Patrimoniu

El Conceyu de Cultura Tradicional “Vezos Astures” entama un añu más los alcuentros cola cultura tradicional, qu’esti añu na so VI edición van dedicadase a la comunidá gallega, d’onde van venir dellos investigadores a impartir unes charres y talleres el sábadu día 9 de Payares nel Antiguu Institutu de Xixón. La xornada, d’accesu llibre y gratuitu, entama a les 11 la mañana con una conferencia sobre “Ritos y tradición oral na nueche de tolos santos” a cargu de Bertu Peña, etnógrafu de la Fundación Belenos (Asturies), darréu seguimos con “A i-aña: ritual de les llabraes na comarca de O Condado” a cargu del grupu “O Tear de Llerena” (Pontevedra).

Fadráse una posa pa xintar y de tardi a partir de les 17:00 hores va entamase un taller de los bailles rellacionaos colos ritos del meíz nel sur d’Ourense y otru taller de baille tradicional asturianu.

Son munchos los que s’alleguen d’otres rexones pa estos alcuentros xenerando un braeru intercambiu de cultura tradicional na ciudá al que tamos toos covidaos. Los alcuentros van rematase nuna espicha con música en diréutu a cargu de “La Bontourné”.

El Conceyu de Cultura Tradicional Vezos Ástures ye una asociación que tien como oxetivu recoyer, estudiar y espublizar el conxuntu de tradiciones asturianes, especialmente los aspeutos rellacionaos cola música, el baille y los elementos etnográficos que lleven acomuñaos.

Más información na páxina web del Conceyu Vezos Astures

Los ecoloxistes del Patronatu del Parque Nacional de los Picos d’Europa alertaron esti martes de nueves quemes nesti entornu protexíu, denunciando al mesmu tiempu, tres d’un fuéu declaráu de madrugada, la falta vixilancia y prevención de les quemes forestales polos órganos xestores. Ficiéronlo nuna nota de prensa, na que tamién reclamaron que “el delitu de quema forestal s’escuerra sin pausa y sin tregua, con tolos medios posibles”,

Los ecoloxistes atalanten que “si nun s’aplica la condena penal, prescíndese d’una ferramienta fundamental pa frenar que los que cometen les agresiones por intereses económicos al Patrimoniu Natural testeren nello”. Darréu d’ello soliciten que s’aplique “con rigor dafechu la Llei de Montes y se prohiba tou accesu de ganáu a les zones quemaes hasta la so completa rexeneración”.

El Colectivu Ecoloxista d’Avilés denunció ante’l Principáu d’Asturies el mal funcionamientu de la depuradora de Macua, que s’aprecia na ría d’Avilés onde apaecen de forma frecuente esplumes procedentes del colector del estelleru que ye la salida de la depuradora col consiguiente impactu ambiental nes agües de la ría.

En vista de les importantes esplumes formaes nes últimes selmanes, los ecoloxistes dirixéronse en delles ocasiones al Consorciu pal Suministru d’Agua y Saneamientu nel Principáu d’Asturies (Cadasa) que ye la sociedá responsable de la depuradora por qu’amenorguen estes esplumes, ensin qu’hasta la fecha fixeran casu nengunu.

Les esplumes formense nes depuradores por una elevada carga orgánica que nel casu de Macua produzse al tar en carga continua. Mientres la depuración, l’apaición d’espluma ye un efectu secundariu indeseáu qu’enzanca’l procesu de depuración, qu’amuesa un eleváu nivel contaminante na agua arramada.

La depuradora de Macua trata les agües de los conceyos d’Avilés, Castrillón, Corvera y Gozón ta proyeutada pa depurar, por aciu un procesu d’alta carga, los arramaos d’una población equivalente de 215.000 habitantes, con un caudal mediu diariu de 123.811 m 3/día. Anque güei, hai colectores pindios de conectase a la rede principal en dellos conceyos, non toles agües van a esta instalación.

