Música

El primer día del Festival de Lorient ye un día atípicu tradicionalmente, y desque la crisis asola Europa yelo entá más, por culpa de que l’Espace Marine, el principal escenariu del festival dende la perspectiva económico y popular, nun abre nesa primer xornada, dexando la programación en manos de los espectáculos gratuitos.

La llegada de les Delegaciones de los distintos países celtes, gradiaes a lo llargo del día, dexa que se vaigan afayando al escenariu en que tendrán de desendolcase a lo llargo de diez díes y fai que’l primer vienres de cada mes d’Agostu sía en Lorient una xornada d’adaptación. Por eso, la nueche d’esti primer vienres d’agostu de 2013 presentábase como una novedá pa toos y una novedá na que la marca Asturies podía ponese de manifiestu.

El director del Festival, l’asturianu Lisardo Lombardía, yá apuntó na portada del boletín diariu del festival, -Le Festicelte, per ónde diríen los tiros: “Asturies: tous los sens en éveil” o lo que ye lo mesmo, tolos sentíos sollerta cuando de Asturies va tratase. Y la xornada, anque escasa en propuestes, cumplió con toles mires puestes nella gracies al magníficu trabayu del grupu bretón Dam? y la magnífica collaboración preaprada con Mario, Dark La Eme, y la so hip-hop tan mezclable como global.

Nun conciertu memorable para lo que ye un arranque de Festival nel tradicional Espace Bretagne, la combinación bretona-asturiana tuvo una eficacia inesperada ente un públicu ansiosu por convertir una nueche funki nuna Fest-Noz. Bailles tradicionales entemecíos con rapeos asturianos hasta algamar un climax tan aplaudíu como disfrutable pol públicu multixeneracional aconceyáu alredor de la primer nueche de festival, afatada con un fueos artificiales modestos pero abondos p’abrir boca de cara a la primer nueche máxica que tien llugar el primer domingu d’agostu.

Jesús Fernández ganó esti día’l Troféu Mc Crimmon de gaita solista que’l Festival de Lorient dedica a les gaites asturianes y gallegues nuna dura competición na que se punxo de manifiestu’l nivel qu’algamó la interpretación d’esti preséu nacional de toles naciones celtes d’Europa.El gaiteru asturianu que vien concursando nestos caberos años amosó la so veteranía y superó nesta dura competición al gallegu Zeús Rodríguez, segundu y a los asturianos Alvaro Álvarez y Jorge Suárez Carbajal.

El primer gaiteru de los ocho qu’allegaben al concursu foi l’asturianu Alvaro Álvarez Fernández, que tuvo la responsabilidá d’abrir la competición, lo que de xuru nun xugó nel so favor, como suel asoceder davezu nesti tipu de concursos. Y el tamién asturianu José Luis Fernández siguiólu con más nervios de lo habitual pero cuayando una magnífica interpretación nel set bretón, que suel ser definitivu nesti tipu de concursu onde hai un par de xuraos per cada música interpretada (gallega, asturiana y bretona).

Ismael García del Ríu foi’l primeru en presentar la propuesta gallega a la edición d’anguaño dando pasu al asturianu Jesús Fernández, que presentó la solidez que da yá la esperiencia, como nel casu de José Luis Fernández, de delles participaciones nestos últimos años. Lois Prau, Jesús Sánchez Ascariz y Xesús Rodríguez completaron la representación gallega, primero que l’asturianu de Siero Jorge Suárez Carbajal punxera puntu final al concursu con una actuación que fixo taramellar casi toles quinieles que los espertos fixeren hasta esi momentu de la resultancia final.

Depués d’empobinar el cantu en comuña de El Chalaneru en Llaviana y del Conciertu de Santiago en Sama con Jerónimo Granda y Los Berrones, Chus Pedro va ufrir esti martes nel Xardín Botánicu de Xixón un conciertu dientri del programa del Festival del Arcu Atlánticu. El Xardín Botánicu va acoyer esti martes, a les 22.30 hores, el conciertu del cantautor asturianu Chus Pedro, dientro de les actividaes programaes nel marcu del Festival del Arcu Atlánticu, despidiendo col mesmu’l so programa d’actuaciones en xunetu.

