraes del ALSA) al Muséu Xurásicu.

El serviciu va prollongase hasta les 19,00 hores. Tola selmana hai un ampliu programa de visites guiaes que van incluyir l’accesu a los llaboratorios del muséu, ónde l’equipu científicu trabaya día a día nes sos investigaciones y estudia los fósiles estrayíos de les diferentes xacedes asturianes. El programa inclúi tamién la visita a una d’estes xacedes, la de la playa de la Griega. Seis nuevos talleres didácticos van ponese en marcha na selmana, trés d’ellos dirixíos al públicu infantil y dos empobinaos a adultos. El programa complétase con un taller -yincana col títulu “El secretu de los Dinosaurios”.

Afitáu nun espectacular parax natural, frente a Llastres, álzase l’espectacular edificiu qu’agospia’l Muséu del Xurásicu. Trátase d’un inmueble qu’adopta la forma d’un gran resclavu de dinosauriu. Con cuasi 5.000 metros cuadraos d’esposición, el MUXA integra delles árees temátiques que tienen como filo conductor la historia de la vida na Tierra dende va 3.500 millones d’años, dende los tiempos anteriores al Mesozoicu hasta anguaño, pasando pel Triásicu, el Xurásicu y el Cretácicu.

La muestra, qu’inclúi espectaculares répliques d’animales xigantescos, céntrase nel Xurásicu asturianu, períodu del que daten los escepcionales xacedes asturianes de resclavos o icnites de dinosauriu. El MUXA tien una concepción espositiva vanguardista ya inclúi un centru d’investigación nel que s’estudien los escepcionales restos paleontolóxicos atopaos n’Asturies nes décades caberes.

El Muséu del Xurásicu allúgase al frente de los museos asturianos más visitaos. L’añu pasáu rexistró 152.396 visites frente a les 139.499 de 2006.

El Museu Xurásicu d’Asturies cumple esti martes 1 d’abril el cuartu aniversariu dende la so inauguración y los responsables del equipamientu van festeyalo con una xornada de puertes abiertes. Durante’l restu de la selmana, el museu ufre visites guiaes con accesu a los llaboratorios y al yacimientu de la playa de la Griega. Amás, el programa d’actos va incluyir dellos talleres didáuticos.

El MUJA ye un de los equipamientos culturales más visitaos d’Asturies con un total de 152.396 visitas rexistraes durante l’añu pasáu

El grupu de sidreríes Tierra Astur, que davezu entama actividaes pa promocionar la cultura gastronómica y agroalimentaria asturiana, fai un nuevu apueste pol propiu entamando un concursu de semeyes que tien por tema “La Cultura Tradicional Asturiana”. Un certame que quier amosar los paisaxes rurales camudaos pol home a lo llargo la hestoria d’Asturies.

El concursu tien cuatro categoríes o temes a los que ta abierta la presentación de semeyes “L’habitat y les construcciones tradicionales (pueblos, horreos, brañes, arquitectura popular)”, “El Paisaxe Humanizáu (el paisaxe como productu del trabayu de homes y muyeres durante xeneraciones)”, “Les Llabores y Industries Tradicionales (ganadería, llabranza, pesca, ferrería, molinos, etc.)” y “La Sociedá Tradicional (xente, rituales y romeríes, mercaos, dances tradicionales, etc.)”.

El plazu pa presentar les obres, termina’l 10 de mayu y los premios van ser de 700, 300 y 200 euros.

Bases completes del concursu

La formación política denunció estos díes “l’abandonu y la destrucción de dalgunes pieces de la ponte ferroviaria d’El Rebalde”, lo que podría constituir una falta grave según la Llei de Patrimoniu. AA fizo una denuncia formal énte la Comisión de Patrimoniu al Ayuntamientu de Noreña.

“Tres denunciar públicamente la escandalosa situación na que s’alcuentra la ponte ferroviaria de mediaos del sieglu XIX, desmontada y numberaes toles sos pieces pa la so reconstrucción va 10 años y abandonaes les sos partes nuna finca municipal dende aquella alcontrándose anguaño cubiertes de maleza y semienterraes”.

P’Andecha “a esta situación de por si grave améstase l’actuación sobre bona parte de les pieces d’esti patrimoniu con maquinaria de construcción de la empresa qu’executa unes obres na cai El Sol y a la que l’Ayuntamientu dexó utilizar la parcela”.