Resulta evidente qu’esti efectu produzse por un mal procesu de depuración que la empresa operadora nun soluciona a pesar de los continuos pidimientos, col consiguiente impactu nel so arramáu a la ría y, nel so futuru, al mar una vegada qu’ente en marcha l’emisariu que lleva paráu mas de 2 años, non esta claro cuando funcionara y como funcionara, en vista de los continuos arramaos que producen les empreses a la ría y los sos afluentes, arramaos que depués nun vamos ver porque acabaren na mar contaminando esta y les sableres de Gozón dende Xago a les colindantes.

La Fundación Belenos celebró esta fin de selmana en La Puela Ayande la so XIV Seminariu d’Estudios Asturianos empobináu a aldericar esti añu sobre ‘La güelga celta n’Asturies’. La xornada del sábadu componíase de cinco conferencies qu’averaron al celtismu n’Asturies dende una perspectiva histórica, cultural y social, mentantu que la del Domingu pesllóse con una visita al Castru de San Chuis y l’anuncia de que la nueva edición dedicaráse l’añu entrante a l’alimentación na cultura tradicional asturiana.

Ignaciu Llope, miembru de la fundación, foi l’encargáu de cavilgar sobre «la construcción de la narrativa celta y del discursu celtista n’Asturies», defenciendo que nun naciera cola transición política y l’Estáu de les autonomíes, como munchos camienten, sinón qu’a lo menos vien del sieglu XVII. Llope dexó afitao que hai qu’esclariar que nun ye cierto que lo celta naciere col Estáu de les autonomíes, nun mimetismu primariu con otres nacionalidaes históriques. Llope destacó tamién que’l celtismu n’Asturies yá ta reflexáu na primer hestoria escrita sobre Asturies, ‘Antigüedaes y coses memorables del Principáu d’Asturies’, del Padre Carvallo, del sieglu XVII: “A partir d’ende, nun hai historiador o investigador alrodiu de la realidá histórica, cultural y llingüística d’Asturies que nun allegue a lo celta como esplicación fundamental de la etnogénesis de los ástures”.

L’alderique tamién xiró en redol al celtismu llingüísticu asturianu y la caracterización de les llingües falaes n’Asturies na conquista romana». El caderalgu universitariu Xoxé Lluis García Arias, exdirector de l’Academia de la Llingua, foi l’encargáu de cavilgar sobre’l casu asturianu. Tamién de faló de la mitoloxía celta, con una conferencia del etnógrafu Alberto Álvarez Peña sobre ‘El mundu de -yos mentalidaes na Céltica atlántica’, na qu’estableció paralelismos, coincidencies y complementariedaes ente la mentalidá d’Asturies y del restu de los países de la Europa atlántica céltica.

L’Arcu Atlánticu Européu y el llugar qu’ocupa Asturies foi otru de los asuntos que s’encetaron. El xeógrafu Xoxé Nel Riesgu allugó correchamente esi llugar y enfotose na so consideranza como activu con vistes al desenvolvimientu futuru d’Asturies.

Losasistentes al seminariu ficieron una visita empuesta castru allandés de San Chuis, complementada con una conferencia sobre la Edá del Fierro y la celtización d’Asturies na dómina prerromana al cargu del doctor Jesús Francisco Torres.

p

Antaño los homes y muyeres que vivíen n’Asturies nun vistíen como nós, sinón que llevaben ropa que, pasu ente pasu, foi cambiando. El traxe tradicional asturianu ye la manera de vistir que teníen los nuesos antepasaos nos sieglos XVIII y XIX. Esta esposición va amosar copies de traxes tradicionales sofitaes en documentos gráficos, testuales y orales, d’aquella manera de vistir, tanto de la xente que trabayaba la tierra como de la xente que trabayaba la mar, y ye parte de los actos conmemorativos del trenta aniversariu del grupu de baille candasín.