Chus Pedro va presentar ‘¿Cómo yera aquella que dicía?’ l’espectáculu que percuerre la banda sonora de la so vida, voz de Nuberu mientres los trenta años d’historia del grupu, con cantares que marcaron a toa una xeneración d’asturianos y asturianes que reivindicaron la normalización de la llingua asturiana con Nuberu y otros reepresentantes del folk de nueso. 

Nesti espectáculu, ‘¿Cómo yera aquella que dicía?’, Chus Pedro y Gabino Antuña faen, mano a mano, un repasu a los años de la recuperación llingüística y la Transición con un montaxe que tien por preciu na entrada d’ocho euros.

Córcega vieno acabante renunciar a la organización del Festival Europeo de la canción en llingües Minoritaries, poniendo en grave riesgu la edición de 2013 del Liet. La rexón de Córcega, decidió de sópitu nun acoyer y entamar la edición de 2013 del Liet International, poniendo en seiur peligru esti Festival que vien afitándose pasu ente pasu y que ya tuvoi llugar n’Asturies.

Nun fai falta dicir que la Fundación Liet Internacional caltúvose bien sosprendíos y decepcionaos por esta decisión, porque tolos artistes que yá se clasificaron pa la competición, de Friesland, n’Asturies, n’España y nos países escandinavos, en Laponia, y que tendríen accesu a dereches al eventu internacional, podríen nun participar.

N’ochobre del añu pasáu, la Fundación del Liet y la rexón de Córcega, roblaron un alcuerdu de collaboración pol que l’Alministración rexonal comprometióse formalmente a acoyer y entamar conjuntamente la competición europea del cantar nel idioma minoritariu. Y ye bien llamentable que Córcega incumpliera los sos compromisos nuna fase tan avanzada de la fecha prevista pal eventu (8 d’avientu), lo que probablemente va facer que sía imposible pa mover la edición de 2013 de Liet n’otra ciudá o rexón d’Europa multilingüe.

Asina, la Fundación vieno acabante tomar la difícil decisión d’atayar l’eventu de 2013 y va centrase nel 2014 y los años siguientes, anque una baxa probabilidá d’ésitu entá persiste.

Munchos inda tán les rexones europees que yá son candidatos p’allugar l’eventu nel futuru. Tamién por esta razón, nel mes d’ochobre, el Festival va presentase en Cardiff/Caerdydd, capital de Gales, nel WOMEX 2013, una de les mayores feries internacionales de música. La creación del Liet debese a la minoría de Frisia (Países Baxos). La so primer edición celebrose en 2002, en Ljouwert / Leeuwarden y a partir de 2006 entamóse’l festival en dellos llugares d’Europa, patrocináu pol Conseyu d’Europa.

Liet International ye un concursu de canciones en llingues minoritaries que ñació nel añu 2002 en Frisia (Países Baxos). Depués de les ediciones celebraes en Frisia, na zona del territoriu sami asentada en Suecia, Bretaña y Friul, Asturies foi llar del Liet International nesti añu 2012, y Xixón la primer ciudá de la Península Ibérica que lu acoyó. Por ser ún de los eventos más importantes pa la promoción de les llingües europees minoritaries y la música interpretada nun idioma rexonal, fue reconocíu pol Conseyu d’Europa, que lu patrocina dende 2008.

Esti sábadu celébrase en La Plaza de Grau, a partir de les 18:30 hores, el II Folk “in” Grau, festival que nació l’añu pasáu de mano de la Banda Gaites Conceyu Grau, l’Asociación La Veiga’l Cubia y el Conceyu de Grau col enfotu d’amosar nel conceyu lo meyor de la música y el cantar tradicional.

Va abrir l’eventu’l grupu avilesín Tejedor, referente del folk asturianu, que va ufiertar lo meyor de los sos cuatro trabayos yá editaos.

Va siguir la tarde con tonada a cargu del veteranu Ché de Cabaños, el moscón Rogelio Suárez y la nomada en munches ocasiones Meyor voz Asturiana, Anabel Santiago, pa dar pasu a la Banda Gaites Conceyu Grau, una de les bandes más nueves d’Asturies, que va creciendo añu tres añu.