Tres dos selmanes ensin dengún tipu d’interés por parte del Gobiernu municipal en xeneral y de la Conceyalía de Cultura en particular pa iguar esta situación Andecha Astur vien de denunciar al Ayuntamientu ente la Comisión de Patrimoniu.

Na denuncia Andecha Astur espón les carauterístiques históriques de la ponte ferroviaria, el procesu de desmonte y l’abandonu na finca municipal demientres 10 años a la intemperie y ensin dengue tipu de seguridá y les actuaciones últimes de la empresa que fai les obres na cai El Sol.

Andecha Astur considera “qu’hai infracción, polo menos grave, yá qu’hai obres o intervenciones non autorizaes sobre’l patrimoniu ya incúmplese‘l deber de conservación como contempla l’artículu 108 relativu a les infracciones graves”.

La panera de la casona de montaña, del Parque d’Inviernu n’Uvieu. ye’l prototipu d’horru según los investigadores de la rede asturiana d’Hórreos y paneres. Esti horru patrón ye’l primeru que tipifique n’Asturies los directores d’esti proyectu, qu’agora van proceder a midir y catalogalu pa futuros estudios. La distinción tuvu llugar ayeri nun actu nel que partciparen el director del proyectu, Xose Nel Navarro y el Conceyal de Cultura d’Uvieu, Jose Suárez Arias-Cachero.

Xose Nel Navarro tamien quiso denunciar la situación llaceriosa, con una perda d’un al día, na que tan gran parte de los horreos de la rexón. Navarro tamien punxo enriba la mesa la idega de crear un espaciu pa conservar, desmontaos por pieces, los horreos que tean en peligru de desapaición. El conceyal de cultura de la capital, pela so parte, dio’l vistu buenu a esta iniciativa y tiro-y el guante a la Dirección Xeneral de Patrimoniu del Principáu pa que tenga en cuenta’l proyectu.

Yá hai ganadores d’esti certame añal organizáu pola asociación cultural “Fumientu”. El vocabulariu de Samil (Aliste) presentáu por Claudino Rozados, ye’l ganador na modalidá de vocabulariu tradicional. Foron finalistas: Manuel Martín, con un vocabulariu del puebru d’Agodre (Tierra del Pan); Carlos Coca, de Palacios del Pan y Maria José Zurrón, de los llugares senabreses de Vigu y Samartín de Castañeda.

Na categoría de toponimia, el premiu foi pa Manuel Manzanas, de Trabazos (Aliste), quien yá ganara’l premiu de vocabulariu na anterior edición col so trabayu “Palabreiro alistano”.

El xuráu estuvo compuesto polos siguientes miembros: Severino Alonso, Miguel Ángel Gelado, Pedro Gómez, Juan Carlos González Ferrero y José Alfredo Hernández, actuando como secretariu Antonio Ramos.

Nesta segunda edición participaron decisiete trabayos procedentes de cuasi toles comarques zamoranes (Senabria, Los Valles, Aliste, Tábara, Tierra del Pan, Sayago, Tierra de Campos, Toro y La Guareña). Once trabayos optaron al premiu al meyor vocabulariu y seis al de meyor recopilación toponímica. La valoración de la participación, que faen los responsables, “ye mui favorable, nun solo pol númberu de trabayos recibíos pola calidá y estensión de los mesmos”.

El Museu Arqueolóxicu d’Asturies va acoyer tres esposiciones enantes de reabrir les sos puertes a lo cabero de 2009. Según informaren los responsables de la equipación cultural ovetense, va haber una xornada de puertes abiertes en xunu, una esposición sobre la vía de la plata (en setiembre), otra titulada “El Señor de Sipán”sobre los restos atopaos en Peru de lo que se supón una civilización anterior a los Incas (xineru y febreru de 2008), y otra sobre los castros (enantes de la inauguración).

Un tambor asturianu, cuya fecha de construcción data de primeros del sieglu XX, y una cacía de loza fecha alredor de 1900 na fábrica “La Asturiana” de Xixón, van pasar a formar parte de la coleición del Museu’l Pueblu d’Asturies, que dirixe Jesús Montes Estrada. Estes pieces, d’un gran interes etnográficu pa comprender lo que yera la vida cotidiana de los nuesos antepasaos, van suponer una inversión de 900 euros (300 euros el tambor y 600 la cacía) pa la Conseyería de Cultura Tradicional y Llingua asturiana del Conceyu de Xixón.

Estos dos nuevos elementos, que van poder vese nel museu xixones proximamente, tan donaos por Jose Luis Prado Fonseca, vecín d’Uvieu, y por David Caballín Muñiz, de Xixón.