Ente los actos paralelos a la esposición va haber un conciertu de música tradicional na Casa la Cultura de Candás el vienres 25 a les 20:15 hores y visites guiaes los díes 18, 19, 21 y 25 a les 19:30 hores.

HORARIU DE LA ESPOSICIÓN.- De llunes a sábadu de 19 a 21 hores y domingu de 12 a 14 hores y de 18 a 21 hores.

Xosé Lluis García Arias arrancó la campaña sobre la toponimia de Samartín del Rei Aurelio na Casona del Bravial con una charra que sirvió de presentación de la campaña mesma que lleva por títulu “Los nomes de llugar nun tienen preciu”. Xosé Lluis García Arias, especializáu en cuestiones del ámbitu llingüísticu y toponímicu, como asina lo amuesen gran parte de les sos publicaciones, fizo referencia a l’orixe de munchos topónimos del conceyu como Sotrondio, Blimea, Llantero o La Güeria, y asina un llargu etcétera de nomes polos que s’interesó’l numberosu públicu asistente.

L’Ayuntamientu de Samartín del Rei Aurelio, a de la so Oficina de Normalización Llingüística, presentó esti xueves una nueva campaña destinada a reforzar l’usu de la toponimia oficial del conceyu, aprobada por decretu nel añu 2008. Pa ello llevó a cabu la edición de 2000 chapes metáliques nes qu’apaecen recoyíos un total de 52 topónimos del conceyu. Sanamiés, La Güeria, L’Acebal, La Envernal o La Potoxa, ente otros munchos, son dalgunos de los nomes de llugar qu’apaecen reflexaos nestes chapes. Tamién s’editaron pegatines col nome del conceyu y cartelos de la campaña col eslogan “Los nomes de llugar nun tienen preciu” que se van repartir per distintos edificios públicos como biblioteques, polideportivos o telecentros.

L’actu contó cola presencia de l’alcalde de Samartín del Rei Aurelio, Enrique Fernández Rodríguez. Xosé Lluis García Arias, especializáu en cuestiones del ámbitu llingüísticu y toponímicu, como asina lo amuesen gran parte de les sos publicaciones, fizo referencia a l’orixe de munchos topónimos del conceyu como Sotrondio, Blimea, Llantero o La Güeria, y asina un llargu etcétera de nomes polos que s’interesó’l numberosu públicu asistente. Al final de la charra repartiéronse ente la xente chapes y pegatines colos topónimos del conceyu.

Nel actu pudo vese tamién un videu sobre la campaña nel que distintes persones lligaes a la cultura como Alfonso Zapico, Chus Pedro o Aurora Suárez, y tamién el propiu alcalde del conceyu animen al usu de la toponimia oficial. Esta campaña fízose en collaboración cola Rede de Normalización Llingüística nos Conceyos y cuenta col sofitu de la Conseyería d’Educación, Cultura y Deporte del Principáu d’Asturies.

El Muséu de la Siderurxa de Llangréu volverá abrir les sos puertes nesti próximu mes de payares, sigún les previsiones previsión que remanen los nuevos xestores del equipamientu cultural, los responsables de la empresa asturiana La Productora, qu’esta mesma selmana van roblar el contratu d’esplotación de la instalación por un plazu de nueve años con opción a otru exerciciu de prórroga.

De mano, los nuevos responsables tienen de recepcionar el serviciu, facer inventariu de bienes y quiciabes tengan de realizar dalguna pequena obra d’acondicionamientu, porque inda nun esaminaron la instalación, sigún declararon esta selmana en Llangréu. Con too esperen que pa payares el muséu yá vuelva tar operativu.

El complexu cultural cerró les sos puertes el pasáu 1 de xunetu en concluyendo la prórroga de la empresa que xestionara’l muséu dende la so apertura, Consultoría Zeppelin. El patronatu planiara un nuevu modelu de explotación pero, al quedar desiertu’l primer concursu convocáu, nun llegó a tiempu pa garantizar l relevu de forma que l’equipamientu siguiera abiertu. Al segundu procedimientu convocáu presentáronse dos ufiertes. Finalmente La Productora llevó la concesión.