Va pesllar la xornada’l gaiteru gallegu Anxo Lorenzo, músicu con bayura de premios “que de xuru va allantar a los asistentes col so virtuosismu”, comenten los organizadores.

El sábadu pasáu, 6 de xunetu, tuvo llugar en Martimporra la final del XIV Concursu de Gaita de Bimenes, certame entamáu pol Conceyu de Bimenes coincidiendo cola Fiesta de la Oficialidá. El ganador d’esta edición foi’l gaiteru sierense Fernando Vázquez Cárcaba, de 19 años d’edá, que llevó los 300 € en metálicu y el troféu del primer premiu. Amás, al ganador apurrióse-y un exemplar del “Cancioneru de la gaita asturiana”, obra iguada por Eugenio Otero Vega, Fonsu Fernández García y Gausón Fernande Gutierri, editada, y donada pa la ocación, pol Muséu del Pueblu d’Asturies.

El segundu premiu, dotáu con 200 € y troféu, foi pal gaiteru Álvaro Álvarez Fernández, de 18 años y tamién de Siero. Y el ganador del tercer premiu, al que se-y apurríen 100 € y troféu, foi Diego Lobo Tuñón, de 18 años y que vieno del conceyu d’Ayer. Nel concursu participaren finalmente catorce gaiteros y gaiteres qu’interpretaren dos pieces cada ún, siendo valoraes les mesmes por José Ramón García Navia, Martín Poladura Berros y Álvaro García Suárez, miembros del xuráu na edición d’esti añu.

El tríu italianu BRIGAN ye la formación ganadora del “I Concursu Internacional Uviéu Universu Folk” actividá que forma parte del programa de conciertos de folk internacional previstos p’amosar na capital d’Asturies a lo llargo del añu. A dicir del xuráu tres una intensa deliberación: “Cualesquier de los cuatro grupos que participaron na final d’Uviéu Universu Folk pudo algamar el trunfu nesta primer edición. Puesta n’escena bien aceptable, propuesta musical igualmente correcta y convincente, desemeyada conexón col públicu asistente, pluralidá d’estilos propuestos per caúnu de los finalistes en fusión col folk y con ciertu protagonismu pa la música de raigañu cumplieron dende cada unu de los directos de los cuatro finalistes coles premises marcaes por un concursu al que s’apuntaron una ventena llarga de formaciones llegaes dende toa España y diversos puntos d’Europa”.

El xuráu del certame tuvo conformáu pol portugués Mário Correia (director de Sons da Terra, del Festival Intercélticu de Porto, del Festival Intercélticu de Sendim y del Douro Celtic Fest en Gaia); por Ángel Goyanes (músicu de folk y director de la revista “Interfolk”); por Antonio Martínez Corzo (director de RCFM Radio Crónica Folk de Mérida, emisora especializada íntegramente en músiques tradicionales del mundu); por Alberto Balboa (coordinador y director artísticu del Festival Internacional do Mondo Celta d’Ortigueira – Galicia) y tuvo presidíu pol asturianu Aurelio Argel (director del veteranu programa folk “Música para raptar princesas” nos 40 Principales, collaborador musical nel diariu La Nueva España y otros medios de comunicación especializaos, coordinador y responsable de la publicación y Premios AMAS y del Anuario del Principáu, amás de xuráu del Premiu al Meyor Cantar n’Asturianu y del Concursu Liet International de Lengus Europees Minoritaries).

El xuráu decantóse pol trunfu del grupu italianu BRIGAN considerando pa ello “la mayor orixinalidá y diversidá de la so propuesta musical na que s’apiguren los soníos tradicionales propios de la so tierra d’orixe y un cuidadosu tratu dáu a les melodíes orixinales (instrumentales o cantaes en diversos dialectos y llingües) coles que’l tríu ufiertó un mostrariu de natural, equilibráu y con credibilidá sofitáu de la mesma nel agregu, nada estridente, de melodíes tradicionales d’otros puntos xeográficos qu’arriquecen y amplíen el so llabor d’espardimientu del folclore universal”.

BRIGAN (Ti Sfondo I Brodhán / Tradizione y contaminazione) ye un tríu que recrea na so obra musical l’arcaica y orixinal tradición sonora de la so tierra del sur d’Italia (instrumental y cantada en dialectos y llingües de la zona o en griegu antiguu) y, xunida al folk célticu” del Arcu Atlánticu, ritmos como la tammurriata o la pizzica y otros aires itálicos tán presentes de manera festiva al pie de muñeires gallegues y asturianes, xigues irlandeses, reels escoceses y An Dro de la Bretaña.

Magar la so mocedá, BRIGAN (Francesco Di Cristofaro a los whistles, gaites, xiblata irlandesa, curdión, bansuri y voz; Emilio Cozza al tamborín y panderos, darbuka, vigulín, bodhrán y voz y Danilo Parolisi a la guitarra, bouzouki, mandolina y voz) yá cunten con delles grabaciones discográfiques y estudios tradicionales según numberoses participaciones en festivales y eventos destacaos por toa Italia, Croacia, Eslovenia, Suiza ya Inglaterra a les qu’han de sumar agora’l trunfu nesta primer edición del Concursu Internacional Uviéu Universu Folk”.

Esta resultancia va dexar el regresu de BRIGAN a Uviéu pa participar como grupu convidáu nel segundu conciertu del programa Uviéu Universu Folk que’l día 14 de Setiembre va cuntar cola mítica formación Gwendal. El tercer conciertu incluyíu nesta primer andadura d’Universu Folk va presentar na seronda el nuevu discu conxuntu (“Triad”) del bretón Sylvain Barou y el irlandeses Padraig Rynne y Donal Lunny.

Uviéu Universu Folk desenvolvió los sos dos xornaes de concursu nel Teatru Campoamor la pasada fin de selmana de San Xuan cuntando con aceptable presencia de públicu qu’igualmente respondió de manera favorable al primer gran conciertu del cartelu protagonizáu pol grupu irlandés Lúnasa.

Un añu más recuérdase la figura d’Ígor Medio y Carlos Redondo, músicos del grupu Felpeyu que morrieron nun accidente de tráficu cuando viaxaben col so grupu. Esti añu, los conciertos d’homenaxe van percorrer dellos chigres de Xixón. Los organizadores recuerden que N’Alcordanza nun ye solo un alcuentru de músicos, músiques, públicu y llocales, “tamién ye una reclamación o una llamada d’atención a la situación de la música n’Asturies y de les persones que la faen posible”, pa lo qu’asoleyen un manifiestu nel que se reclamen delles cuestiones d’importancia pa la música asturiana.

El festival arranca’l vienres 28 de xunu a les 20.00 h. nel Toma 3, na cai Marqués de Casa Valdés 27 de Xixón. Tres de la presentación, habrá una actuación de Moonglow. Formáu nel so orixe por Luis Navarro (guitarra española) y Manuel Molina (percusión) en 1998, entamaron faciendo versiones y participando en festivales de jazz. En 2004 xuntóse-yos el vocalista Jorge Alonso y al poco, el saxofonista Juan Antonio Martínez. Ofrecerán un conciertu acústicu en formatu reducíu.

Depués del conciertu de Moonglow nel Toma3, a les 21.30 h. los actos siguen na sala de conciertos The Class, que ta na Avd. Torcuato Fdez-Miranda 2 baxu. Ellí va poder vese a dos bandes de sobra conocíes n’Asturies, Los Izquierdos y Los Testigos, grupu de versiones de los ’80 formáu por veteranos de la escena del pop-rock asturianu.

A les 00.30 h. celebraráse la “Fiesta n’Alcordanza 2013” nel Muddy’s, c/ Santa Elena 21. La fiesta tará amenizada pola música de los años 80, por cuenta de Boni Pérez, auténtica lleenda viva del pop asturianu. La esbilla musical tendrá tres estayes: Asturistán, Españistán y Guiristán.