El próximu domingu, 22 de setiembre, celebrar nel Muséu del Pueblu d’Asturies la II XORNADA DE DANCES DEL MUNDU, entamada por “Llevantate y Danza. Asociación de Dances del Mundu”, de Xixón cola collaboración del Conceyu de Xixón y el “Conceyu de Cultura Tradicional Vezos Ástures.

El programa de la Xornada ye’l siguiente:

11:00 a 12:30 h. Taller de dances de Rusia, Grecia, Rumanía, Turquía, etc. 12:45 a 14:15 h. Taller de dances asturianes impartíu pola asociación “Vezos Ástures”. 14:30 a 15:00 h. Baille. 15:00 a 16:30 h. Comida campestre nel muséu. 16:30 a 18:00 h. Bailles europeos de pareyes (scottish, mazurka, valse, etc.) 18:00 a 20:00 h. Conciertu del grupu folk “La Bonturne”.

La entrada a toles actividaes ye llibre y gratuita.

Más información sobre l’Asociación “Llevántate y Danza” y l’II Xornada de Dances del Mundu en: http://levantateydanza.wordpress.com/

Con esta actividá’l Muséu del Pueblu de Asturies sigue collaborando coles asociaciones implicaes na promoción y espardimientu de la cultura asturiana y la conocencia d’otres cultures del mundu.

Asociación Levantante y Anda

El Muséu Etnográficu del Oriente de Asturias tien previsto inaugurar el viernes día 20 de Septiembre a las 19 horas nel Centru Cultural Llacín una esposición fotográfica que va dir acompangada de la presentación del llibru “Vestidos de asturianos. Ciento cincuenta años de fotografía e indumentaria en Asturias”. L’actu cuntará cola presencia de la so autora Fe Santoveña Zapatero, historiadora y antropóloga.

El llibru fai un percorríu pol orixe, difusión y evolución del traxe asturianu, dende so aniciu, en metanes del sieglu XIX hasta les reproducciones d’anguaño que visten grupos de baile y bandes de gaites. Les milenta fotografíes y postales procedentes de los fondos del Muséu del Pueblu d’Asturies que sirven de fuente d’información principal d’esti estudiu foron revisaes pa facer la escoyeta que compón la esposición.

El coordinador d’IX visitó’l domingu güei xunta miembros de l’asociación de productores el XIV Certame de la Escanda de Grau y reclamó la denominación d’orixe pal granu d’escanda.

El coordinador d’IX Asturies, Manuel González Orviz, reclamó esti domingu nel XIV Certame de la Escanda de Grau, l’aprobación de la denominación d’orixe del granu d’esta cebera como un pasu pa garantizar la so viabilidá futura. El máximu responsable de la formación recordó qu’esa denominación d’orixe protexíu yá fuera solicitada pola asociación de productores (Asapes) pero que’l Principáu tener, dixo, en “stand by”.

“Tamos falando d’un productu que se caltuvo hasta’l sieglu XXI. Hai que protexelo nestos momentos de los trexénicos, hai que tratar de consiguir esa denominación d’orixe del granu y, coles mesmes, tener en cuenta qu’hai nestos momentos n’Asturies 33 hectárees en producción ecolóxica, toa ella ye ecolóxica. Tien de faese un esfuerzu per parte de l’alministración del principáu d’Asturies p’avanzar nesa llínea”, aseguró’l coordinador d’IX.

Orviz vistió esti domingu’l Certame moscón de la escanda acompañáu por miembros de l’asociación de productores, ente ellos, el so presidente, Falu Estrada, y unu del so vocales, Esteban Vega. Pa el productores, la consecución de la denominación d’orixe ye indispensable pa garantizar la viabilidá d’esta producción nel futuru.