La xornada del sábadu 29 va entamar a les 13:00 hores nel Café Alambique, llocal asitiáu nel númberu 52 de la Avd. de la Constitución. El Café Alambique ye un llocal onde pueden vese davezu conciertos de jazz, asina, les más de les bandes asturianes d’esti xéneru pasaron pel so escenariu, y nesti N’Alcordanza va poder vese a Rubio, Pizarro, García y Morales, tres apellíos qu’escuenden al saxu de Javier Rubio, la guitarra de Carlos Pizarro, el contrabaxu d’Horacio García y la bateria de Felix Morales, en resume, cuatro de les meyores músicos de jazz d’Asturies que se xunten a esta xornada de revindicación y alcordanza.

El día avanza, y a les 14:30 hores van tenese dos opciones, una ye la xuntanza de dos voces y dos guitarres que van vese les cares, y los micros, en La Vida Alegre, llocal nel centru de Xixón na cai Buen Sucesu 8, y que suel programar a lo llargo del añu conciertos de distintos estilos, rescamplando prestoses sesiones vermú dalgunos domingos. Ellí van tocar El Tamar, cenciellu nomatu tres del que s’escuende Pablo Tamargo, guitarrista que toca en varios grupos y que tamién tien carrera en solitariu. Del otru llau del escenariu, ensin saber mui con cuantos kilos, va tar Toli Morilla, voz y guitarra constantes na música asturiana dende va más de venti años y que puede facer dende lo más personal hasta versiones de Bob Dylan.

La otra opción a les 14:30 va ser na Sidrería Canteli, na cai Almacenes 6, onde ente sidra y comida bono vamos poder ver a dos de les voces más reconocíes de la canción asturiana, Ismael Tomás y Mariluz Cristóbal Caunedo. Los dos nun s’alcuerden yá de cuantes vegaes xubiero al escenariu o cuantos discos grabaron, pero siempre dexaron preba de dos voces increibles y un amor pola música fecha n’Asturies que merecía que la tonada y ellos dos tuvieren nesti N’Alcordanza.

Tres un descansu más bien pequeñu, la música vuelve a les 17:30 hores nel Ca Beleño de Xixón, na cai Rodríguez San Pedro, 39. El folk tien siempre abellugu nesti sitiu, poro ellí va poder vese a Cazurrín, proyectu personal del que foi vigulineru y bouzouki de Felpeyu, Fernando Oyagüez, trés d’él, va ser el turnu de Felpeyu, mítica banda de folk onde tocaben Ígor y Carlos. P’acabar. Tuenda, el tríu que dio-y una vuelta al repertoriu oral de la música tradicional asturiana.

A les 19:00 hores del sábadu la cosa sigue con más folk, nuno de los locales con más años y solera de la escena musical en Xixón, el Café Trisquel, na cai Marqués de San Esteban nº 30. Munchos conciertos y músicos pasaron pela so barra y escenariu. El N’Alcordanza folk del añu pasáu fízose ellí, y na edición d’anguaño los grupos folk DRD y Seu son los escoyíos pa tocar ellí. DRD, son un tríu de folk que surdió d’una actuación nel ciclu Folk de Cámara de Xixón, que precisamente entamaba Ígor Medio y que güei lleva’l so nome. Dende aquella ya van varios discos y munches ganes de facer bon folk. Seu pela so parte ye un grupu creáu de recién, y qu’axunta a varios de los componentes del grupu Corquiéu, como ellos se definen “banda de folk contemporáneu formada por cinco músicos del oriente asturianu, curtíos n’estremaos estilos musicales, que s’entemecen nesti proyectu.”.

Averándonos ya a la nueche, vamos dir pal Patio de la Favorita que ta na cai Ezcurdia nº4 (enfrente la playa) vamos ver una par de nome hestóricos de la escena musical xixonesa y asturiana. Per un llau The Travellling Zoo, que nun ye otro que Fran Elías el que fuera cantante y guitarrista nos 80 del grupu asturiano Modas Clandestinasy que se llanzó agora con esti proyectu musical unipersonal col qu’acaba de sacar discu, “Homework”. Compartiendo llocal va tar tamién Luís Dadá, que tamién pertenciera a una banda de mítica uviedina, Salón Dadá, y que coincide tamién col so compañeru en tar acabante de sacar discu entituláu “Nada”.

Vamos metiéndonos a la nueche, y a les 22:00 hores nel Café Dam (cai San Agustín, 14) va toca-yos el turnu a Lavandera y Medication/2. Estos últimos foron ún grupos encuadraos dientro del “Xixón Sound”, pero que quedaron a piques de grabar el so primer discu daquella. D’un tiempu a esta parte volvieron a la carga y decidieron particpar nesti N’Alcordanza. Lavandera vienen de Pola Siero col so apueste de pop de corte indie.

El caberu conciertu va facese nel Buddha (Marqués de San Esteban 23), ellí dende les 23:30 hores trés nomes de pesu como Pauline en Playa, el grupu xixonés llideráu poles hermanes Álvarez que ta acabante d’espublizar discu “El mundo se va a acabar”, Nacho Vegas nome de referencia na música independiente na actualidá y Radio Fox, pa pesllar unes versiones de Los Locos ye’l meyor plan.

MANIFIESTU N’ALCORDANZA D’ÍGOR Y CARLOS 2013

Hai yá siete años que perdimos a Ígor Medio y Carlos Redondo, músicos, productores, editores… activadores culturales en definitiva.

Tol mundu coincide en señalalos ente los más grandes nel so xéneru musical. Lo qu’igual nun sabe tol mundu ye qu’amás de too esto, foron trabayadores precarios de la música, poro, lo que se-y escapa a muncha xente ye que l’accidente que nos quitó a Carlinos y Figor foi un accidente llaboral, que nun figura como tal precisamente por eso, pola precariedá.

La mesma precariedá llaboral que siguen soportando la mayor parte de los y les trabayadores de la música asturiana. Por eso, nun queremos facer alcordanza d’Ígor y Carlos ensin más, queremos facer llegar a tola sociedá dellos esmolecimientos de los y les trabayadores de la música.

1- El sistema de cotización, de desemplegu, d’altes y baxes qu’anguaño esisten y afueguen a los y les trabayadores de la música, tien que modificase, por exemplu, deprendiendo de lleis esistentes nos estaos de la nuestra contorna. Tien qu’acabase que los y les trabayadores namás coticen el día que toquen.

2- La música en directo ta amenazada tanto poles instituciones locales, autonómiques y estatales como poles sociedaes que dicen defender los drechos de los autores. Tien qu’acabar d’una vez la persecución a les actividaes musicales desendolcaes en locales. La música ye cultura y la cultura ayúdanos a ser meyores persones.

3- La música asturiana nel so conxuntu tien de ser considerada como una industria más. Ye necesario un circuitu profesional pa los músicos d’Asturies. La presencia de la nuestra música nes promociones audiovisuales, asina como nes feries musicales, turístiques, o en cualquier actividá de promoción de “la marca Asturies” tien de ser una obligación pa les nuestres instituciones.

Asina que: N’alcordanza d’Ígor y Carlos, pola pervivencia de la música. Que vos preste’l conciertu.

El pasáu xueves, 20 de xunu, pesllóse’l plazu p’apuntase al XIV Concursu de Gaita de Bimenes, resultando un total de 16 gaiteros y gaiteres inscritos. Tres consultar colos miembros del Xuráu, el Conceyu Bimenes tomó’l determín de nun celebrar semifinal, atendiendo a lo dimpuesto nel artículu 3 de les Bases que regulen el certame, que diz lo que vien darréu: “(…) Si el númberu de participantes inscritos ye menor de 15, tolos participantes pasarán direutamente a la final. Sicasí, si el númberu de participantes inscritos ye mayor de 15, la decisión cabera sobre la cellebración de semifinal tomaránla los miembros del Xuráu”, espliquen dende la organización d’esti concursu.

Asina, el llunes 24 de xunu, a les 12’00 hores, sorteóse na Casa Conceyu de Bimenes l’orde de participación na final. La final del concursu tendrá llugar na pista cubierta del Colexu Públicu de Martimporra, el sábadu 6 de xunetu de 2013 de magar les 17’00 hores, nel marcu de la XVII Fiesta de la Oficialidá de la Llingua Asturiana.